ബുര്‍ജ് ഖലീഫ ഏരിയയിലെ ഹോട്ടലിൽ തീപിടുത്തം. സ്വിസ്സോടെല്‍ അല്‍ മുറൂജ് ഹോട്ടലിലെ മേല്‍ക്കൂരയിലാണ് തീപടർന്നത്. ബുധനാഴ്ച ഉച്ചയോടെയാണ് സംഭവം. അഗ്നിശമന സേനാംഗങ്ങളുടെ രക്ഷാപ്രവര്‍ത്തനലൂടെ തീ അണച്ചു.ഏകദേശം18 മിനിറ്റുകൊണ്ട് തീ അണച്ചതായി ദുബായ് സിവില്‍ ഡിഫന്‍സ് അറിയിച്ചു.

ഹോട്ടലിന്റെ മേല്‍ക്കൂരയിലെ നിരവധി എയര്‍കണ്ടീഷണറുകള്‍ തീപിടുത്തത്തിൽ കത്തിനശിച്ചതായി അധികൃതര്‍ അറിയിച്ചു. എന്നാൽ തീപിടുത്തത്തിന്റെ കാരണം എന്താണെന്ന് ഇതുവരെ വ്യക്തമായിട്ടില്ല. സ്ഥലത്തെത്തിയ അഗ്നിശമന സേനാംഗങ്ങള്‍ ഹോട്ടലിലെ ആളുകളെ അതി വേഗത്തില്‍ തന്നെ അവിടെ നിന്ന് ഒഴിപ്പിച്ചിരുന്നു.

അതിനാൽ ആളപായമോ പരുക്കോ ഒന്നും തന്നെ ഇതുവരെ റിപ്പോര്‍ട്ട് ചെയ്തിട്ടില്ല. നാശനഷ്ടങ്ങളുടെ കണക്കുകളും പുറത്തുവിട്ടിട്ടില്ല.തീപിടുത്തത്തെ സംബന്ധിച്ച് കൂടുതല്‍ അന്വേഷണങ്ങള്‍ ആരംഭിച്ചിട്ടുണ്ട്. ഇതേതുടർന്ന് അപകടത്തെ കുറിച്ചുള്ള വിവരങ്ങള്‍ ബന്ധപ്പെട്ട അധികാരികള്‍ക്ക് കൈമാറിയതായി അധികൃതര്‍ അറിയിച്ചു.

3:19 ന് ദുബായിലെ ഡൗണ്‍ ടൗണ്‍ ഏരിയയില്‍ കനത്ത കറുത്ത പുക പടരുന്നതായി ഓപ്പറേഷന്‍ റൂമിന് റിപ്പോര്‍ട്ട് ലഭിക്കുകയായിരുന്നു. ഇതിനെ തുടര്‍ന്ന് വിവരം അറിഞ്ഞ് നാല് മിനിറ്റ് കൊണ്ട് തന്നെ സബീല്‍, അല്‍ റാഷിദിയ, ബര്‍ഷ സ്റ്റേഷനുകളില്‍ നിന്നുള്ള അ്ഗ്നിശമന സേനാംഗങ്ങള്‍ രക്ഷാപ്രവര്‍ത്തനത്തിന് സ്ഥലത്ത് എത്തുകയായിരുന്നു. വിവിധ സ്റ്റേഷനുകളിൽ നിന്നുള്ള അ്ഗ്നിശമന സേനാംഗങ്ങളുടെ സംയുക്ത രക്ഷാപ്രവര്‍ത്തലൂടെ 3:41 ഓടെ തീ നിയന്ത്രണവിധേയമാക്കാൻ സാധിച്ചുവെന്നാണ് റിപ്പോര്‍ട്ട്.