പ്രവാസികളായ വനിതകള്‍ ജോലി മതിയാക്കി നാട്ടില്‍ എത്തിയാല്‍ എന്ത് ചെയ്യും എന്ന ചിന്ത ഇനി വേണ്ട. കഷ്ടപ്പെട്ട് മക്കളെയും കുടുംബത്തെയും കളഞ്ഞ് ജീവിതകാലം മുഴുവന്‍ ജോലിനോക്കേണ്ടിവരില്ല. എല്ലാത്തിനും പരിഹാരമായി വനിതാമിത്ര പദ്ധതിയുമായി നോര്‍ക്കയും വനിതാ വികസന കോര്‍പറേഷനും കൈകോര്‍ക്കുന്നു.

വിദേശത്തു 2 വര്‍ഷമെങ്കിലും ജോലി നോക്കുകയോ, താമസിക്കുകയോ ചെയ്തശേഷം നാട്ടില്‍ സ്ഥിരതാമസമാക്കിയ വനിതകള്‍ക്കു 30 ലക്ഷം രൂപവരെ വായ്പ നല്‍കുന്ന പദ്ധതിയാണ് വനിതാമിത്ര പദ്ധതി. ഈ സാമ്പത്തികവര്‍ഷം 1000 വായ്പകള്‍ ലഭ്യമാക്കുമെന്നു നോര്‍ക്ക റൂട്‌സ് റസിഡന്റ് വൈസ് ചെയര്‍മാന്‍ പി.ശ്രീരാമകൃഷ്ണനും വനിതാവികസന കോര്‍പറേഷന്‍ അധ്യക്ഷ കെ.സി.റോസക്കുട്ടിയും അറിയിച്ചു.

വനിതാവികസന കോര്‍പറേഷന്റെ 6% പലിശ നിരക്കിലുള്ള വായ്പയ്ക്ക് ആദ്യ 4 വര്‍ഷം നോര്‍ക്ക റൂട്ട്‌സിന്റെ 3% സബ്‌സിഡി ലഭിക്കും. കോര്‍പറേഷന്റെ  www.kswdc.org  വെബ്‌സൈറ്റ് വഴി അപേക്ഷിക്കാം. നോര്‍ക്ക റൂട്‌സ് സിഇഒ കെ.ഹരികൃഷ്ണന്‍ നമ്പൂതിരിയും കോര്‍പറേഷന്‍ എംഡി കെ.സി.ബിന്ദുവും ധാരണാപത്രം കൈമാറി.

വിശദാംശങ്ങള്‍ക്കു വനിതാവികസന കോര്‍പറേഷന്റെ 0471- 2454585, 2454570, 9496015016 എന്നീ നമ്പറുകളില്‍ ബന്ധപ്പെടുകയോ നോര്‍ക്ക റൂട്‌സിന്റെ www.norkaroots.org ... വെബ്‌സൈറ്റ് സന്ദര്‍ശിക്കുകയോ ചെയ്യാം.

മഹാമാരിയെത്തുടര്‍ന്ന് സംസ്ഥാനത്തു തിരിച്ചെത്തിയ പ്രവാസികള്‍ക്ക് കുടുംബശ്രീയിലൂടെ സാമ്പത്തിക സുരക്ഷ പദ്ധതി ഒരുക്കുന്നു. പ്രവാസി ഭദ്രത നാനോ പ്രോഗ്രാമിന്റെ ഭാഗമായാണ് നോര്‍ക്ക ഇത് നടപ്പിലാക്കുന്നത്. കുടുംബശ്രീ അയല്‍ക്കൂട്ട അംഗങ്ങളുടെ കുടുംബാംഗങ്ങള്‍ അല്ലെങ്കില്‍ തൊഴില്‍ നഷ്ടത്തെ തുടര്‍ന്ന് സംസ്ഥാനത്തു തിരിച്ചെത്തിയ വനിത സഹായ ഗ്രൂപ്പുകളിലെ അംഗങ്ങള്‍ എന്നിവര്‍ക്ക് പലിശ രഹിത വായ്പകളും ലഭിക്കും. കോവിഡ് ബാധിച്ച് മരിച്ച പ്രവാസികളുടെ കുടുംബാംഗങ്ങള്‍ക്കും ഈ പദ്ധതി വഴി വായ്പ ലഭിക്കും. നോര്‍ക്ക വകുപ്പിന്റെ ഫീല്‍ഡ് ഏജന്‍സിയായ നോര്‍ക്ക റൂട്‌സ് അനുവദിക്കുന്ന ഫണ്ടില്‍നിന്നും ചെറുകിട സംരംഭങ്ങള്‍ ആരംഭിക്കുന്നതിനു 2 ലക്ഷം രൂപ വരെയാണ് ധനസഹായം ലഭിക്കുന്നത്.

ഒരു സംരംഭത്തിന്റെ 75 ശതമാനം അല്ലെങ്കില്‍ 2 ലക്ഷം രൂപ, ഇതില്‍ ഏതാണോ കുറവ് അതായിരിക്കും ലഭിക്കുക. മോറട്ടോറിയം കാലയളവിന്റെ രണ്ടു വര്‍ഷത്തിനുള്ളില്‍, വായ്പ തുല്യ തവണകളായി തിരിച്ചടക്കണം. പലിശരഹിത വായ്പ ലഭിച്ചതിനു ശേഷം സംരംഭം ആരംഭിക്കാതിരിക്കുകയോ, ഇടക്കുവെച്ച് നിര്‍ത്തുകയോ ചെയ്താല്‍ ആറ് മാസത്തിനുള്ളില്‍ തുക തിരിച്ചടച്ചിരിക്കണം.

രണ്ട് ഗഡുക്കളായാണ് വായ്പ നല്‍കുന്നത്. സംരംഭം തുടങ്ങുന്ന സമയത്ത് ആദ്യ ഗഡു ലഭിക്കും. പകുതിയാകുമ്പോള്‍ പ്രോജക്റ്റ് റിപ്പോര്‍ട്ട് സമര്‍പ്പിച്ചതിനുശേഷമായിരിക്കും രണ്ടാം ഗഡു ലഭിക്കുന്നത്. 14 ലക്ഷത്തോളം പ്രവാസികള്‍ ജോലി നഷ്ടപ്പെട്ട് തിരിച്ചെത്തിയിട്ടുണ്ടെന്നാണ് സര്‍ക്കാരിന്റെ ഏകദേശ കണക്ക്.