സ്കൂള്‍ക്കാല സുഹൃത്തിനൊപ്പം ജീവിക്കാനായി സ്വന്തം മക്കള്‍ക്ക് വിഷം നല്‍കി അമ്മ. തെലങ്കാനയിലെ സങ്കറെഢിയിലാണ് സംഭവം. നാല്‍പത്തിയഞ്ചുകാരിയായ രജിതയാണ് പ്രായപൂര്‍ത്തിയാകാത്ത തന്‍റെ മൂന്നു മക്കളെ കൊലപ്പെടുത്തിയത്. സായ് കൃഷ്ണ (12), മധുപ്രിയ (10), ഗൗതം (8) എന്നിവരാണ് കൊല്ലപ്പെട്ടത്. മക്കളെ കൊലപ്പെടുത്തിയതിനു ശേഷം രജിതയും വിഷം കഴിച്ചു.

പഴയ കൂട്ടുകാരനൊപ്പം ജീവിക്കണമെന്ന ആഗ്രഹത്തിന് മക്കള്‍ തടസ്സമായതോടെയാണ് അവരെ കൊലപ്പെടുത്താന്‍ തീരുമാനിച്ചതെന്ന് പൊലീസ് പറയുന്നു.  നിലവില്‍ ഇവര്‍ ചികിത്സയില്‍ തുടരുകയാണ്.

സംഭവ ദിവസം അത്താഴത്തിന് തൈരില്‍ വിഷം ചേര്‍ത്ത് രജിത മക്കള്‍ക്ക് നല്‍കി. ഭക്ഷണം കഴിച്ച പിന്നാലെ തന്നെ കുട്ടികള്‍ക്ക് ദേഹാസ്വാസ്ത്യം അനുഭവപ്പെട്ടു. രജിതയുടെ ഭര്‍ത്താവ് ചെന്നയ്യ നൈറ്റ് ഡ്യൂട്ടിക്ക് പോയിരിക്കുകയായിരുന്നു അപ്പോള്‍. വീട്ടിലെത്തിയപ്പോള്‍ കാണുന്നത് അനക്കമറ്റ് കിടക്കുന്ന മക്കളെയാണ്. വയറു വേദനിക്കുന്നുവെന്ന് രജിത പറഞ്ഞതോടെ ചെന്നയ്യ ഉടന്‍ ഇവരെക്കൂട്ടി ആശുപത്രിയിലെത്തി.

അടുത്തിടെ രജിത തന്‍റെ സ്കൂളിലെ പൂര്‍വ വിദ്യാര്‍ഥി സംഗമത്തിന് പോയിരുന്നു. അവിടെ വച്ച് പഴയ ഒരു കൂട്ടുകാരനെ കണ്ടുമുട്ടി ഇരുവരും തമ്മില്‍ സൗഹൃദം ബലപ്പെട്ടു.  കൂട്ടുകാരനൊപ്പം ജീവിക്കണമെന്ന ആഗ്രഹം രജിതയില്‍ ശക്തമായി. അതിന് തടസ്സമായി മുന്നിലുണ്ടായിരുന്നത് മക്കളായിരുന്നു.  അന്വേഷണത്തിന്‍റെ ആദ്യഘട്ടത്തില്‍ പൊലീസ് സംശയിച്ചത് ചെന്നയ്യയെ ആയിരുന്നു. എന്നാല്‍ വിശദമായ അന്വേഷണത്തില്‍ പ്രതി രജിതയാണെന്ന് ബോധ്യപ്പെട്ടു. കേസിലെ വിശദവിവരങ്ങള്‍ ഉടന്‍ പുറത്തുവിടുമെന്ന് പൊലീസ് അറിയിച്ചിട്ടുണ്ട്.