യുകെയില് ജോലി വാഗ്ദാനം ചെയ്ത് ലക്ഷങ്ങള് തട്ടിയെടുത്ത പ്രതി പിടിയില്
യുകെയില് ജോലി വാഗ്ദാനം ചെയ്ത് ലക്ഷങ്ങള് തട്ടിയ കേസില് തൃശൂര് സ്വദേശി അറസ്റ്റില്. ബെന്നി(57)യെയാണ് പിറവം പൊലീസ് അറസ്റ്റ് ചെയ്തത്. പിറവം സ്വദേശിയായ യുവാവില് നിന്നും 12 ലക്ഷം രൂപയാണ് തട്ടിയെടുത്തത്. 2023 മാര്ച്ചിലായിരുന്നു സംഭവം. കേസില് ഉള്പ്പെട്ടതിനെ തുടര്ന്ന് ബെന്നി ഒളിവിലായിരുന്നു. ശാസ്ത്രീയ അന്വേഷണത്തിനൊടുവില് വടക്കാഞ്ചേരിയിലെ ഭാര്യ വീട്ടില് നിന്നാണ് പിടികൂടിയത്.
കേസില് കൂടുതല് പേര് ഉള്പ്പെട്ടിട്ടുള്ളതായി പൊലീസ് സംശയിക്കുന്നു. കണ്ണൂര്, തൃശൂര് ജില്ലകളിലായി 13 കേസുകളില് ഉള്പ്പെട്ടിട്ടുണ്ട്. പുത്തന്കുരിശ് ഡിവൈഎസ്പി നിഷാദ് മോന്റെ നിര്ദേശാനുസരണം പിറവം എസ് എച്ച് ഒ സന്തോഷ് കുമാറിന് കിട്ടിയ രഹസ്യ വിവരത്തിന്റെ അടിസ്ഥാനത്തില് എസ് ഐ സെയ്തു മുഹമ്മദ്, എന്.പി.ബിജു, എ എസ് ഐ മാരായ ചന്ദ്രബോസ്, സന്ദീപ്, യോഹന്നാന് എന്നിവരടങ്ങിയ അന്വേഷണ സംഘമാണ് പ്രതിയെ അറസ്റ്റ് ചെയ്തത്. ഇയാളെ കോടതിയില് ഹാജരാക്കി റിമാന്ഡ് ചെയ്തു.
https://www.facebook.com/Malayalivartha
