ജിദ്ദയിലെ ചേരിപ്രദേശങ്ങളിലെ അനധികൃത കെട്ടിടങ്ങള്‍ പൊളിച്ചുനീക്കുന്ന നടപടി പുനരാരംഭിച്ചു. ജിദ്ദ നഗരത്തിന്റെ സൗന്ദര്യം വര്‍ധിപ്പിക്കുന്നതിനും ചേരിപ്രദേശങ്ങള്‍ വികസിപ്പിക്കുന്നതിനും വേണ്ടിയാണ് കെട്ടിടങ്ങള്‍ പൊളിച്ച് നീക്കുന്നത് എന്നാണ് വിവരം. ജിദ്ദ നഗരവികസനത്തിന് വേണ്ടി പ്രവര്‍ത്തിക്കുന്ന സമിതിയാണ് പൊളിച്ചുനീക്കല്‍ നടപടി പുനരാരംഭിച്ചതായി അറിയിച്ചിരിക്കുന്നത്.

ഏതാനും മാസം മുമ്പാണ് കെട്ടിടങ്ങള്‍ പൊളിച്ചുനീക്കുന്ന നടപടികള്‍ ജിദ്ദ മുനിസിപ്പാലിറ്റി ആരംഭിച്ചത്. ആദ്യ ഘട്ടം എന്ന രീതിയില്‍ ചേരിപ്രദേശങ്ങളിലെ പഴയ കെട്ടിടങ്ങള്‍ പൊളിച്ചുമാറ്റാനും അനധികൃത കൈയേറ്റങ്ങള്‍ ഒഴിപ്പിക്കാനുമാണ് മുന്‍സിപ്പാലിറ്റി നിര്‍ദേശം നല്‍കിയിരുന്നത്.

ശറഫിയ, കന്ദറ, ബാബു മക്ക, ബലദ് തുടങ്ങി 22ഓളം പഴയ ഡിസ്ട്രിക്ടുകളിലെ നൂറുകണക്കിന് കെട്ടിടങ്ങളാണ് ഇതിനകം അധികൃതര്‍ പൊളിച്ചുമാറ്റിയത്. നഗര സൗന്ദര്യവത്കരണത്തിനും വികസനത്തിനും വേണ്ടിയാണ് അനധികൃത നിര്‍മിതികള്‍ നീക്കം ചെയ്യുന്നത് എന്നാണ് മുന്‍സിപ്പാലിറ്റി അധികൃതര്‍ അറിയിക്കുന്നത്.

അതിനിടെ പെരുന്നാളിന്റെ സമയത്ത് കെട്ടിടങ്ങള്‍ പൊളിച്ചുനീക്കുന്ന നടപടികള്‍ അധികൃതര്‍ താത്കാലികമായി നിര്‍ത്തിവെച്ചിരുന്നു. അതാണിപ്പോള്‍ പുനരാരംഭിച്ചിരിക്കുന്നത്.

12 ഡിസ്ട്രിക്ടുകളിലെ പഴയ കെട്ടിടങ്ങള്‍കൂടി നീക്കം ചെയ്യുന്നതിനുള്ള ജോലികള്‍ ആരംഭിച്ചിട്ടുണ്ടെന്നാണ് വിവരം. ബനീ മാലിക്, മുശ്രിഫ, ജാമിഅ, റിഹാബ്, അസീസിയ, റവാബി, റബ്വ, മുന്‍തസഹാത്, ഖുവൈസ, അല്‍അദ്ല്‍ വഫദ്ല്‍, ഉമ്മുസലം, എന്നിവിടങ്ങളിലെ പല കെട്ടിടങ്ങളും പൊളിച്ചുമാറ്റുന്നതിലുള്‍പ്പെടും. ഇതിന്റെ മുന്നോടിയായി പൊളിച്ചുമാറ്റാന്‍ പോകുന്ന കെട്ടിടങ്ങളിലെ താമസക്കാരോട് മാറിത്താമസിക്കാന്‍ അധികൃതര്‍ അറിയിപ്പ് നല്‍കി തുടങ്ങിയിട്ടുണ്ട്. മാത്രമല്ല ഇതുമായി ബന്ധപ്പെട്ട് കെട്ടിടത്തിന്റെ ഉടമകള്‍ക്കും
താമസക്കാര്‍ക്കും ചേരിവികസന കമ്മിറ്റി നോട്ടീസുകളും നല്‍കാന്‍ തുടങ്ങിയിട്ടുണ്ട്.

ഈ സ്ഥലങ്ങളിലെ പൊളിക്കല്‍ ജോലികള്‍ 2021 ഡിസംബര്‍ 16 നാണ് ആരംഭിച്ചത്. ഓഗസ്റ്റ് 27 ന് പൊളിക്കല്‍ ജോലികള്‍ പൂര്‍ത്തിയാക്കും. വിശുദ്ധ റമദാനില്‍ നഗരവാസികളുടെ സൗകര്യം മാനിച്ച് പൊളിക്കല്‍ ജോലികള്‍ താല്‍ക്കാലികമായി നിര്‍ത്തിവെക്കുകയായിരുന്നു. റമദാനു മുമ്പായി നഗരത്തിലെ 22 ഡിസ്ട്രിക്ടുകളില്‍ പൊളിക്കല്‍ ജോലികള്‍ പൂര്‍ത്തിയായിരുന്നു.

എന്തായാലും ജിദ്ദയിലെ കെട്ടിടങ്ങള്‍ പൊളിച്ചു നീക്കുന്നത് പ്രവാസികള്‍ക്കും വെല്ലുവിളിയായി മാറിയിരിക്കുകയാണ്.