യു.എ.ഇയിലെ വമ്പൻ മാറ്റം ഇനി പ്രവാസികളുടെ കൈകളിലേക്കും എത്താൻ പോകുകയാണ്. ഇനി അതിന് വലിയ താമസമില്ല ഉടൻ നിങ്ങളിലേക്കെത്തും.യു.എ.ഇ പുറത്തിറക്കുന്ന പുതിയ കറൻസി നോട്ടുകൾ പ്രചാരത്തിലായി. ഇനി അത് അധികം വൈകാതെ തന്നെ നിങ്ങളിലേക്കെത്തും. പുതിയ അഞ്ച് ,പത്ത് ,50 നോട്ടുകള്‍ പ്രചാരത്തിലായതായി യുഎഇ സെന്‍ട്രല്‍ ബാങ്കാണ് അറിയിച്ചത്.

എടിഎമ്മുകളിലേക്കും അവ വിതരണം ചെയ്തിട്ടുണ്ട്.പുതിയ നോട്ടുകളെക്കുറിച്ചു പൊതുജനങ്ങള്‍ക്ക് അവബോധം നല്‍കുന്നതിനും അവയുടെ പ്രചാരം വര്‍ദ്ധിപ്പിക്കുന്നതിനുമായി രാജ്യത്ത് എല്ലാ ബാങ്കുകള്‍ക്കും നിര്‍ദേശം നല്‍കിയിട്ടുണ്ട്. എമിറേറ്റ്‌സ് എന്‍ബിഡി, അബുദബി കൊമേഴ്‌സ്യല്‍ ബേങ്ക്, ഫസ്റ്റ് അബുദാബി ബേങ്ക്, ബേങ്ക് ഓഫ് ഷാര്‍ജ എന്നിവ പുതിയ നോട്ടുകള്‍ക്കായി എടിഎമ്മുകള്‍ പ്രോഗ്രാം ചെയ്ത ദേശീയ ബേങ്കുകളില്‍ ഉള്‍പ്പെടുന്നു.

ഏറെ പ്രത്യേകതകളോടെയാണ് പുതിയ നോട്ടുകൾ യു.എ.ഇ തയ്യാറാക്കിയിരിക്കുന്നത്.അനുകരിക്കാൻ കഴിയാത്ത ഉയർന്ന സുരക്ഷാ സംവിധാനങ്ങളാണ് നോട്ടിലുള്ളതെന്ന് സെൻട്രൽബാങ്ക് വ്യക്തമാക്കി. കള്ളപ്പണം തടയുന്നതിനുള്ള സുരക്ഷാ സംവിധാനങ്ങളുമുണ്ട്. ഈ നോട്ടുകള്‍ മോടിയുള്ള പോളിമര്‍ മെറ്റീരിയലുകള്‍ കൊണ്ടാണ് നിര്‍മ്മിച്ചിരിക്കുന്നത്.

പുതിയ അഞ്ച് ദിർഹം നോട്ടിൽ രാഷ്ട്രപിതാവ് ശൈഖ് സായിദിന്റെ ചിത്രത്തിന് പുറമെ യു.എ.ഇയുടെ പാരമ്പര്യം വിളിച്ചറിയിക്കുന്ന അജ്മാനിലെയും, റാസൽഖൈമയിലെയും കോട്ടകളുടെ ചിത്രമുണ്ട്. പത്ത് ദിർഹത്തിന്റെ നോട്ടിൽ അബൂദബി ശൈഖ് സായിദ് മസ്ജിദിന്റെയും, ഖൊർഫുക്കാൻ ആംഫി തിയേറ്ററിന്റെയും ചിത്രങ്ങൾ ചേർത്തിട്ടുണ്ട്.

നേരത്തേയും സമാനമായ അൻപത് ദിർഹത്തിന്‌റെ നോട്ടുകൾ യു.എ.ഇ പുറത്തിറക്കിയിരുന്നു. കഴിഞ്ഞ വര്‍ഷം യു എ ഇ 50-ാം വാര്‍ഷികത്തോട് അനുബന്ധിച്ചാണ് പുതിയ 50 ദിര്‍ഹം നോട്ട് പുറത്തിറക്കിയത് . യു.എ.ഇയുടെ സുവര്‍ണ ജൂബിലി പ്രമാണിച്ച് സ്ഥാപക പിതാവ്, അന്തരിച്ച ശൈഖ് സായിദ് ബിന്‍ സുല്‍ത്താന്‍ അല്‍ നഹ്യാനോടും എമിറേറ്റ്‌സിലെ ആദ്യ തലമുറ ഭരണാധികാരികളോടുമുള്ള ആദരവായാണ് ബാങ്ക് നോട്ട് പുറത്തിറക്കിയത്.

ഇത് കടലാസ് നോട്ടുകളേക്കാള്‍ കൂടുതല്‍ കാലം നിലനില്‍ക്കുന്നതും പരിസ്ഥിതി സൗഹൃദവുമാണെന്ന് കണ്ടെത്തിയിട്ടുണ്ട്. വ്യത്യസ്തമായ വയലറ്റ് ഷേഡുകള്‍, മധ്യഭാഗത്ത് യു.എ.ഇ നാഷനല്‍ ബ്രാന്‍ഡിന്റെ അടയാളങ്ങള്‍, നൂതന ഇന്റാഗ്ലിയോ പ്രിന്റിങ് ടെക്‌നിക്ക് ഉപയോഗിച്ച് സൃഷ്ടിച്ച വരകളും ലിഖിതങ്ങളും ബാങ്ക് നോട്ടില്‍ ഉള്‍പ്പെടുത്തിയിരിക്കുന്നു. കാഴ്ചയില്ലാത്ത ഉപയോക്താക്കളെ നോട്ടിന്റെ മൂല്യം തിരിച്ചറിയാന്‍ സഹായിക്കുന്നതിന് ബ്രെയില്‍ ലിപിയില്‍ ചിഹ്നങ്ങള്‍ ചേര്‍ത്തിട്ടുണ്ട്.