കൊവിഡ് കാലത്ത് എല്ലാം മേഖലകളും സാമ്പത്തികമായി തകിടം മറിഞ്ഞ അവസ്ഥയിലായിരുന്നു. മഹാമാരിക്കെതിരെയുള്ള പ്രതിരോധം തീർക്കലും കൂടിയായപ്പോൾ രാജ്യത്തെ ജനങ്ങളുടെ സുരക്ഷയിലേക്ക് ശ്രദ്ധതിരിഞ്ഞു. ഇപ്പോൾ കൊവിഡ് കേസുകൾ കുറഞ്ഞിരിക്കുന്ന ഈ അവസരത്തിൽ എല്ലാ മേഖകളും പഴയതിലും ഉന്മേഷത്തോടെ ഉണർന്നു തുടങ്ങി.

ദുബായില്‍ വിനോദസഞ്ചാര മേഖല പുർണശേഷിയിലെക്ക് തിരിച്ചുവന്നു എന്നു തന്നെ പറയാം. കാരണം ദുബായില്‍ വിനോദസഞ്ചാരികളുടെ എണ്ണത്തില്‍ 214 ശതമാനം വര്‍ദ്ധനവാണ് രേഖപ്പെടുത്തിയിരിക്കുന്നത്. ട്വിറ്ററിലൂടെ ദുബായ് കിരീടാവകാശി ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം ആണ്  ഇക്കാര്യം അറിയിച്ചത്.

മാത്രമല്ല കൊവിഡ് വ്യാപനത്തെ കൈകാര്യം ചെയ്ത രീതി കാരണം വിനോദ സഞ്ചാരികള്‍ക്കിടയില്‍ ദുബായ് അങ്ങേയറ്റം ജനപ്രിയമായി മാറിയെന്ന് ഉന്നത ഉദ്യോഗസ്ഥര്‍ അറിയിച്ചു. 2021ല്‍ ദുബായില്‍ 6,30000 ആരോഗ്യ വിനോദ സഞ്ചാരികള്‍ എത്തി.

ദുബായില്‍ എത്തിയ ആരോഗ്യ വിനോദ സഞ്ചാരികളില്‍ 38 ശതമാനവും ഏഷ്യന്‍ രാജ്യങ്ങളില്‍ നിന്നുള്ളവരും 24 ശതമാനം യൂറോപ്പില്‍ നിന്നുള്ളവരും 22 ശതമാനം അറബ്, ജിസിസി രാജ്യങ്ങളില്‍ നിന്നുള്ളവരുമാണെന്നാണ് കണക്കുകള്‍ വ്യക്തമാക്കുന്നത്.അന്താരാഷ്ട്ര ആരോഗ്യ വിനോദ സഞ്ചാരികളില്‍ 55 ശതമാനം പുരുഷന്മാരും 45 ശതമാനം സ്ത്രീകളുമാണ്.

അന്താരാഷ്ട്ര ആരോഗ്യ വിനോദസഞ്ചാരികള്‍ക്ക് ചികിത്സയുടെ ഏകദേശം 70 ശതമാനവും മള്‍ട്ടി ഡിസിപ്ലിനറി ക്ലിനിക്കുകളിലും 16 ശതമാനം ആശുപത്രികളിലും 14 ശതമാനം ഏകദിന ശസ്ത്രക്രിയാ കേന്ദ്രങ്ങളിലുമാണ് നല്‍കിയത്. ഡെര്‍മറ്റോളജി (43 ശതമാനം), ദന്തചികിത്സ (18 ശതമാനം), ഗൈനക്കോളജി (16 ശതമാനം) എന്നിവയാണ് ആരോഗ്യ വിനോദ സഞ്ചാരികളെ ഏറ്റവും കൂടുതല്‍ ആകര്‍ഷിച്ച മൂന്ന് മെഡിക്കല്‍ സ്പെഷ്യാലിറ്റികള്‍.ഓര്‍ത്തോപീഡിക്‌സ്, പ്ലാസ്റ്റിക് സര്‍ജറി, ഒഫ്താല്‍മോളജി, ഹെല്‍ത്ത് ആന്‍ഡ് വെല്‍നസ്, ഫെര്‍ട്ടിലിറ്റി ട്രീറ്റ്‌മെന്റുകള്‍ എന്നിവ മറ്റ് മെഡിക്കല്‍ സ്പെഷ്യാലിറ്റികളില്‍ ഉള്‍പ്പെടുന്നു.

വിനോദസഞ്ചാര മേഖലയിൽ മാത്രമായി ഒതുങ്ങുന്നില്ല ദുബായുടെ നേട്ടങ്ങൾ.നേരിട്ടുള്ള വിദേശ നിക്ഷേപ പദ്ധതികൾ ആകർഷിക്കുന്നതിൽ ദുബായ് ആഗോളതലത്തിൽ ഒന്നാം സ്ഥാനത്ത് എത്തിയിരിക്കുകയാണ്.മഹമാരിയുടെ പ്രത്യാഘാതങ്ങളെ അതിജീവിച്ച് എമിറേറ്റിന്‍റെ സമ്പദ്‌വ്യവസ്ഥയുടെ തിരിച്ചുവരവ് ശക്തമായി തുടരുന്ന സാഹചര്യത്തിലാണ് നേട്ടം കൈവരിച്ചിരിക്കുന്നത്.