എട്ടിന്റെ പണിയുമായി യുഎഇ, വിദൂര വിദ്യാഭ്യാസ സര്‍ട്ടിഫിക്കറ്റ് നേടിയവര്‍ക്ക് ഇനി പണിപാളും, യുഎഇയില്‍ ടീച്ചേഴ്സ് ലൈസന്‍സ് ലഭിക്കില്ല, മലയാളികള്‍ അടക്കമുള്ളവര്‍ക്ക് ജോലി നഷ്ടമാകും
യുഎഇയിലെ അധ്യാപക ലൈസന്‍സ് പരീക്ഷയ്ക്ക് ഹാജരായി പാസ്സായാലും ഈക്വലന്‍സി സര്‍ട്ടിഫിക്കറ്റുകൂടി സമര്‍പ്പിച്ചാലേ നടപടി പൂര്‍ത്തിയാക്കി ടീച്ചേഴ്സ് ലൈസന്‍സ് കിട്ടൂ. അതുകൊണ്ടുതന്നെ വിദൂര വിദ്യാഭ്യാസത്തിലൂടെ ബിരുദവും ബിരുദാനന്തര ബിരുദവും നേടി അധ്യാപകരായി തുടരുന്ന മലയാളികള്‍ അടക്കമുള്ളവര്‍ക്ക് ജോലി നഷ്ടമാകും.
ഈ സര്‍ട്ടിഫിക്കറ്റുകള്‍ക്ക് തുല്യതാ (ഇക്വലന്‍സി) സര്‍ട്ടിഫിക്കറ്റുകള്‍ കിട്ടാത്തതാണ് തടസ്സം. പുതുതായി എത്തുന്ന അധ്യാപകര്‍ക്കും രണ്ടു വര്‍ഷത്തിനകം ലൈസന്‍സ് എടുക്കാതെ തുടരാനാകില്ല. റെഗുലര്‍ കോഴ്സില്‍ പഠിച്ച സര്‍ട്ടിഫിക്കറ്റുള്ളവര്‍ക്കു മാത്രമേ ഇനി അധ്യാപകരായി ജോലി ചെയ്യാനാകൂ.
വിദൂര വിദ്യാഭ്യാസ സര്‍ട്ടിഫിക്കറ്റിന്റെ ബലത്തില്‍ അധ്യാപകരായി ജോലി ചെയ്യുന്നവര്‍ ദുബായിലാണ് കൂടുതലും. ഇവിടെ ഇക്വലന്‍സി സര്‍ട്ടിഫിക്കറ്റ് നിര്‍ബന്ധമായിരുന്നില്ല. മറ്റു എമിറേറ്റുകളിലും നേരത്തെ ഇത്തരം അധ്യാപകര്‍ ഉണ്ടായിരുന്നുവെങ്കിലും വിദ്യാഭ്യാസ മന്ത്രാലയം ഇക്വലന്‍സി സര്‍ട്ടിഫിക്കറ്റ് നിര്‍ബന്ധമാക്കിയതോടെ പലരും അഡ്മിനിസ്ട്രേഷന്‍ ഉള്‍പ്പെടെ മറ്റു ജോലിയിലേക്കു തിരിയുകയായിരുന്നു. ഇതു മുന്നില്‍ കണ്ട് റെഗുലര്‍ കോളജുകളില്‍ പഠിച്ചവരെ മാത്രമാണ് അധ്യാപകരായി പല സ്കൂളുകളും നിയമിച്ചുവരുന്നത്.
https://www.facebook.com/Malayalivartha
