ബിഗ് ടിക്കറ്റ് നറുക്കെടുപ്പിലൂടെ നിരവധി പ്രവാസികളാണ് ഇതിനോടകം കോടിപതികളായത്. മിക്കപ്പോഴും ഒറ്റയ്ക്ക് ടിക്കറ്റെടുക്കാതെ ഒരു ഗ്രൂപ്പായിട്ടാകും ടിക്കറ്റ് സ്വന്തമാക്കുക. എന്നാൽ ആദ്യമായി ഒറ്റയ്ക്കെടുത്ത ടിക്കറ്റിന് 5 ലക്ഷം ദിർഹം സമ്മാനം നേടിയിരിക്കുകയാണ് ഒരു പ്രവാസി. ബിഗ് ടിക്കറ്റ് വാരാന്ത്യ നറുക്കെടുപ്പിൽ ഒരു കോടിയിലേറെ രൂപയാണ് ഇദ്ദേഹം ഒറ്റയ്ക്ക് നേടിയെടുത്തത്.

ദുബായിലെ നിർമാണ കമ്പനിയിൽ സൂപ്പർവൈസറായ തമിഴ്നാട് മധുര സ്വദേശി തെദ്സിന മൂർത്തി മീനാച്ചി സുന്ദരം ആണ് ഭാഗ്യവായ ആ പ്രവാസി. അബുദാബിയിൽ നടന്ന ബിഗ് ടിക്കറ്റിന്റെ പ്രതിവാര ഇലക്‌ട്രോണിക് നറുക്കെടുപ്പിലെ ഏറ്റവും പുതിയ വിജയിയാണ് തെദ്സിനാ മൂർത്തി.

കഴിഞ്ഞ ഒൻപത് വർഷമായി യുഎഇയിൽ ജോലി ചെയ്യുന്ന ഇദ്ദേഹം കഴിഞ്ഞ അഞ്ചു വർഷമായി ബിഗ് ടിക്കറ്റ് എടുക്കുന്ന വ്യക്തയാണ്. സാധാരണയായി സുഹൃത്തുക്കള്‍, സഹോദരൻ എന്നിവരെ കൂട്ടിയായിരുന്നു ടിക്കറ്റ് വാങ്ങിയിരുന്നത്.

ഇത്തവണ ഒറ്റയ്ക്കെടുത്ത ടിക്കറ്റിന് ഭാഗ്യമെത്തുകയായിരുന്നു. ഒരു ദിവസം തന്നെയും ഭാഗ്യദേവത ക‌ടാക്ഷിക്കുമെന്ന പ്രതീക്ഷയിലായിരുന്നു ഇദ്ദേഹം ടിക്കറ്റ് എടുത്തിരുന്നത്.കെട്ടിട നിർമാണ കമ്പനിയിൽ ജോലി ചെയ്യുന്ന തെദ്സിനാ മൂർത്തിക്ക് 2500 ദിർഹമാണ് പ്രതിമാസ ശമ്പളം. ഈ കമ്പനിയിൽ തന്നെ ജോലി തുടരുമെന്നും 29 കാരൻ പറഞ്ഞു.

തന്റെ മകന്റെ ജനന തീയതിയുമായി പൊരുത്തപ്പെടുന്ന നമ്പരുകളുള്ള ലോട്ടറി ടിക്കറ്റാണ് ഭാഗ്യം കൊണ്ടുവന്നതെന്ന് ഇദ്ദേഹം പറഞ്ഞു.ഇന്ത്യയിൽ നിന്ന് അവധി കഴിഞ്ഞ് മടങ്ങിയെത്തിയ ശേഷം ഈ മാസം രണ്ടാനായിരുന്നു ടിക്കറ്റ് നമ്പർ: 065245 വാങ്ങിയത്. 24ന് മകന് ഒരു വയസ്സ് തികയും. അവന്റെ ജനന തീയതി 24-5-2021 ആണ്. അതിനാൽ, ടിക്കറ്റിൽ അവസാനത്തെ മൂന്ന് അക്കങ്ങളായി 24 ഉം 5 ഉം ഉണ്ടായിരുന്നതിനാൽ അത് തിരഞ്ഞെടുത്തു.

മകന്റെ ജന്മദിനവുമായി പൊരുത്തപ്പെടുന്ന നമ്പറുകൾ കാരണം ഇത്തവണ ഭാഗ്യമെത്തുമെന്ന് തോന്നിയിരുന്നതായി ഇദ്ദേഹം പറയുന്നു. ഭാര്യയെയും മകനെയും യുഎഇയിൽ കൊണ്ടുവരികയാണ് ആദ്യ ലക്ഷ്യം. ജൂൺ മൂന്നിന് നടക്കുന്ന ഗ്രാൻഡ് ഡ്രോയിൽ 20 ദശലക്ഷം ദിർഹവും രണ്ടാം സമ്മാനമായ ഒരു ദശലക്ഷം ദിർഹവും മറ്റ് രണ്ട് സമ്മാനങ്ങളും നേടാനുള്ള അവസരവും തെദ്സിനാ മൂർത്തിക്ക് ഉണ്ട്.