ഷാര്‍ജയില്‍ താമസസ്ഥലത്ത് മരിച്ച നിലയില്‍ കണ്ടെത്തിയ ചവറ സ്വദേശി അതുല്യ ഭര്‍ത്താവില്‍നിന്നു നേരിട്ടത് ക്രൂര പീഡനം. ഭര്‍ത്താവ് സതീഷ് ശങ്കര്‍ മദ്യപിച്ച് ഭാര്യയെ ഉപദ്രവിക്കുന്നതിന്റെ വിഡിയോയും മര്‍ദനമേറ്റ അതുല്യയുടെ ചിത്രങ്ങളും പുറത്തുവന്നു.

അതുല്യ തന്നെ ചിത്രീകരിച്ച്, തന്റെ സഹോദരിക്ക് അയച്ച ദൃശ്യങ്ങളാണ് പുറത്തുവന്നത്. വിഡിയോയില്‍ അതുല്യയോട് ഭര്‍ത്താവ് മോശമായി പെരുമാറുന്നത് കാണാം. മദ്യപിച്ച് ബോധമില്ലാത്ത അവസ്ഥയിലാണ് സതീഷ്. അതുല്യയെ സതീഷ് ഉപദ്രവിക്കാന്‍ പോകുമ്പോള്‍ അവള്‍ നിലവിളിക്കുന്നതും ദൃശ്യങ്ങളിലുണ്ട്.

സതീഷ് അശ്ലീലം സംസാരിക്കുന്നതും മദ്യപിക്കുന്നതും അതുല്യയെ അടിക്കുന്നതുമെല്ലാം പുറത്തുവന്ന വിഡിയോയിലുണ്ട്. ''എത്ര വിഡിയോ എടുത്താലും നിനക്കോ ബോറഡിക്കുന്നില്ലേ'' എന്നും ''ഓഫ് ചെയ്യടീ'' എന്നും പറയുന്നതും വിഡിയോയില്‍ കാണാം. കത്തിയുമായി സതീഷ് നില്‍ക്കുന്ന ദൃശ്യങ്ങളും പുറത്തു വന്നിട്ടുണ്ട്. എന്നാല്‍ ഇതുപയോഗിച്ച് അതുല്യയെ ആക്രമിച്ചിട്ടുണ്ടോ എന്നതില്‍ വ്യക്തതയില്ല.

വിഡിയോയ്‌ക്കൊപ്പം പുറത്തുവന്ന ദൃശ്യങ്ങളില്‍ അതുല്യയുടെ കൈകളിലും കഴുത്തിലും മുഖത്തുമെല്ലാം മുറിവേറ്റതിന്റെ പാടുകളുണ്ട്. വെള്ളിയാഴ്ചയാണ് അതുല്യയെ ഷാര്‍ജയിലെ ഫ്‌ലാറ്റില്‍ മരിച്ച നിലയില്‍ കണ്ടെത്തിയത്. മകളുടെ മരണത്തില്‍ ദുരൂഹത ആരോപിച്ച് മാതാപിതാക്കള്‍ ചവറ പൊലീസില്‍ പരാതി നല്‍കി. യുവതി സഹോദരിക്ക് അയച്ച വിഡിയോ പൊലീസിന് കൈമാറിയിട്ടുണ്ട്.