യുഎഇയിലെ ബൈക്ക് റൈഡ് മത്സരങ്ങളിൽ സജീവ സാന്നിധ്യമായിരുന്ന കോഴിക്കോട് സ്വദേശിയായ യുവാവ് അപകടത്തിൽ മരിച്ചു. ഉണ്ണിക്കുളം എസ്റ്റേറ്റ്മുക്ക് പൂനൂർ 19ലെ ജപിൻ ജയപ്രകാശ് (37) ആണ് മരിച്ചത്.ശനിയാഴ്ച രാവിലെ ഫുജൈറ ദിബ്ബയില്‍ ആണ് അപകടമുണ്ടായത്. റൈഡിനിടെ ബൈക്ക് അപകടത്തിൽപ്പെടുകയായിരുന്നു. ഉടനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

നേരത്തെ രാജ്യന്തര ബൈക്ക് റെയ്സിങ്ങിൽ പങ്കെടുത്ത താരം യുഎഇയിലെ ബൈക്ക് റൈഡ് മത്സരങ്ങളിൽ സജീവ സാന്നിധ്യമായിരുന്നു. ദുബായ് ഇന്ത്യൻ കോൺസുലേറ്റിലെ അറ്റസ്റ്റേഷൻ സർവീസായ ഐവിഎസിൽ ജോലിചെയ്തു വരികയായിരുന്നു ജപിൻ.‌ പരേതനായ ജയപ്രകാശാണ് അച്ഛൻ, അമ്മ പ്രേമകുമാരി. ഭാര്യ ഡോ അഞ്ജു ജപിൻ, മക്കൾ ജീവ ജപിന്‍, ജാന്‍ ജപിന്‍ എന്നിവരാണ്.

അതേസമയം, പത്തനംതിട്ട സ്വദേശി ഷാഹുല്‍ ഹമീദ് മദീനയില്‍ അപകടത്തില്‍ മരണപെട്ടു. കുലശേഖരപതി സ്വാദേശിയാണ്. റിയാദില്‍ നിന്ന് ഉംറ ആവശ്യാര്‍ഥം മദീനയില്‍ എത്തിയതായിരുന്നു. ഉംറ നിര്‍വ്വഹിച്ച ശേഷം മദീനയില്‍ നിന്നും മടങ്ങും വഴിയാണ് അപകടം സംഊവിച്ചത്.

മീഖാത്തിനടുത്തുള്ള ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം ഖബറടക്കുന്നതിനുള്ള ശ്രമം നടത്തിവരികയാണ്. ജിദ്ദയിലെയും മദീനയിലേയും കെ.എം.സി.സി പ്രവര്‍ത്തകര്‍ മൃതദേഹം സംസ്‌ക്കരിക്കുവാനുള്ള രേഖകള്‍ ശരിയാക്കിവരികയാണെന്നാണ് റിപ്പോർട്ടുകൾ.