കോവിഡ് പൂര്‍വകാലഘട്ടത്തില്‍ പ്രതിവര്‍ഷം 1 കോടി യാത്രക്കാരെ കൈകാര്യം ചെയ്ത വിമാനത്താവളം ആയിരുന്നു കൊച്ചി.കോവിഡ് കാലഘട്ടത്തില്‍ സുഗമമായ യാത്ര ഉറപ്പാക്കാന്‍ സിയാല്‍ നടത്തിയ പദ്ധതികള്‍ ദേശിയ ശ്രദ്ധ ആകര്‍ഷിച്ചിരുന്നു. ഇതിന്റെ ഫലമായി 2021യില്‍ 43 ലക്ഷത്തില്‍ അധികം പേര്‍ കൊച്ചിയിലൂടെ യാത്ര ചെയ്തു.

2020 അപേക്ഷിച്ചു 10 ലക്ഷത്തോളം യാത്രക്കാരുടെ വര്‍ധനവാണ് 2021യില്‍ ഉണ്ടായത്. മാര്‍ച്ച്‌ 27ന് ഇന്ത്യയില്‍ നിന്നും അന്താരാഷ്ട്ര ഷെഡ്യൂള്‍ഡ് സര്‍വീസുകള്‍ തുടങ്ങുന്ന സാഹചര്യത്തില്‍ കൊച്ചിന്‍ ഇന്‍റര്‍നാഷണല്‍ എയര്‍പോര്‍ട്ട് ലിമിറ്റഡ് വേനല്‍ക്കാല സമയ പട്ടിക പ്രഖ്യാപിച്ചിരിക്കുകയാണ്

2022 മാര്‍ച്ച്‌ 27 മുതല്‍ ഒക്ടോബര്‍ 29 വരെ ആണ് കാലാവധി. സിയാലിന്റെ വേനല്‍ക്കാല സമയ പട്ടികയില്‍ പ്രതിവാരം 1190 സര്‍വീസുകള്‍ ഇടം പിടിച്ചിട്ടുണ്ട്. വേനല്‍കാല സമയ പട്ടിക പ്രാബല്യത്തില്‍ വരുന്നതോടെ കൊച്ചിയില്‍ നിന്നും 20 എയര്‍ലൈനുകള്‍ രാജ്യാന്തര സര്‍വീസുകള്‍ നടത്തും.

ഇതില്‍ 16 എണ്ണം വിദേശ വിമാന കമ്പനികള്‍ ആണ്.ഇന്ത്യന്‍ വിമാന കമ്ബനി ആയ ഇന്‍ഡിഗോ ആണ് രാജ്യന്തര സര്‍വീസുകളില്‍ മുന്നില്‍. ഇന്‍ഡിഗോ ആഴ്ചയില്‍ 42 പുറപ്പെടല്‍ സര്‍വീസ് നടത്തും. എയര്‍ ഇന്ത്യ എക്സ്പ്രസ്സ്‌- 38, എയര്‍ ഏഷ്യ ബെര്‍ഹാദ് -21, ഇതിഹാദ്- 21, എമിറേറ്റ്സ്- 14, ഒമാന്‍ എയര്‍- 14, ഖത്തര്‍ എയര്‍- 14, സൗദി അറേബ്യന്‍ -14, കുവൈറ്റ്‌ എയര്‍ 8, തായ് എയര്‍ ഏഷ്യ -4, ശ്രീലങ്കന്‍- 10, ഗള്‍ഫ് എയര്‍- 7, ഫ്‌ളൈ ദുബായ്- 3, സിങ്കപ്പൂര്‍ എയര്‍ലൈന്‍സ് -7, സ്‌പൈസ് ജറ്റ് -6 എന്നിങ്ങനെ ആണ് പ്രമുഖ എയര്‍ലിനുകളുടെ പ്രതിവാര പുറപ്പെടല്‍ സര്‍വീസുകള്‍.

ദുബായിലേക്ക് മാത്രം ആഴ്ചയില്‍ 44 വിമാനങ്ങളാണ് കൊച്ചിയില്‍ പറന്നുയരുക. അബുദാബിയിലേക്ക്‌ -42, ലണ്ടനിലേക്ക്‌ -3, ബാങ്കോക്കിലേക്ക് - 4 എന്നിങ്ങനെ പ്രതിവരാ സര്‍വീസുകള്‍ ഉണ്ട്‌. 2 വര്‍ഷത്തെ ഇടവേളക്ക് ശേഷമാണ് എയര്‍ ഏഷ്യ ബെര്‍ഹാദ് ക്വാലാ ലംപൂര്‍ സര്‍വീസ് നടത്തുന്നത്.

ആഭ്യന്തര വിമാന സര്‍വീസുകളുടെ കാര്യത്തിലും പുതിയ വേനല്‍കാല സമയ പട്ടികയില്‍ പുരോഗതി രേഖപ്പെടുത്തിയിട്ടുണ്ട്. ഇന്ത്യയിലെ 13 നഗരങ്ങളിലേക്ക്‌ കൊച്ചിയില്‍ നിന്ന് വിമാനങ്ങള്‍ ഉണ്ടാവും.

ചെയര്‍മാന്റെയും ഡയറക്ടര്‍ ബോര്‍ഡിന്റെയും നേതൃത്വത്തില്‍ സിയാലില്‍ നിന്നും എല്ലാ പ്രമുഖ നഗരങ്ങളിലേക്കും വിമാന സര്‍വീസുകള്‍ പുനരാരംഭിക്കാന്‍ ശ്രമം നടത്തിയിരുന്നു. കൊച്ചിയെ ദക്ഷിണേന്ത്യയിലെ വിമാന സര്‍വീസ് ഹബ് ആക്കാന്‍ ഇത് കരുത്ത് പകരും എന്നാണ് ഞങ്ങളുടെ പ്രതീക്ഷ, സുഹാസ് കൂട്ടിച്ചേര്‍ത്തു.