ലോകത്തിന്റെ വിവിധ ഭാഗങ്ങളില്‍ ഒമിക്രോണ്‍ വ്യാപനം വര്‍ധിക്കുന്ന സാഹചര്യത്തില്‍ കോവിഡ് മുന്‍കരുതല്‍ നടപടികള്‍ ശക്തമാക്കണമെന്നാവശ്യപ്പെട്ട് കുവൈത്ത്. മാസ്‌ക് ധരിക്കലും സാമൂഹിക അകലം പാലിക്കലും ഉള്‍പ്പെടെയുള്ള നടപടികള്‍ ശക്തമാക്കാനാണ് അധികൃതര്‍ നല്‍കിയിരിക്കുന്ന നിര്‍ദ്ദേശം.

കോവിഡ് പ്രോട്ടോകോളുകള്‍ പാലിക്കുന്നതില്‍ വീഴ്ച്ച വരുത്തരുതെന്ന് സര്‍ക്കാര്‍ വക്താവ് താരീഖ് അല്‍ മുസറം പൊതുജനങ്ങളോട് അഭ്യര്‍ത്ഥിച്ചു. കോവിഡ് പ്രതിരോധത്തിനായുള്ള ഉന്നത മന്ത്രിതല യോഗത്തിന് ശേഷമായിരുന്നു അദ്ദേഹത്തിന്റെ പ്രതികരണം.

രാജ്യത്തിന്റെ ആരോഗ്യസുരക്ഷയ്ക്കാണ് മുന്‍ഗണന നല്‍കുന്നതെന്നും അദ്ദേഹം പറഞ്ഞു. സര്‍ക്കാരിന്റെ വിവിധ ഏജന്‍സികള്‍ ജാഗ്രതയോടെയാണു പ്രവര്‍ത്തിക്കുന്നതെന്ന് യോഗത്തില്‍ വിലയിരുത്തി.