ദുബായിൽ നാല് വ്യത്യസ്ത വാഹനാപകടങ്ങളിൽ ഒരു ദിവസം ജീവൻ നഷ്‌‌ടമായത് രണ്ടുപേർക്ക്. മൂന്നുപേർക്കാണ് പരിക്കേറ്റത്. തിങ്കളാഴ്ചയാണ് വാഹനാപകടങ്ങൾ ഉണ്ടായത്. അമിതവേഗവും വാഹനങ്ങൾ തമ്മിൽ വേണ്ടത്ര അകലം പാലിക്കാത്തതും ഉൾപ്പെടെയുള്ള ഗുരുതര നിയമലംഘനങ്ങൾ കാരണമാണ് ഈ നാല് അപകടങ്ങളും ഉണ്ടായതെന്ന് ദുബായ് പോലീസിലെ ഗതാഗതവിഭാഗം ഡയറക്ടർ ജനറൽ ബ്രിഗേഡിയർ സെയ്ഫ് മുഹൈർ അൽ മസ്റൂയി പറഞ്ഞു.

ജനങ്ങളുടെ ജീവൻ സംരക്ഷിക്കുന്നതിന് എല്ലാവരും ഗതാഗതനിയമങ്ങൾ പാലിക്കണമെന്നും അദ്ദേഹം ആവശ്യപ്പെട്ടു.ആദ്യ അപകടം ഉണ്ടായത് എമിറേറ്റ്സ് റോഡിൽ ട്രിപ്പൊലി പാലത്തിനു സമീപമാണ്.മൂന്നു വാഹനങ്ങളാണ് ഇവിടെ അപകടത്തിൽപ്പെട്ടത്. അപകടത്തിൽപ്പെട്ട 30-കാരന് ഗുരുതര പരിക്കേറ്റിരുന്നു. ഇയാളെ ഉടൻതന്നെ റാഷിദ് ആശുപത്രിയിലെത്തിച്ചതായി അൽ മസ്റൂയി പറഞ്ഞു.

ആവശ്യമായ അകലം പാലിക്കാതെ വാഹനമോടിച്ചതാണ് അപകടകാരണം.ദുബായ്-ഹത്ത റോഡിലാണ് മറ്റൊരു അപകടം നടന്നത്. ബൈക്കും ലോറിയും തമ്മിൽ കൂട്ടിയിടിക്കുകയായിരുന്നു. അകലം പാലിക്കാതെ വാഹനമോടിച്ചതുകാരണമാണ് അപകടമുണ്ടായത്. അപകടത്തിൽ ബൈക്ക് യാത്രികൻ മരിച്ചു. കൂടാതെ നാലു വാഹനങ്ങൾ ലോറിയുമായി ഇടിച്ചും അപകടമുണ്ടായി. അമിതവേഗതയാണ് അപകടകാരണം. ശൈഖ് മുഹമ്മദ് ബിൻ സായിദ് റോഡിലായിരുന്നു സംഭവം. അപകടത്തിൽ ഒരാളുടെ ഗുരുതരമായി തലയ്ക്ക് പരിക്കേറ്റയാളെ റാഷിദ് ആശുപത്രിയിലെത്തിച്ച് ചികിത്സ നൽകി.

അനുവാദമില്ലാത്ത സ്ഥലത്തുകൂടി റോഡ് മുറിച്ചുകടക്കുന്നതിനിടെ വാഹനമിടിച്ച് 40-കാരൻ മരിച്ച സംഭവവുമുണ്ടായി. അശ്രദ്ധമായ ഡ്രൈവിങ്, അമിതവേഗം,ഗുരുതര നിയമലംഘനങ്ങൾ ,തെറ്റായ രീതിയിലുള്ള മറികടക്കൽ എന്നിവയ്ക്കെതിരേ അൽ മസ്റൂയി മുന്നറിയിപ്പ് നൽകി.