ലോകത്തിലെ തന്നെ ഏറ്റവും മികച്ച എയർലൈനുകളിലൊന്നാണ് യുഎഇയുടെ എമിറേറ്റ്സ്. മികച്ച യാത്രാനുഭവമാണ് യാത്രക്കാർക്ക് സമ്മാനിക്കുന്നത്. ഇനി എമിറേറ്റ്സിലെ യാത്രാ സൗകര്യങ്ങൾ ആസ്വദിച്ച് പ്രവാസികൾക്ക് നാട്ടിലേക്ക് പറക്കാം. അതിനൊരു അവസം കൂടിയാണ് ഇപ്പോൾ വന്നെത്തിയിരിക്കുന്നത്. ഇന്ത്യൻ നഗരങ്ങളിലേക്കുള്ള സർവീസുകൾ വർധിപ്പിച്ച എമിറേറ്റ്‌സ് എയർലൈൻസിന്റെ പ്രഖ്യാപനത്തിന് പിന്നാലെ ദുബൈയിൽ നിന്ന് മറ്റൊരു ഇന്ത്യൻ നഗരത്തിലേക്ക് സർവീസ് നടത്താനൊരുങ്ങുകയാണ്.

ദുബൈ-ബെംഗളൂരു സെക്ടറിൽ നിലവിൽ എമിറേറ്റ്സ് സർവ്വീസ് നടത്തുന്നുണ്ടെങ്കിലും ഇത്തവണ എ 380 വിമാന സർവീസുമായാണ് ഇത്തവണ എത്തിയിരിക്കുന്നത്. ലോകത്തെ തന്നെ ഏറ്റവും വലിയ കൊമേർഷ്യൽ യാത്രാവിമാനമാണ് A380. ദുബായ് – മുംബൈ റൂട്ടിൽ എമിറേറ്റ്‌സ് നിലവിൽ A380 വിമാനങ്ങൾ ഉപയോഗിക്കുന്നുണ്ട്.

ഇതോടെ ബാംഗ്ലൂർ കെമ്പഗൗഡ ഇന്റർനാഷണൽ എയർപോർട്ടിലേക്ക് A380 വിമാനങ്ങൾ ഉപയോഗിച്ച് സർവ്വീസ് നടത്തുന്ന ആദ്യത്തെ വിമാന കമ്പനിയായി എമിറേറ്റ്‌സ് മാറും. ഈ മാസം മുപ്പത് മുതലാണ് സർവ്വീസ് ആരംഭിക്കുക. രാത്രി 9.25ന് ദുബൈയിൽ നിന്ന് പുറപ്പെടുന്ന വിമാനം പുലർച്ചെ 2.30ന് ബെംഗളൂരുവിൽ ഇറങ്ങും. തിരികെ പുലർച്ചെ 4.30ന് ബെംഗളൂരുവിൽ നിന്ന് പുറപ്പെട്ട് 7.10ന് ദുബൈയിൽ എത്തുവിധമാണ് സമയക്രമം.

അതുപോലെ ലോകത്തെ ഏറ്റവും വലിയ യാത്രാ വിമാനമായ എയർബസ് എ 380 ബംഗളൂരു വിമാനത്താവളത്തിൽ എത്തിയിരുന്നു. ദുബൈയിൽ നിന്നുള്ള എമിറേറ്റ്‌സ് വിമാനം ഈ മാസം പതിനഞ്ചിനാണ് ബംഗളൂരു കെംപഗൗഡ വിമാനത്താവളത്തിൽ ലാൻഡ് ചെയ്തത്. ചരിത്ര നിമിഷം എന്നാണ് ബംഗളൂരു വിമാനത്താവള അധികൃതർ ലാൻഡിങ്ങിനെ വിശേഷിപ്പിച്ചത്. എയർബസ് എ 380 ലാൻഡ് ചെയ്യുന്ന ആദ്യ തെക്കേ ഇന്ത്യൻ വിമാനത്താവളമാണ് ബംഗളൂരു. ദുബൈയിൽനിന്ന് രാവിലെ പത്തിനു പുറപ്പെട്ട വിമാനം 3.40ന് ആണ് ബംഗളൂരുവിൽ ലാൻഡ് ചെയ്തത്.

ആഘോഷത്തോടെയാണ് ബിയാൽ ലോകത്തെ ഏറ്റവും വലിയ യാത്രാ വിമാനത്തെ വരവേറ്റത്. ബംഗളൂരു വിമാനത്താവളത്തിൽ അർപ്പിച്ച വിശ്വാസത്തിന് എമിറേറ്റ്‌സ് എയർലൈനിന് നന്ദി പറയുന്നതായി ബിയാൽ എംഡി ഹരി മാരാർ അറിയിച്ചു. എമിറേറ്റ്‌സിന്റെ എ 380 വിമാനം സർവീസ് നടത്തുന്ന ഇന്ത്യയിലെ രണ്ടാമത്തെ നഗരമാണ് ബെംഗളൂരു. നിലവിൽ 2014 മുതൽ മുംബൈയിലേക്ക് വലിയ വിമാനം സർവീസ് നടത്തിവരുന്നു.

2022 ഒക്ടോബർ 30 മുതൽ ബാംഗ്ലൂരിലേക്ക് സർവ്വീസ് നടത്തുന്നതിനായി A380 വിമാനങ്ങൾ ഉപയോഗിക്കുമെന്ന് എമിറേറ്റ്‌സ് എയർലൈൻസ് നേരത്തെ അറിയിച്ചിരുന്നു. അതുപോലെ കോവിഡ് വൈറസ് വ്യാപനത്തിന് മുമ്പുള്ളത് പോലെ ഇന്ത്യൻ നഗരങ്ങളിലേക്കുള്ള എല്ലാ സർവീസുകളും വീണ്ടും ആരംഭിക്കാനാണ് അധികൃതരുടെ തീരുമാനം. ഇന്ത്യയിലെ ഒമ്പത് നഗരങ്ങളിലേക്ക് ആഴ്ചയിൽ 170 സർവീസുകളാണ് എമിറേറ്റ്‌സ് നടത്തുക.