യുഎഇയിൽ ഐഡി കാർഡ് നിർബന്ധിയിരിക്കുകയാണ് അധികൃതർ. നവജാത ശിശുക്കൾക്ക് 120 ദിവസത്തിനകം ഐഡി കാർഡ് നിർബന്ധിയതായി അധികൃതർ അറിയിച്ചു. കുഞ്ഞ് ജനിച്ച അന്നു മുതലാണ് ദിവസം കണക്കാക്കുക. സ്പോൺസറുടെ വീസയുടെ കാലാവധിയനുസരിച്ചാകും കുട്ടികളുടെ കാർഡിന്റെ കാലാവധി നിർണയിക്കുക.അതിനാൽ സ്പോൺസറുടെ വീസ കാലാവധിയുള്ളതാകണമെന്നത് പ്രധാന വ്യവസ്ഥയാണ്.

കുട്ടിയുടെ കാർഡ് എടുക്കാൻ വൈകിയതിന് പിഴയുണ്ടെങ്കിൽ അതാദ്യം അടയ്ക്കുകയും വേണം.ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൻഷിപ്, കസ്റ്റംസ് ആൻഡ് പോർട്ട് സെക്യൂരിറ്റി വെബ്സൈറ്റിലും ആപ്പിലും ഇതിനു സൗകര്യമുണ്ട്. കുട്ടിയുടെ പാസ്പോർട്ട് പകർപ്പ്, ഫോട്ടോ, സ്പോൺസറുടെ വീസ പേജ് സഹിതമുള്ള പാസ്പോർട്ട് പകർപ്പ്, ഇ-ദിർഹം രസീത്, ജനന സർട്ടിഫിക്കറ്റ് എന്നിവയാണ് ഐഡി കാർഡ് അപേക്ഷയ്ക്കായി പ്രധാനമായും വേണ്ടത്.

അപേക്ഷയും ഫീസും അടച്ചാൽ മറ്റു വിവരങ്ങൾ അധികൃതർ ഇ-മെയിലിൽ അറിയിക്കും.ഓൺലൈൻ അപേക്ഷ അപൂർണമാണെങ്കിൽ 30 ദിവസത്തിനകം തിരുത്തി സമർപ്പിക്കണം. ഇല്ലെങ്കിൽ അപേക്ഷ റദ്ദാകും. ഐഡി കാർഡിന് അപേക്ഷിക്കാൻ 30 ദിവസത്തിലേറെ വൈകിയാൽ ഓരോ ദിവസവും 20 ദിർഹമാണ് പിഴ. ഇപ്രകാരം ഒരു കാർഡിൽ പരമാവധി 1,000 ദിർഹം വരെ പിഴ ചുമത്തും.

അതേസംമയം യുഎഇയിൽ പണമിടപാടുകൾക്കും എമിറേറ്റ്‌സ് ഐഡി മതിയെന്ന് സെൻട്രൽ ബാങ്ക് അറിയിച്ചിരുന്നു. പാസ്‌പോർട്ടിന് പകരം എമിറേറ്റ്‌സ് ഐഡിയിൽ വിസ പതിച്ചു തുടങ്ങിയതിനെ തുടർന്നാണ് ഈ തീരുമാനം. ഇതോടെ രാജ്യത്ത് താമസ, തൊഴിൽ വിസ ഉള്ളവർക്കെല്ലാം ബാങ്കുകളിലും പണമിടപാട് സ്ഥാപനങ്ങളിലും ഐഡി കാർഡ് മാത്രം മതിയാകും.ഇതു സംബന്ധിച്ച അറിയിപ്പ് ബാങ്കുകൾക്കും മണി എക്‌സ്‌ചേഞ്ചുകൾക്കും കമ്പനികൾക്കും സെൻട്രൽ ബാങ്ക് കൈമാറി.

വിസയ്ക്കും ഐഡി കാർഡിനുമുള്ള അപേക്ഷ ഏകീകരിച്ചതിനെ തുടർന്ന് ടൈപ്പിങ് സെന്റർ ജീവനക്കാർക്ക് ഇതുസംബന്ധിച്ച് പരിശീലനം നൽകാൻ ഫെഡറൽ അതോറിറ്റി ഫോർ ഐഡന്റിറ്റി സിറ്റിസൺഷിപ്പ്, കസ്റ്റംസ് ആന്റ് പോർട് സെക്യൂരിറ്റി അധികൃതർ തീരുമാനിച്ചു.രാജ്യത്ത് പാസ്‌പോർട്ടിൽ വിസ പതിക്കുന്നത് 11 മുതലാണ് നിർത്തിവെച്ചത്. പുതിയ സംവിധാനത്തിലൂടെ എല്ലാ എമിറേറ്റുകളിലും പൂർണമായും നിലവിൽ വരുന്നതുവരെ ചിലയിടങ്ങളിൽ തത്ക്കാലം നിലവിലുള്ള രീതിയിൽ വിസ സ്റ്റാംപിങ് തുടരും.

യുഎഇയ്ക്ക് പുറത്തുള്ളവർ തിരിച്ചെത്തുമ്പോൾ വിമാനത്താവളങ്ങളിൽ പാസ്‌പോർട്ടിനൊപ്പം ഐഡി കാർഡ് കാണിക്കേണ്ടതാണ്. ഐഡിയില്ലെങ്കിൽ ഫെഡറൽ അതോറിറ്റി ഫോർ ഐഡന്റിറ്റി സിറ്റിസൺഷിപ്പ്, കസ്റ്റംസ് ആന്റ് പോർട്ട് സെക്യൂരിറ്റി വെബ്‌സൈറ്റിൽ നിന്നോ ആപ്പ് വഴിയോ പകർപ്പെടുക്കാം.

വിസ, എമിറേറ്റ്സ് ഐഡി പകർപ്പിന് അപേക്ഷിച്ചാൽ ഇമെയിൽ വഴിയും ലഭിക്കും. പാസ്പോർട്ട് നമ്പറും എമിറേറ്റ്സ് ഐഡിയും ഉപയോഗിച്ച് എയർലൈനുകൾക്ക് താമസ വിസയുടെ നിജസ്ഥിതി പരിശോധിക്കാൻ സാധിക്കും. ഇതു സംബന്ധിച്ച വിവരങ്ങൾ വിമാനക്കമ്പനികൾക്ക് കൈമാറിയിട്ടുണ്ട്. ഏപ്രിൽ 11 മുതൽ നിലവിൽ വന്ന താമസ വിസ മാറ്റത്തിലൂടെ ഇതിനു ശേഷം പാസ്പോർട്ടിൽ സ്റ്റാമ്പ് ചെയ്യുന്ന പതിവ് യുഎഇ നിർത്തലാക്കുകയാണെന്ന് അധികൃതർ അറിയിച്ചിരുന്നു. താമസവിസ കാണിക്കേണ്ട സാഹചര്യങ്ങളിലെല്ലാം ഇനിമുതൽ എമിറേറ്റ്സ് ഐഡി ഉപയോഗിച്ചാൽ മതി.