ആഗോളതലത്തിൽ യുഎഇയിലേക്ക് ജനശ്രദ്ധയെത്തിക്കുന്നതിന് അടുത്തകാലത്ത് പല പരിഷ്കാരങ്ങളും രാജ്യം പ്രഖ്യാപിച്ചിരുന്നു. ഇപ്പോൾ
പ്രവാസികളെ നെഞ്ചോട് ചേർത്തുപിടിക്കുന്ന പ്രഖ്യാപനം നടത്തിയിരിക്കുകയാണ് യു.എ.ഇ. അപ്രതീക്ഷിതമായി ജോലി നഷ്ടപ്പെട്ട് വിഷമിക്കുന്നവർക്ക്  യു.എ.ഇയുടെ പ്രഖ്യാപനം വലിയൊരു ആശ്വാസം തന്നെയാണ്.

അപ്രതീക്ഷിതമായി ജോലി നഷ്ടപ്പെട്ടവർക്ക് പരിമിതകാലത്തേക്ക് ഇൻഷൂറൻസ് തുക പ്രഖ്യാപിച്ച് യു.എ.ഇ വെെസ് പ്രസിഡന്റ് ശെെഖ് മുഹമ്മദ് ബിൻ റാഷിദ് അൽ മഖ്തൂം. യു.എ.ഇ കാബിനറ്റ് മീറ്റിംഗിനു ശേഷം ട്വിറ്ററിലൂടെയാണ് ഇൻഷൂറൻസ് പദ്ധതിയെക്കുറിച്ച് പ്രഖ്യാപനമുണ്ടായത്. അദ്ദേഹത്തിന്റെ പുതിയ തീരുമാനം നിറഞ്ഞ കൈയ്യടി നേടുകയാണ്.

പ്രവാസികളും ഈ തീരുമാനത്തെ ഇരുകൈകളു നീട്ടി സ്വാഗതം ചെയ്തു കഴിഞ്ഞു.പൊടുന്നനെ ജോലി നഷ്ടപ്പെട്ട ഇൻഷൂർ ചെയ്ത തൊഴിലാളികൾക്കാകും നിശ്ചിതകാലത്തേക്ക് പണം ലഭിക്കുക. ഇൻഷൂറൻസ് പാക്കേജിലൂടെയാകും ഈ സംവിധാനം നടപ്പിലാകുക. ഇൻഷൂർ ചെയ്ത ജീവനക്കാരന് പദ്ധതി പ്രാബല്യത്തിൽ വരുന്നതോടെ മറ്റൊരു ജോലി കണ്ടെത്തുന്നതുവരെയുള്ള നഷ്ടപരിഹാരം ലഭിക്കുമെന്നത് ജോലി നഷ്ടപ്പെട്ടവർക്ക് വലിയൊരു ആശ്വാസമാണ്.

ഇതിലൂടെ ചില വ്യക്തമായ ലക്ഷ്യങ്ങളും ആദ്ദേഹം മുന്നോട്ടുവയ്ക്കുണ്ട്.ഒന്ന് യുഎഇയിലെ തൊഴിൽ വിപണിയുടെ മത്സരക്ഷമത വർധിപ്പിക്കുക,രണ്ട് തൊഴിലാളികളെ സംരക്ഷിക്കുക, അവസാനത്തേത് സുസ്ഥിരമായ തൊഴിൽ അന്തരീക്ഷം സൃഷ്ടിക്കുക എന്നിവയാണ് ഇതിന്റെ ലക്ഷ്യമെന്നാണ് അൽ മഖ്തൂം ട്വിറ്ററിൽ കുറിച്ചു.തൊഴിൽരഹിതർക്കുള്ള ഇത്തരം ഇൻഷൂറൻസുകൾ പദ്ധതികൾ സാമ്പത്തിക മേഖലയെ ഉത്തേജിപ്പിക്കുമെന്നും, തൊഴിലില്ലായ്മ പരിഹരിക്കുമെന്നുമാണ് ഇന്റർനാഷണൽ ലേബർ ഓർഗനെെസേഷന്റെ അഭിപ്രായം.

എന്നാൽ പദ്ധതിയെക്കുറിച്ചുള്ള കൂടുതൽ വിവരങ്ങളൊന്നും അദ്ദേഹത്തിന്റെ ഓഫീസ് വ്യക്തമാക്കിയിട്ടില്ല. ഇത് സംബന്ധിച്ച് കൂടുതൽ വിശദാശങ്ങൾ അദ്ദേഹത്തിന്റെ ഓഫീസ് ഉടൻ പുറത്തുവിടുമെന്നാണ് പ്രതീക്ഷ. ഇതിന്റെ കാത്തിരിപ്പിലാണ് പ്രവാസമോകവും.അതേസമയം യുഎഇയിലേക്ക് ജനശ്രദ്ധ തിരിക്കുന്ന പ്രഖ്യാപനമായിരുന്നു ഗ്രീൻ വിസ.

വിദഗ്ദരായ പ്രൊഫഷനലുകൾ, ഫ്രീലാൻസറുമാർ, നിക്ഷേപകർ, സംരംഭകർ തുടങ്ങി ആഗോള പ്രതിഭകളെ ആകർഷിക്കുന്നതിനായി അഞ്ച് വർഷത്തെ ഗ്രീൻ വിസ യുഎഇ പ്രഖ്യാപിച്ചിരുന്നു. രാജ്യത്ത് തങ്ങാനുള്ള പെർമിറ്റ് റദ്ദാകുകയോ, കാലഹരണപ്പെടുകയോ ചെയ്തവർക്ക് ആറ് മാസത്തോളം രാജ്യത്ത് തുടരാനുള്ള ഫ്ലെക്സിബിൾ ഗ്രേസ് പിരീഡുകൾ പ്രഖ്യാപിച്ച യുഎഇയുടെ നടപടിയും കെെയ്യടി നേടിയിരുന്നു.