ബലി പെരുന്നാള്‍ അവധിക്ക് നാട്ടില്‍ പോയ കണ്ണൂര്‍ സ്വദേശി ഹൃദയാഘാതത്തെ തുടര്‍ന്ന് നിര്യാതനായി....
ബലി പെരുന്നാള്‍ അവധിക്ക് നാട്ടില്‍ പോയ കണ്ണൂര്‍ സ്വദേശി ഹൃദയാഘാതത്തെ തുടര്‍ന്ന് നിര്യാതനായി. യാംബുവില്‍ പ്രവാസിയായ ഇരിക്കൂര്‍ പെരുവളത്ത്പറമ്പ് റഫ്‌നാസ് വീട്ടില്‍ ഖലീലുല്ല (52) ആണ് മരിച്ചത്.
തിങ്കളാഴ്ച രാവിലെ നെഞ്ചുവേദനയെ തുടര്‍ന്ന് ബന്ധുക്കള്‍ ആശുപത്രിയിലേക്ക് കൊണ്ടു പോകുന്നതിനിടെയാണ് മരണം. മൂന്ന് പതിറ്റാണ്ട് കാലമായി യാംബു സ്റ്റീല്‍ കമ്പനിയില്‍ ജോലി ചെയ്തു വരികയായിരുന്ന ഇദ്ദേഹം ബലി പെരുന്നാളിന്റെ രണ്ടു ദിവസങ്ങള്‍ക്ക് മുമ്പാണ് റീ-എന്‍ട്രി വിസയില്‍ നാട്ടിലേക്ക് പോയത്. അവധി കഴിഞ്ഞ് ഈ മാസാവസാനം സൗദിയിലേക്ക് മടങ്ങാനിരിക്കെയാണ് മരണം സംഭവിച്ചത്.
കെ.എം.സി.സി കണ്ണൂര്‍ ജില്ല യാംബു പ്രവര്‍ത്തക സമിതിയംഗമായിരുന്ന ഖലീലുല്ലയുടെ പെട്ടെന്നുള്ള വിയോഗം ബന്ധുക്കളെയും സഹപ്രവര്‍ത്തകരെയും യാംബു പ്രവാസികളെയും സുഹൃത്തുക്കളെയും ഒരു പോലെ ദുഃഖത്തിലാഴ്ത്തി. സേവന മേഖലയില്‍ നിറസാന്നിധ്യമായിരുന്നു ഇദ്ദേഹമെന്ന് സുഹൃത്തുക്കള്‍ സാക്ഷ്യപ്പെടുത്തുന്നു.പരേതരായ അബ്ദുല്ല, ആയിഷ ദമ്പതികളുടെ മകനാണ്. ഭാര്യ: റഹ്മത്ത് ഹന്ന, മക്കള്‍: നൗഷീര്‍ (യു.എ.ഇ), നിഷാദ് (ദമ്മാം), റഫ്ന.
https://www.facebook.com/Malayalivartha
