യുഎസിലെ പിറ്റ്സ്ബര്ഗ് സര്വകലാശാലയിലെ ഇന്ത്യന് വിദ്യാര്ഥിനിയെ കാണാതായി
യുഎസിലെ പിറ്റ്സ്ബര്ഗ് സര്വകലാശാലയിലെ ഇന്ത്യന് വിദ്യാര്ഥിനിയായ ഇരുപതുകാരിയെ കാണാതായി. ഡൊമിനിക്കന് റിപ്പബ്ലിക്കിലെ അവധി ആഘോഷത്തിനിടെയാണ് ഇരുപതുകാരിയായ സുദീക്ഷ കൊണങ്കിയെ കാണാതായത്. ഇന്ത്യന് വിദ്യാര്ഥിനിക്കായി അന്വേഷണം പുരോഗമിക്കുന്നുവെന്ന് അധികൃതര് പറയുന്നു.സുദീക്ഷ കൊണങ്കിയെ ഡൊമിനിക്കന് റിപ്പബ്ലിക്കിലെ പുന്റ കന കടല്ത്തീരത്തു വച്ചു കാണാതായത്. ഡൊമിനിക്കന് റിപ്പബ്ലിക്കിലെ ഇന്ത്യന് എംബസിയും യുഎസ് അധികൃതരും വിദ്യാര്ഥിനിക്കായുള്ള അന്വേഷണത്തിലാണ്.
സുദീക്ഷയെ മാര്ച്ച് 6നു പുലര്ച്ചെ 4 മണിയോടെയാണ് പുന്റ കന തീരത്തെ റിയു റിപ്പബ്ലിക്ക ഹോട്ടലിനു സമീപത്തു വച്ച് അവസാനമായി കണ്ടത്. അഞ്ച് സ്ത്രീകളും രണ്ടു പുരുഷന്മാരും അടങ്ങുന്ന ഒരു സംഘത്തോടൊപ്പം സുദീക്ഷ കടല്ത്തീരത്ത് ഉണ്ടായിരുന്നുവെന്നു പൊലീസ് വൃത്തങ്ങള് പറയുന്നു. സുദീക്ഷയുടെ കുടുംബവുമായി അധികൃതര് ബന്ധപ്പെട്ടിട്ടുണ്ടെന്ന് പിറ്റ്സ്ബര്ഗ് സര്വകലാശാല വക്താവ് സ്ഥിരീകരിച്ചു.
ഡൊമിനിക്കന് സിവില് ഡിഫന്സ് ടീമുകള് ഹെലികോപ്റ്ററുകള് ഉപയോഗിച്ചുള്ള തിരച്ചില് നടത്തിയെങ്കിലും സുദീക്ഷയെ കുറിച്ചുള്ള യാതൊരു സൂചനയും ലഭിച്ചിട്ടില്ല. സംഭവത്തില് ഇതുവരെ ആരുടെയും അറസ്റ്റ് രേഖപ്പെടുത്തിയിട്ടില്ല. കാണാതാകുമ്പോള് അവര് തവിട്ട് നിറത്തിലുള്ള ബിക്കിനിയാണ് ധരിച്ചിരുന്നത്. വലതുകൈയില് മഞ്ഞയും സ്റ്റീലും നിറമുള്ള ഒരു കൈ ചെയിന് ധരിച്ചിരുന്നു.
സുദീക്ഷയുടെ കുടുംബം 2006 മുതല് യുഎസില് സ്ഥിര താമസക്കാരാണ്. ഡൊമിനിക്കന് റിപ്പബ്ലിക്ക് സര്ക്കാരുമായി ആശയവിനിമയം നടത്തിയെന്നും അന്വേഷണത്തിനായുള്ള പ്രവര്ത്തനങ്ങള് ഏകോപിപ്പിക്കുന്നുണ്ടെന്നും ഇന്ത്യന് എംബസി അറിയിച്ചു.
https://www.facebook.com/Malayalivartha
