മറീനയിലെ ബഹുനില കെട്ടിടത്തില്‍ വെള്ളിയാഴ്ച രാത്രിയില്‍ വന്‍ അഗ്നിബാധയുണ്ടായി. ആളപായമില്ല. ആളുകളെല്ലാം സുരക്ഷിതരാണെന്ന് ദുബായ് മീഡിയാ ഓഫീസ് അറിയിച്ചു. രാത്രി വൈകിയാണ് 67 നിലകളുള്ള മഫീന പിനാക്കിള്‍ (ടൈഗര്‍ ടവര്‍) കെട്ടിടത്തില്‍ അപകടം സംഭവിച്ചത്. ദുബായ് സിവില്‍ ഡിഫന്‍സ് സംഘം ആറ് മണിക്കൂറെടുത്താണ് തീ നിയന്ത്രണവിധേയമാക്കിയത്.

പ്രത്യേക യൂണിറ്റുകള്‍ 764 അപ്പാര്‍ട്ട്‌മെന്റുകളിലെ 3,820 താമസക്കാരെയും സുരക്ഷിതരാക്കി ഒഴിപ്പിക്കുകയും ചെയ്തു. ശനിയാഴ്ച പുലര്‍ച്ചെ 2.21 നാണ് ഒഴിപ്പിക്കല്‍ ശ്രമങ്ങള്‍ പൂര്‍ത്തിയായത്. താമസക്കാര്‍ക്ക് മറ്റൊരിടത്ത് താത്ക്കാലിക താമസസൗകര്യമൊരുക്കുകയും ചെയ്തു. തീപ്പിടിത്തത്തിന്റെ കാരണം വ്യക്തമായിട്ടില്ല.