യു.എ.ഇ പ്രഖ്യാപിച്ച പുതിയ വിസ പ്രവാസികള്ക്കുള്ള സമ്മാനം, തൊഴില് തട്ടിപ്പ് ഒഴിവാക്കാനും ജോലി അന്വേഷിച്ചെത്തുന്നവരുടെ സന്ദര്ശനം നിയമപരമാക്കാനും ഉപകരിക്കും, പുതിയ വിസകള് സെപ്റ്റംബര് മുതല്
യു.എ.ഇ പ്രഖ്യാപിച്ച പുതിയ വിസ പ്രവാസികള്ക്ക് ഏറെ ഗുണകരമാകും. തൊഴില് അന്വേഷിക്കുന്നവര്ക്കായി യു.എ.ഇ പ്രഖ്യാപിച്ച വിസ തൊഴില് തട്ടിപ്പ് ഒഴിവാക്കാനും ജോലി അന്വേഷിച്ചെത്തുന്നവരുടെ സന്ദര്ശനം നിയമപരമാക്കാനും ഉപകരിക്കുമെന്നതാണ് പ്രത്യേകത.ജര്മനി ഉള്പ്പെടെയുള്ള ചില രാജ്യങ്ങളില് ജോലി അന്വേഷകര്ക്കായുള്ള ഇത്തരം വിസകള് നല്കുന്നുണ്ട്.
നിലവില് ടൂറിസ്റ്റ് വിസയിലാണ് തൊഴില് അന്വേഷകരെത്തുന്നത്. ഇവര്ക്ക് ജോലി ചെയ്യുന്നതിനോ അന്വേഷിക്കുന്നതിനോ നിയമപരമായ പരിമിതികളുണ്ട്. ഇത് മുതലെടുത്താണ് തൊഴില് തട്ടിപ്പുകാര് ആളുകളെ ടൂറിസ്റ്റ് വിസയില് എത്തിക്കുന്നത്. എന്നാല്, തൊഴില് അന്വേഷകര്ക്കായി പ്രത്യേക വിസ യാഥാര്ഥ്യമാകുന്നതോടെ യു.എ.ഇയിലെ ഇവരുടെ താമസവും ജോലി അന്വേഷണവും നിയമപരമാകും.
എത്രപേര് ജോലി അന്വേഷിച്ചെത്തുന്നു എന്നതിന്റെ കണക്ക് യു.എ.ഇ അധികൃതര്ക്ക് ലഭിക്കാനും ഇത് ഗുണം ചെയ്യും. പുതിയ വിസകള് സെപ്റ്റംബര് മുതല് യാഥാര്ഥ്യമാകും. വിസയുടെ കാലാവധി എത്രയെന്ന് പറയുന്നില്ലെങ്കിലും വീണ്ടും ദീര്ഘിപ്പിക്കാവുന്ന രീതിയില് മൂന്ന് മാസത്തെ വിസ നല്കാനാണ് സാധ്യത.
കൂടാതെ യു.എ.ഇയുടെ പുതിയ വിസ ആനുകൂല്യങ്ങള് കുടുംബവുമൊത്ത് യു.എ.ഇയില് കഴിയാന് ആഗ്രഹിക്കുന്ന പ്രവാസികൾക്ക് ഗുണം ചെയ്യും.10 വര്ഷത്തെ ഗോള്ഡന് വിസയുള്ളവര്ക്ക് പ്രായപരിധിയില്ലാതെ മക്കളെ സ്പോണ്സര് ചെയ്യാം. ഇവര്ക്ക് എത്ര പേരെ വേണമെങ്കിലും വീട്ടുജോലിക്ക് നിയമിക്കാം. എത്രകാലം യു.എ.ഇക്ക് പുറത്ത് ഗോള്ഡന് വിസക്കാര് താമസിച്ചാലും വിസ റദ്ദാവില്ല. ഗോള്ഡന് വിസ ഉടമകള് മരിച്ചാല് മക്കള്ക്കും കുടുംബത്തിനും പത്തുവര്ഷത്തെ വിസ കാലാവധി തീരുന്നത് വരെ യു.എ.ഇയില് തുടരാവുന്നതാണ്.
ഗ്രീന് വിസക്കാര്ക്ക് ആണ്മക്കളെ 25 വയസ്സ് വരെ സ്പോണ്സര് ചെയ്യാം. പെണ്കുട്ടികള് അവിവാഹിതരാണെങ്കില് എത്രപ്രായം വരെയും സ്പോണ്സര് ചെയ്യാന് അനുമതി നല്കും. മാത്രമല്ല താല്ക്കാലിക ജോലിക്കായുള്ള വിസകളും ഒരുപാട് പേർക്ക് ഉപകാരമാകും. ചില പ്രോജക്ടുകള് പൂര്ത്തിയാക്കുന്നതിന് നിശ്ചിത കാലത്തേക്ക് യു.എ.ഇയില് വന്ന് പോകാന് ഇതുവഴി സാധിക്കും.
സ്പോണ്സറോ തൊഴിലുടമയോ ഇല്ലാതെ അഞ്ച് വര്ഷം വരെ ജോലി ചെയ്യാവുന്നവർക്കാണ് ഗ്രീന് വിസ ഏറെ ഉപകരിക്കുന്നത്.സ്വയം തൊഴില്, ഫ്രീലാന്സ് ജോലികള്, വിദ്ഗധ തൊഴിലാളികള് തുടങ്ങിയവര്ക്കാണ് ഈ വിസ നല്കുക. യു.എ.ഇയില് റിട്ടയര്മമെന്റ് ജീവിതം ആഗ്രഹിക്കുന്നവര്ക്കും മാനദണ്ഡങ്ങള്ക്ക് വിധേയമായി അഞ്ച് വര്ഷത്തെ ഗ്രീന് വിസ നല്കും
വിദഗ്ധ തൊഴിലാളികള്ക്ക് കുറഞ്ഞത് ബിരുദമെങ്കിലും യോഗ്യതയും മാസം 15,000 ദിര്ഹം ശമ്പളവും വേണം. ഏതെങ്കിലും സ്ഥാപനവുമായി തൊഴില് കരാറുണ്ടായിരിക്കണമെന്ന് മാത്രമല്ല തൊഴില് മന്ത്രാലയത്തില് നിന്ന് സ്വയം തൊഴില് അനുമതി നേടിയിരിക്കണം. ചികിത്സ, വിനോദ സഞ്ചാരം, ബന്ധുക്കളെ സന്ദര്ശിക്കല്, ബിസിനസ് അന്വേഷണം, വിദ്യാഭ്യാസം, പരിശീലനം, അടിയന്തര ആവശ്യങ്ങള്, മറ്റ് ജി.സി.സിയിലെ താമസക്കാര് എന്നിവക്കുള്ള വിസയും പ്രവാസികള്ക്ക് ഗുണം ചെയ്യും.
https://www.facebook.com/Malayalivartha
