സന്ദർശകർക്ക് മികവുറ്റ കാഴ്ച്ചകൾ സമ്മാനിച്ച് ദുബായ് എക്‌സ്‌പോ 2020 തുടരുകയാണ്. ഇനി ദിവസങ്ങൾ മാത്രമാണ് എക്‌സ്‌പോ അവസാനിക്കാൻ ബാക്കി നിൽക്കുന്നത്.അതിനാൽ ഇതുവരെ കാണാത്തതും അറിയാത്തതുമായ വിസ്മയങ്ങള്‍ തേടി സന്ദര്‍ശക ഒഴുക്ക് തുടരുകയാണ്. കൊവിഡ് നിയന്ത്രണങ്ങള്‍ നീങ്ങിയതോടെ രാജ്യാന്തര സന്ദര്‍ശകരുടെ വന്‍തിരക്കാണ് അനുഭവപ്പെടുന്നത്.

ലോകത്തെ ഏറ്റവും വലിയ വിനോദ-വിജ്ഞാന മേളയില്‍ പങ്കെടുക്കാനായതിന്റെ സന്തോഷത്തിലാണ് സന്ദർശകർ. ഇന്ത്യന്‍ വിസ്മയം എ.ആര്‍. റഹ്മാന്റെ നേതൃത്വത്തിലുള്ള സംഗീത നിശയും വരുന്ന എക്‌സ്‌പോ ദിനങ്ങള്‍ക്ക് മിഴിവേകും. വരും ദിവസങ്ങളില്‍ ആഘോഷം കൊഴുപ്പിക്കാന്‍ മറ്റ് രാജ്യാന്തര സംഗീത പ്രതിഭകളും കലാകാരന്‍ മാരും ദുബായില്‍ എത്തുമെന്നാണ് വിവരം.

ഇത് പ്രവാസികൾക്കും മനോഹരമായ അനുഭൂതിതന്നെയാകും ഉളവാക്കുന്നത്. ശേഷിക്കുന്ന ദിവസങ്ങള്‍ പുതുമകളും ആഘോഷമേളങ്ങളുമായി അവിസ്മരണീയമാക്കാനാണ് സംഘാടകരുടെ ഒരുക്കം.വരും ദിവസങ്ങളിലെ ആഘോഷ പരിപാടികളിലേറെയും കുട്ടികള്‍ക്കുള്ളതാണെന്നാണ് റിപ്പോർട്ട്. റോബോട്ടിക് സാങ്കേതിക വിദ്യകള്‍, പാരമ്പര്യേതര ഊര്‍ജം, ബഹിരാകാശ പദ്ധതികള്‍, കാര്‍ഷിക സംരംഭങ്ങള്‍, കലാ-സാഹിത്യം എന്നിങ്ങനെ ഓരോ മേഖലയെ കുറിച്ചും അറിയാന്‍ അവസരമൊരുക്കുന്നു.

വിവിധ പരിപാടികളില്‍ വിദ്യാര്‍ത്ഥികള്‍ക്ക് ഓണ്‍ലൈന്‍ വഴിയും പങ്കെടുക്കാന്‍ അവസരമുണ്ട്. തൊഴില്‍ സാധ്യതകളെക്കുറിച്ചുള്ള സെമിനാറുകള്‍ സര്‍വകലാശാലാ വിദ്യാര്‍ഥികള്‍ക്കായി സംഘടിപ്പിക്കും. ലത്തീഫാസ് അഡ്വഞ്ചേഴ്‌സ് ഉള്‍പ്പെടെയുള്ള ഉല്ലാസമേഖലകളില്‍ നക്ഷത്രങ്ങളും അന്യഗ്രഹജീവികളും കാര്‍ട്ടൂണ്‍ കഥാപാത്രങ്ങളും കുട്ടികളോടു കൂട്ടുകൂടാന്‍ കാത്തിരിക്കുന്നു.

ശനിയാഴ്ച വരെ 18 വയസ്സില്‍ താഴെയുള്ള 28 ലക്ഷം പേരാണ് എക്‌സ്‌പോ നഗരിയില്‍ എത്തിയത്. എക്‌സ്‌പോ അവസാനിക്കുമ്പോഴേക്കും 2.5 കോടിയോളം സന്ദര്‍ശകരെത്തുമെന്നാണ് പ്രതീക്ഷ.