ദുബായിൽ വാഹനങ്ങൾ കത്തിയമരുന്നത് പതിവ് സംഭവമായിക്കൊണ്ടിരിക്കുകയാണ്. കഴിഞ്ഞയാഴ്ച ഖിസൈസ് വ്യവസായ മേഖലയിലുണ്ടായ തീപ്പിടുത്തത്തിൽ ഒട്ടേറെ വാഹനങ്ങൾ കത്തിനശിച്ചു. ഇപ്പോൾ ഇതു സംബന്ധിച്ച വ്യക്തമായ കണക്കാണ് പുറത്തുവന്നിരിക്കുന്നത്. ഈ വർഷം ജനുവരി മുതൽ ഇതുവരെയുള്ള കാലയളവിൽ എത്ര വാഹനങ്ങൾക്ക് തീപിടിച്ചു എന്ന കണക്കുകളാണ് പുറത്തുവന്നിരിക്കുന്നത്.

കഴിഞ്ഞ നാലുമാസത്തിനിടെ ദുബായിൽ കത്തിയമർന്നത് 94 വാഹനങ്ങളാണ്.വേനൽക്കാലം കടുക്കുന്നതിന് മുൻപായി എല്ലാ സുരക്ഷാ മാർഗനിർദേശങ്ങളും ഡ്രൈവർമാർ പാലിക്കണമെന്ന മുന്നറിയിപ്പുമായി രംഗത്തെത്തിയിരിക്കുകയാണ്. ഈ വർഷമുണ്ടായ ഇത്രയും അപകടങ്ങളുടെ പ്രധാനകാരണം അറ്റകുറ്റപ്പണികളുടെ അഭാവമായിരുന്നെന്ന് ഫൊറൻസിക് എവിഡൻസ് ആൻഡ് ക്രിമിനോളജി മേധാവി അഹമദ് മുഹമദ് അഹമദ് പറഞ്ഞു.

പഴയ കാറുകളിലെ ഇലക്‌ട്രിക് സംവിധാനത്തിലെ തകരാർ എൻജിൻ പ്രവർത്തിക്കുന്നില്ലെങ്കിലും തീപിടിക്കാൻ കാരണമായേക്കാമെന്നാണ് പറയുന്നത്. കഴിഞ്ഞയാഴ്ച ഖിസൈസ് വ്യവസായ മേഖലയിലുണ്ടായ തീപ്പിടിത്തത്തിൽ നാശനഷ്ടങ്ങളുടെ തീവ്രതയും കത്തിനശിച്ച കാറുകളുടെ എണ്ണവും ഇതുവരെ വെളിപ്പെടുത്തിയിട്ടില്ല. 14-ന് പുലർച്ചെ അൽ ജദ്ദാഫ് മേഖലയിൽ കാരവാനുകൾ കത്തിനശിച്ച തീപ്പിടിത്തത്തിന്റെ കാരണം കണ്ടെത്താനുള്ള അന്വേഷണവും നടക്കുകയാണ്.