കൊവിഡിനെ ഒരു വിധത്തിൽ നിയന്ത്രണങ്ങളിലൂടെ പിടിച്ചുകെട്ടി നിർത്തിയിരിക്കുകയാണ്.ഇത് ഉണ്ടാക്കിവെച്ച ദുരിതങ്ങളും പ്രതിസന്ധികളും എല്ലാം തരണം ചെയ്യുന്നതിന്റെ ഇടയിൽ യു.എ.ഇയെ കിടുകിടെ പിടിച്ചു കുലുക്കിയിരിക്കുകയാണ് ഇറാനിൽ ഉണ്ടായ ഭൂകമ്പം. ഇന്ന് പുലർച്ചെ ഇന്ത്യൻ സമയം 4.45 നാണ് തെക്കൻ ഇറാനിൽ ഭൂചലനുണ്ടായത്.

റിക്ടർ സ്കെയിലിൽ 5.9 വ്യാപ്തി രേഖപ്പെടുത്തിയ ഭൂകമ്പത്തിന്റെ പ്രകമ്പനം യു എ ഇയിലും അനുഭവപ്പെട്ടു. ദുബൈ, ഷാർജ, അജ്മാൻ എന്നിവിടങ്ങളിൽ ഭൂചലനം അനുഭവപ്പെട്ടു. ഇക്കാര്യം യു എ ഇ കാലാവസ്ഥാ ഭൗമനിരീക്ഷണ കേന്ദ്രവും സ്ഥിരീകരിച്ചിട്ടുണ്ട്. അതേസമയം, യു എ ഇയിൽ എവിടെയും നാശനഷ്ടമുള്ളതായി റിപ്പോർട്ടില്ല.

ഇറാനിലെ ഹൊർമോസ്ഗൻ പ്രവിശ്യയിലെ ഖൂഹെർദിൽ നിന്ന് 16 കിലോമീറ്റർ അകലെയാണ് ഭൂകമ്പത്തിന്റെ പ്രഭവകേന്ദ്രം. യു എ ഇക്ക് പുറമേ ഒമാൻ, കുവൈത്ത്, ബഹ്റൈൻ എന്നിവിടങ്ങളിലും ഭൂചലനം അനുഭവപ്പെട്ടതായി പലരും സാമൂഹിക മാധ്യമങ്ങളിൽ കുറിപ്പിലൂടെ പങ്കുവെച്ചു.

അത് മാത്രമല്ല യു.എ.ഇ തീരത്ത് ശക്തമായ കാറ്റിന് സാധ്യതയുള്ളതായി മുന്നറിയിപ്പും പുറത്തുവന്നിരിക്കുകയാണ്. കാലാവസ്ഥാ നിരീക്ഷണ വിഭാഗമാണ് ഇത്തരത്തിൽ മുന്നറിയിപ്പ് നല്‍കിയത്. കടല്‍ വലിയ അളവില്‍ പ്രക്ഷുബ്ദമാകാന്‍ സാധ്യതയുള്ളതിനാല്‍ അബൂദബി തീരത്ത് യെല്ലോ അലര്‍ട്ടും പ്രഖ്യാപിച്ചിട്ടുണ്ട്. അബൂദബി-സൗദി അതിര്‍ത്തി മേഖലകളില്‍ പൊടിക്കാറ്റ് ശക്തമാകുമെന്നും മുന്നറിയിപ്പുണ്ട്. ഇന്ന് രാവിലെ യു.എ.ഇയിലെ ചിലയിടങ്ങളില്‍ മൂടിക്കെട്ടിയ അന്തരീക്ഷമായിരുന്നു.

അബൂദബിയിലെ ഇന്നലത്തെ കുറഞ്ഞ താപനില 22 ഡിഗ്രി സെല്‍ഷ്യസും കൂടിയ താപനില 37 ഡിഗ്രി സെല്‍ഷ്യസുമായിരുന്നു. ദുബൈയില്‍ കുറഞ്ഞ താപനില 25 ഡിഗ്രി സെല്‍ഷ്യസ് രേഖപ്പെടുത്തിയപ്പോള്‍ കൂടിയ താപനില 36 ഡിഗ്രി സെല്‍ഷ്യസായിരുന്നു.