കോവിഡ് വ്യാപനം രൂക്ഷമാകുന്ന സാഹചര്യത്തിൽ പ്രവാസികൾക്ക് കനത്ത തിരിച്ചടി. അന്താരാഷ്ട്ര വിമാനസര്‍വീസുകള്‍ക്കുള്ള വിലക്ക് നീട്ടിയിരിക്കുകയാണ്. ഇതുസംബന്ധിച്ച ഉത്തരവ് സിവില്‍ ഏവിയേഷന്‍ ഡയറക്ടര്‍ ജനറല്‍ പുറത്തിറക്കി. ഫെബ്രുവരി 28 വരെയാണ് വിലക്ക് നീട്ടിയത്.എന്നാല്‍ പുതിയ വിലക്ക് അന്താരാഷ്ട്ര ചരക്ക് നീക്കത്തെ ബാധിക്കുന്നതല്ലെന്നും ഉത്തരവിൽ വ്യക്തമാക്കുന്നു. കൂടാതെ ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ അനുവദിച്ചിട്ടുള്ള പ്രത്യേക സര്‍വീസുകള്‍ക്കും പുതിയ ഉത്തരവ് ബാധകമാകില്ലെന്നത് ചെറിയ ഒരു ആശ്വാസം നൽകുന്ന വാർത്തയാണ്.

കൂടാതെ എയര്‍ബബിള്‍ മാനദണ്ഡം പാലിച്ചുള്ള സര്‍വീസുകളും തുടരുമെന്നതും പ്രവാസികൾക്ക് ഈ നിയന്തണങ്ങളിൽ നിന്ന് അൽപ്പം ആശ്വാസമേകുന്ന കാര്യമാണ്. കോവിഡിന്റെ പുതിയ വകഭേദമായ ഒമൈക്രോണ്‍ പടരുന്നത് പരിഗണിച്ച്‌ നേരത്തെ ജനുവരി 31 വരെയാണ് രാജ്യാന്തര വിമാനസര്‍വീസുകള്‍ക്ക് വിലക്ക് ഏര്‍പ്പെടുത്തിയിരുന്നത്. എന്നാല്‍ രാജ്യത്ത് കോവിഡ് മൂന്നാം തരംഗം ശക്തമായതോടെ വിലക്ക് ഒരു മാസം കൂടി നീട്ടാന്‍ തീരുമാനിക്കുകയായിരുന്നു.

കൊവിഡ് വ്യാപനത്തെ തുടര്‍ന്ന് നേരത്തെ ഇന്ത്യ രാജ്യാന്തര സര്‍വീസുകള്‍ക്കുള്ള വിലക്ക് നീട്ടിയപ്പോൾ ഇന്ത്യയ്ക്കും സൗദിക്കും ഇടയില്‍ യാത്രക്കാര്‍ യാത്ര ചെയ്തിരുന്നത് ചാര്‍ട്ടേഡ് വിമാനങ്ങളില്‍ ആയിരുന്നു. നിലവില്‍ സൗദി ഒഴികെ മുഴുവന്‍ ജിസിസി രാജ്യങ്ങളുമായും ഇന്ത്യ എയര്‍ ബബ്ള്‍ കരാറില്‍ ഏര്‍പ്പെട്ടിട്ടുണ്ട്. അന്താരാഷ്ട്ര വിമാനസര്‍വീസുകള്‍ക്കുള്ള വിലക്ക് നീട്ടിയ സാഹചര്യത്തിൽ എയര്‍ബബിള്‍ മാനദണ്ഡം പാലിച്ചുള്ള സര്‍വീസുകളും തുടരുമ്പോൾ ഇത് പ്രവാസികളെ സംബന്ധിച്ച് ആശ്വാസം നൽകുന്ന കാര്യമാണ്.

പുതിയ എയര്‍ ബബ്ള്‍ കരാര്‍ അനുസരിച്ച്, വിമാനക്കമ്പനികള്‍ക്ക് കൊവിഡ് നിബന്ധനകള്‍ പാലിച്ചുകൊണ്ട് ഇരു രാജ്യങ്ങള്‍ക്കും ഇടയില്‍ ഇനി വിമാന സര്‍വീസ് നടത്താനാകും. വിമാനക്കമ്പനികള്‍ കൊവിഡ് നിബന്ധനകള്‍ പാലിച്ചുകൊണ്ടായിരിക്കണം സര്‍വീസ് നടത്തേണ്ടത്.

എയര്‍ ബബ്ള്‍ കരാറുമായി ബന്ധപ്പെട്ട് ഡിസംബര്‍ എട്ടിന് ഇന്ത്യയും സൗദിയും തമ്മില്‍ ചര്‍ച്ച നടത്തിയിരുന്നു. ഇതുപ്രകാരം, പരിഷ്‌കരിച്ച എയര്‍ ബബ്ള്‍ നിബന്ധനകള്‍ കേന്ദ്ര സിവില്‍ വ്യോമയാന മന്ത്രാലയം സൗദി അറേബ്യയിലെ സിവില്‍ ഏവിയേഷന്‍ ജനറല്‍ അതോറിറ്റിയ്ക്ക് സമര്‍പ്പിക്കുകയുണ്ടായി. ഈ നിബന്ധനകള്‍ സൗദി അറേബ്യയും അംഗീകരിച്ചതോടെയാണ് ഇരുരാജ്യങ്ങളും തമ്മിൽ ജനുവരി 1 മുതല്‍ എയര്‍ ബബ്ള്‍ കരാര്‍ ആരംഭിച്ചത്.