യു.എ.ഇയിൽ കനത്ത മൂടല്മഞ്ഞ്, യെലോ, റെഡ് അലേര്ട്ടുകള് പുറപ്പെടുവിച്ച് ജാഗ്രതാ നിര്ദേശവുമായി അധികൃതര്, വാഹനമോടിക്കുന്നവര് അതീവ ജാഗ്രത പാലിക്കുക
കനത്ത മൂടല്മഞ്ഞ് അബുദാബിയില് തുടരുന്ന സാഹചര്യത്തില് ജാഗ്രതാ നിര്ദേശവുമായി രംഗത്തെത്തിയിരിക്കുകയാണ് അധികൃതര്. യെലോ, റെഡ് അലേര്ട്ടുകള് പുറപ്പെടുവിച്ച് കൊണ്ടാണ് അധികൃതര് ജാഗ്രതാ നിര്ദേശം നൽകിയിരിക്കുന്നത്. തിങ്കളാഴ്ച മഞ്ഞുവീഴ്ച ശക്തമായതിനാല് ദൂരക്കാഴ്ച കുറയാന് സാധ്യതയുണ്ട്.
വാഹനമോടിക്കുന്നവര് എല്ലാ മുന്കരുതല് നടപടികളും സ്വീകരിച്ച് അതീവ ശ്രദ്ധയോടെ മാത്രം വാഹനങ്ങള് ഓടിക്കണമെന്നും ഗതാഗത നിയമങ്ങള് കര്ശനമായി പാലിക്കണമെന്നും അധികൃതര് ആവശ്യപ്പെട്ടു. അബുദാബിയിലെ നിരവധി റോഡുകളില് വാഹനങ്ങളുടെ പരമാവധി വേഗത 80 കിലോമീറ്ററായി പരമിതപ്പെടുത്തുകയും ചെയ്തിരുന്നു.
അന്തരീക്ഷ ഈര്പം വര്ധിക്കുമെന്നും മുന്നറിയിപ്പ് നൽകിയിട്ടുണ്ട്.തണുത്ത കാലാവസ്ഥ തുടരുന്ന എമിറേറ്റില് ഞായറാഴ്ച അനുഭവപ്പെട്ട കൂടിയ താപനില 20 ഡിഗ്രി സെല്ഷ്യസും കുറഞ്ഞ താപനില ഏഴ് ഡിഗ്രി സെല്ഷ്യസുമാണ്. ആകാശം മേഘാവൃതമായ ദുബൈയില് ഞായറാഴ്ച 21 ഡിഗ്രിയായിരുന്നു കൂടിയ താപനില.മണിക്കൂറില് 15 കി.മീ മുതല് 40 കി.മീ വേഗത്തില് വരെ കാറ്റുവീശാനും സാധ്യതയുള്ളതിനാല് പകല് അന്തരീക്ഷത്തില് പൊടിപടലങ്ങള് നിറക്കുകയും ദൂരക്കാഴ്ച കുറയ്ക്കുകയും ചെയ്യുമെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്കി.
അലര്ജി ഉള്ളവര് മതിയായ സുരക്ഷയോടെ മാത്രമേ പുറത്തിറങ്ങാവൂയെന്നും കടല് പ്രക്ഷുബ്ധമാകാന് സാധ്യതയുള്ളതിനാല് ബീച്ചില് പോകുന്നവര് ജാഗ്രത പാലിക്കണമെന്നും അധികൃതര് വ്യക്തമാക്കി. അബുദാബിയില് അല് ഷവാമീഖ്, അല് ഷംഖ, ബനിയാസ്, അല് റഹ്ബ, ശഖബൂത്ത് സിറ്റി, അല് ശഹാമ, അല് റീഫ്, അല് ഫലാഹ് എന്നിവിടങ്ങളിലൊക്കെ മൂടല്മഞ്ഞ് രൂപപ്പെട്ടതായി റിപ്പോര്ട്ടുകളുണ്ടായിരുന്നു.
രാത്രിയിലും കാലാവസ്ഥ പൊതുവേ മേഘാവൃതമായിരിക്കും. പരമാവധി 35 കിലോമീറ്റവര് വരെ വേഗതയില് കാറ്റടിക്കാനും സാധ്യതയുണ്ട്. അതുപോലെ അറേബ്യൻ ഗൾഫിലും ഒമാൻ കടലിലും നേരിയ തോതിൽ കടൽ ഷോഭം ഉണ്ടാകാനും സാധ്യതയുണ്ട്. മൂടല്മഞ്ഞ് അധികമായാല് വിമാന സര്വീസുകളെ അടക്കം ബാധിക്കുമെന്നും ഭരണകൂടം അറിയിച്ചു.
https://www.facebook.com/Malayalivartha
