സങ്കടക്കാഴ്ചയായി... ഒമാനിലെ ദോഫാര്‍ ഗവര്‍ണറേറ്റിലെ മസ്യൂനയില്‍ മാന്‍ഹോളില്‍ വീണ് ഗുരുതരമായി പരുക്കേറ്റ് ചികിത്സയിലായിരുന്ന മലയാളി നഴ്‌സ് മരിച്ചു. കോട്ടയം പാമ്പാടി സ്വദേശി ലക്ഷ്മി വിജയകുമാര്‍ (34) ആണ് സുല്‍ത്താന്‍ ഖാബൂസ് ആശുപത്രിയില്‍ ചികിത്സയിലിരിക്കെ മരണത്തിന് കീഴടങ്ങിയത്.

മേയ് 15നാണ് സലാലയില്‍ നിന്ന് 200 കിലോമീറ്റര്‍ അകലെ മസ്യൂനയില്‍ ലക്ഷ്മി അപകടത്തില്‍ പെട്ടത്. ഒമാനിലെ ആരോഗ്യ മന്ത്രാലയത്തില്‍ സ്റ്റാഫ് നഴ്‌സായി ജോലി ചെയ്യുകയായിരുന്നു. താമസസ്ഥലത്ത് നിന്ന് മാലിന്യം കളയാനായി പോകുന്ന വഴി കാല്‍തെറ്റി മാന്‍ഹോളില്‍ വീഴുകയായിരുന്നു.

ഉടന്‍തന്നെ മസ്യൂനയിലെ ആശുപത്രിയില്‍ പ്രവേശിപ്പിച്ചെങ്കിലും നില ഗുരുതരമായതിനാല്‍ പിന്നീട് സുല്‍ത്താന്‍ ഖാബൂസ് യൂണിവേഴ്‌സിറ്റി ആശുപത്രിയിലേക്ക് മാറ്റുകയായിരുന്നു. ഇവിടെ വെന്റിലേറ്ററില്‍ ചികിത്സയിലിരിക്കെയാണ് മരണം സംഭവിച്ചത്.

വിവരമറിഞ്ഞ് ഭര്‍ത്താവും കുട്ടിയും സലാലയില്‍ എത്തിയിട്ടുണ്ട്. മൃതദേഹം സുല്‍ത്താന്‍ ഖാബൂസ് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണെന്നും തുടര്‍നടപടികള്‍ക്ക് ശേഷം നാട്ടിലേക്ക് കൊണ്ടുപോകും. കോട്ടയം കങ്ങഴ എരുമത്തല കമലാലയം വീട്ടില്‍ എസ്.വിജയകുമാറിന്റെയും ഓമനയുടെയും മകളാണ്.