കൊവിഡ് കേസുകളുടെ എണ്ണം ഗണ്യമായി കുറയുന്ന സാഹചര്യത്തിൽ നേരത്തെ ഏർപ്പെടുത്തിയിരുന്ന യാത്ര നിയന്ത്രണങ്ങളും നിബദ്ധനകളും ഒഴിവാക്കുകയാണ് യു.എ.ഇ. ഇത് പ്രവാസികൾക്ക് വലിയ ആശ്വാസം തന്നെയാണ്. വിമാനത്താവളങ്ങളിലെ റാപിഡ് പി.സി.ആർ പരിശോധന പ്രവാസികൾക്ക് വലിയ ദുരിതമായിരുന്നു സമ്മാനിച്ചത്.

എന്നാൽ ഇന്ത്യയിൽ നിന്നും ദുബായ്, ഷാർജ വിമാനത്താവളങ്ങളിലേക്കുള്ള യാത്രക്കാർക്ക് വിമാനത്താവളത്തിലെ റാപിഡ് പിസിആർ പരിശോധന വേണ്ട എന്ന് കഴിഞ്ഞ ദിവസം അധികൃതർ അറിയിച്ചിരുന്നു. എന്നാൽ അതിൽ ഇപ്പോൾ മറ്റം വരുത്തിയിരിക്കുകയാണ്. ഇനി ഇന്ത്യയില്‍ നിന്ന് യുഎഇയിലെ എല്ലാ വിമാനത്താവളങ്ങളിലേക്കും റാപിഡ് പിസിആര്‍ പരിശോധന ഒഴിവാക്കിരിക്കുകയാണ്. ‌‌

നേരത്തെ ദുബൈ, ഷാര്‍ജ, റാസല്‍ഖൈമ എന്നീ വിമാനത്താവളങ്ങളിലേക്കുള്ള യാത്രക്കാര്‍ക്കാണ് ഇളവുകള്‍ പ്രഖ്യാപിച്ചിരുന്നത്. എന്നാല്‍ അബുദാബിയിലേക്കും ഇളവുണ്ടായിരിക്കുമെന്ന് എയര്‍ ഇന്ത്യ എക്‌സ്പ്രസ് സര്‍ക്കുലറില്‍ അറിയിച്ചു. ഇന്ത്യയില്‍ നിന്ന് യുഎഇയിലേക്ക് യാത്ര ചെയ്യുന്നവര്‍ക്ക് റാപിഡ് പിസിആര്‍ പരിശോധന വേണമെന്ന നിബന്ധന ഒഴിവാക്കിയെന്നും മറ്റ് യാത്രാ നിബന്ധനകള്‍ പാലിക്കണമെന്നും എയര്‍ ഇന്ത്യ എക്‌സ്പ്രസ് സാമൂഹിക മാധ്യമങ്ങളിലൂടെ അറിയിച്ചു.

അബുദാബിയിലേക്ക് റാപിഡ് പിസിആര്‍ പരിശോധന വേണമെന്ന നിബന്ധന ഔദ്യോഗിക വിമാന കമ്പനിയായ ഇത്തിഹാദും വെബ്‌സൈറ്റില്‍ നിന്ന് ഒഴിവാക്കി.യാത്രയ്ക്ക് നാല് മണിക്കൂറിനുള്ളിലെടുത്ത പരിശോധനാ ഫലം വേണമെന്ന നിബന്ധനയാണ് ഒഴിവാക്കിയത്. എന്നാല്‍ 48 മണിക്കൂറിനുള്ളിലെടുത്ത ആര്‍ടി പിസിആര്‍ പരിശോധന വേണമെന്ന നിബന്ധനയ്ക്ക് മാറ്റമില്ല. ഇക്കാര്യം എല്ലാ യാത്രക്കാരും ഓർക്കേണ്ടതാണ്.

വിമാനത്താവളത്തിലെ റാപിഡ് പിസിആർ പരിശോധന ഒഴിവാക്കിയത് യാത്രക്കാർക്ക് വലിയ ആശ്വാസമാണ് പകരുന്നത്. ഈ പരിശോധന ഇരട്ടി സാമ്പത്തിക ബാധ്യതക്ക് പുറമെ അവസാന നിമിഷം തെറ്റായ ഫലത്തിലൂടെ കോവിഡ് പോസിറ്റീവാകുന്നതും യാത്രക്കാരെ വലച്ചിരുന്നു. യാത്ര മുടങ്ങുന്നവരുടെ എണ്ണം ഇനിയെങ്കിലും കുറയ്ക്കാനാകുമെന്നാണ് പ്രതീക്ഷ. റാപിഡ് പി.സി.ആർ ഒഴിവാക്കിയതോടെ യാത്രക്കാരുടെ വലിയൊരു ഭാരമാണ് ഒഴിവാകുന്നത്.

അതേസമയം, യു.എ.ഇ.യിൽ നിന്ന് ഇന്ത്യയിലേക്ക് പോകുമ്പോൾ യാത്രയ്ക്ക് മുൻപുള്ള ആർ.ടി.പി.സി.ആർ. പരിശോധന ഒഴിവാക്കിയിരുന്നു. ഗോ എയർ ആണ് ഇക്കാര്യം അറിയിച്ചത്. ഇന്ത്യയിൽ നിന്ന് വാക്സിനെടുത്തവർക്കാണ് നിലവിൽ ഇളവ് നൽകിയിരിക്കുന്നത്.

എന്നാൽ മറ്റ് എയർലൈനുകൾ ഇക്കാര്യത്തിൽ നിലപാട് വ്യക്തമാക്കിയിട്ടില്ല. ദുബായ്, ഷാർജ വിമാനത്താവളങ്ങളിൽ ഇൻഡിഗോ എയർലൈനും ഇത്തരത്തിൽ യാത്ര അനുവദിക്കുന്നുണ്ട്. എയർ സുവിധയിൽ സ്വയം സാക്ഷ്യപ്പെടുത്തിയ ഫോറം പൂരിപ്പിച്ചുനൽകണമെന്ന് ഗോ എയറിന്റെ നിർദേശത്തിൽ പറയുന്നുണ്ട്.