മധ്യപ്രദേശിലെ ദിന്‍ഡോറിയില്‍ രസഗുളയെന്നു പറഞ്ഞ് അയല്‍വാസി നല്‍കിയ ബോംബ് കഴിക്കാന്‍ ശ്രമിച്ച യുവാവിന് ദാരുണാന്ത്യം. ചൊവ്വാഴ്ചയാണ് ദാരുണ സംഭവം നടന്നത്. രാജേന്ദ്ര ബറോട്ടിയ എന്നയാളാണ് കൊല്ലപ്പെട്ടത്. സംഭവവുമായി ബന്ധപ്പെട്ട് രാം ഭഗതിനെയും മറ്റൊരാളെയും പൊലീസ് അറസ്റ്റ് ചെയ്തു.

രാജേന്ദ്ര സ്വന്തം വീട്ടില്‍ ഇരിക്കവേ അയല്‍വാസിയായ രാം ഭഗത് ബറോട്ടിയ എന്നയാള്‍ വീട്ടിലെത്തുകയും ഇരുവരും സംസാരിച്ചിരിക്കേ രാം ഭഗത് രസഗുളയെന്നു പറഞ്ഞ് രാജേന്ദ്രയ്ക്ക് ബോംബ് നല്‍കുകയുമായിരുന്നു. രാജേന്ദ്ര ഇത് വായില്‍വച്ച് കടിച്ചപ്പോഴേക്കും പൊട്ടിത്തെറിക്കുകയായിരുന്നു. മൃഗങ്ങളെ കൊല്ലാന്‍ ഉപയോഗിക്കുന്ന ബോംബാണ് നല്‍കിയതെന്നും സ്‌ഫോടനം നടന്നയുടന്‍ അയല്‍വാസികളുടെ സഹായത്തോടെ രാജേന്ദ്രയെ ആശുപത്രിയിലെത്തിച്ചെന്നും അദ്ദേഹത്തിന്റെ ഭാര്യ സുശീല ബായി പറഞ്ഞു.