സന്ദർശക വിസക്കാർക്ക് ഹജ്ജിന് അനുമതിയില്ല.ഹജ്ജ് വിസയിലെത്തുന്നവർക്കും രാജ്യത്ത് നിയമാനുസൃത ഇഖാമ (റെസിഡന്‍റ് പെർമിറ്റ്) ഉള്ളവർക്കും മാത്രമായിരിക്കും ഹജ്ജിന് അനുമതി നൽകുക.

രാജ്യത്തിനകത്ത് ഹജ്ജ് ചെയ്യാന്‍ ആഗ്രഹിക്കുന്ന ആളുകള്‍ക്ക് ഹജ്ജ് രജിസ്ട്രേഷന് സഹായിക്കാമെന്ന് അവകാശപ്പെടുന്ന സംശയാസ്പദമായ വെബ്സൈറ്റുകള്‍ കൈകാര്യം ചെയ്യുന്നതിനെതിരെ ഹജ്ജ്, ഉംറ മന്ത്രാലയം മുന്നറിയിപ്പ് നല്‍കി.

2022 സീസണിലെ ഹജ്ജ് നടപടിക്രമങ്ങള്‍ ഉടന്‍ ഔദ്യോഗിക വെബ്സൈറ്റ് വഴി പ്രഖ്യാപിക്കുമെന്ന് മന്ത്രാലയം അറിയിച്ചിട്ടുണ്ട്.ഓരോ രാജ്യത്തിനും അനുവദിച്ച നിശ്ചിത ക്വാട്ട ഉപയോഗിച്ച് ഈ വര്‍ഷം രാജ്യത്തിനകത്തും പുറത്തും നിന്നുള്ള തീര്‍ത്ഥാടകരുടെ എണ്ണം ഒരു ദശലക്ഷമായി ഉയര്‍ത്താന്‍ തീരുമാനിച്ചതായി മന്ത്രാലയം അറിയിച്ചിരുന്നു.

ഈ വര്‍ഷത്തെ ഹജ്ജിന് വിദേശ തീര്‍ത്ഥാടകര്‍ക്ക് ചില നിബന്ധനകളും വ്യവസ്ഥകളും ഹജ്ജ് മന്ത്രാലയം നിശ്ചയിച്ചിട്ടുണ്ട്. എല്ലാ തീര്‍ത്ഥാടകര്‍ക്കും രണ്ട് ഡോസ് കൊറോണ വൈറസ് വാക്സിനുകള്‍ നിര്‍ബന്ധമാക്കുക, 65 വയസ്സിന് മുകളില്‍ പ്രായമുള്ളവരെ തീര്‍ത്ഥാടനം നടത്താന്‍ അനുവദിക്കാതിരിക്കുക എന്നിവ ഈ വ്യവസ്ഥകളില്‍ ഉള്‍പ്പെടുന്നു.

ഈ വര്‍ഷം ഹജ്ജ് നിര്‍വഹിക്കുന്ന മൊത്തം തീര്‍ത്ഥാടകരുടെ എണ്ണത്തില്‍ 85 ശതമാനവും വിദേശ തീര്‍ഥാടകരായിരിക്കുമെന്ന് മന്ത്രാലയം നേരത്തെ അറിയിച്ചിരുന്നു. 85,0000 വിദേശ തീര്‍ത്ഥാടകരെയും 1,50,000 ആഭ്യന്തര തീര്‍ത്ഥാടകരെയും ഹജ്ജ് ചെയ്യാന്‍ അനുമതി നല്കിയിട്ടുണ്ടെന്നു മന്ത്രാലയം വിശദമാക്കി.