സൗദി അറേബ്യയില്‍ നടന്ന വാഹനാപകടത്തില്‍ വയനാട് സ്വദേശികളായ പ്രതിശ്രുത വധുവും വരനും വാഹനാപകടത്തില്‍ മരിച്ചു. വയനാട് സ്വദേശിനി ടീന (26), വയനാട് സ്വദേശിയുമായ അഖിലും (27) ആണ് അപകടത്തില്‍ മരിച്ചത്. ടീന ജോലി രാജിവച്ച് മടങ്ങാനിരിക്കെയാണ് അപകടം നടന്നത്. ഇരുവരും നാട്ടിലെത്തി ജൂണ്‍ 16ന് വിവാഹം കഴിക്കാനിരിക്കെയാണ് അപകടമുണ്ടായത്. യുകെയില്‍ ജോലി ചെയ്യുകയായിരുന്ന അമ്പലവയല്‍ ഇളയിടത്ത് മഠത്തില്‍ അഖില്‍ അലക്‌സും സൗദിയില്‍ കാര്‍ഡിയാക് സെന്ററില്‍ നഴ്‌സായ നടവയല്‍ നെയ്ക്കുപ്പ കാരിക്കുന്നേല്‍ ടീനയും ബുധനാഴ്ച വൈകീട്ട് നടന്ന വാഹനാപകടത്തിലാണ് മരിച്ചത്.

രണ്ടു വര്‍ഷത്തോളമായി ടീന സൗദിയില്‍ നഴ്‌സായി ജോലി ചെയ്യുന്നുവെന്ന് ബന്ധുക്കള്‍ പറഞ്ഞു. നാലു മാസം മുമ്പാണ് ടീന അവസാനമായി വീട്ടിലെത്തിയത്. സൗദിയിലെ ജോലി രാജിവച്ച് വിവാഹ ശേഷം അഖിലിനൊപ്പം യുകെയിലേക്കു പോകാനായിരുന്നു തീരുമാനം. സൗദിയില്‍ അവധി ദിവസങ്ങളായതിനാല്‍ നടപടികള്‍ പൂര്‍ത്തിയാക്കി മൃതദേഹം ലഭിക്കാന്‍ അടുത്ത ദിവസം ആകുമെന്നാണ് ലഭിക്കുന്ന വിവരമെന്നും ബന്ധുക്കള്‍ പറഞ്ഞു.

നാലു വര്‍ഷം മുമ്പാണ് അഖില്‍ യുകെയിലേക്കു പോയത്. അവിടെ എന്‍ജിനീയറായി ജോലി ചെയ്യുകയായിരുന്നു. അനുജന്‍ ഡെനില്‍ അലക്‌സ് യുകെയില്‍ നഴ്‌സായി ജോലി ചെയ്യുകയാണ്. വിവാഹത്തിനുള്ള ഒരുക്കത്തിലായിരുന്നു അഖിലിന്റെ വീട്. ഇന്നലെ വൈകിട്ട് പ്രാദേശിക സമയം നാലരയോടെയാണ് സൗദി അറേബ്യയിലെ വിനോദസഞ്ചാര കേന്ദ്രമായ അല്‍ ഉലക്ക് സമീപം അപകടമുണ്ടായത്. അപകടത്തില്‍ 5 പേരാണ് മരിച്ചത്. മരിച്ച മറ്റു 3 പേര്‍ മദീന സ്വദേശികള്‍ ആണ്. അല്‍ ഉലയില്‍നിന്ന് ഏകദേശം 150 കിലോമീറ്റര്‍ അകലെയാണ് അപകടമുണ്ടായത്.

ഇവര്‍ സഞ്ചരിച്ച കാറും സൗദി സ്വദേശികളുടെ കാറും കൂട്ടിയിടിച്ചു തീപിടിക്കുകയായിരുന്നു. ടീനയുടേയും അഖിലിന്റെയും മൃതദേഹം തിരിച്ചറിയാന്‍ സാധിക്കാത്ത വിധം കത്തിയെരിഞ്ഞെന്നാണ് മലയാളി സാമൂഹികപ്രവര്‍ത്തകര്‍ നല്‍കുന്ന വിവരം.