കൊവിഡ് മഹാമാരി ഉയർത്തിയ സമ്പത്തിക തകർച്ചയിൽ നിന്ന് കരകയറുകയാണ് ഗൾഫ് രാഷ്ട്രങ്ങൾ. എല്ലാ മേഖകളും പഴയതിലും ഉന്മേഷത്തോടെ ഉണർന്നു തുടങ്ങി. ഈ അവസരത്തിൽ നേരിട്ടുള്ള വിദേശ നിക്ഷേപ പദ്ധതികൾ ആകർഷിക്കുന്നതിൽ ദുബായ് ആഗോളതലത്തിൽ ഒന്നാം സ്ഥാനത്ത് എത്തിയിരിക്കുന്നു എന്ന റിപ്പോർട്ടുകളാണ് പുറത്തുവന്നിരിക്കുന്നത്.

ദുബായുടെ എഫ്.ഡി.ഐ റിസൽട്ട്സ് ആൻഡ് റാങ്കിങ് ഹൈലൈറ്റ് റിപ്പോർട്ട്-2021 പുറത്തുവിട്ടാണ് ഇക്കാര്യം വെളിപ്പെടുത്തിയത്. മഹാമാരിയുടെ പ്രത്യാഘാതങ്ങളെ അതിജീവിച്ച് എമിറേറ്റിന്‍റെ സമ്പദ്‌വ്യവസ്ഥയുടെ തിരിച്ചുവരവ് ശക്തമായി തുടരുന്ന സാഹചര്യത്തിലാണ് നേട്ടം കൈവരിച്ചിരിക്കുന്നത് എന്നത് എടുത്തു പറയേണ്ട ഒരു കാര്യം തന്നെയാണ്.

2021 ൽ വിദേശനിക്ഷേപം ആകർഷിക്കുന്നതിൽ ദുബായ് ആഗോള തലത്തിൽ ഒന്നാമതെത്തി. കഴിഞ്ഞവർഷത്തെ കണക്കുകൾ പ്രകാരം കോർപറേറ്റ് ആസ്ഥാനമായി ആകർഷിക്കപ്പെടുന്ന പട്ടണങ്ങളിൽ രണ്ടാം സ്ഥാനവും ദുബായ് കരസ്ഥമാക്കി.

2021ൽ കാലയളവിൽ 418 ഗ്രീൻഫീൽഡ് എഫ്.ഡി.ഐ പദ്ധതികൾ എമിറേറ്റിലെത്തിയതായി ദുബൈ കിരീടാവകാശിയും എക്സിക്യൂട്ടിവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാശിദ് ആൽ മക്തൂം പറഞ്ഞു.പുതിയ സംരംഭങ്ങൾ ആരംഭിക്കുന്നതിനും പുതിയ അവസരങ്ങൾ പ്രയോജനപ്പെടുത്തുന്നതിനും ബിസിനസ് വിപുലീകരിക്കുന്നതിനും മികച്ച സാമ്പത്തിക അന്തരീക്ഷവും ബിസിനസ് സാഹചര്യവും ദുബായ് സൃഷ്ടിച്ചിട്ടുണ്ടെന്നും ശൈഖ് ഹംദാൻ കൂട്ടിച്ചേർത്തു.

ഇക്കണോമി ആൻഡ് ടൂറിസം വകുപ്പിന്‍റെ ഏജൻസിയായ ദുബൈ ഇൻവെസ്റ്റ്‌മെൻറ് ഡെവലപ്‌മെന്‍റ് ഏജൻസി പ്രസിദ്ധീകരിച്ചതാണ് ഈ റിപ്പോർട്ട്.പഴയതിലും ഉന്മേഷത്തോടെ ദുബായിലെ വിനോദസഞ്ചാര മേഖല പുർണശേഷിയിലേക്ക് തിരിച്ചുവന്നു കൊണ്ടരിക്കുകയാണ്.

കാരണം ദുബായില്‍ വിനോദസഞ്ചാരികളുടെ എണ്ണത്തില്‍ 214 ശതമാനം വര്‍ദ്ധനവാണ് രേഖപ്പെടുത്തിയിരിക്കുന്നത്. ട്വിറ്ററിലൂടെ ദുബായ് കിരീടാവകാശി തന്നെയാണ് ഇക്കാര്യം അറിയിച്ചത്. മാത്രമല്ല കൊവിഡ് വ്യാപനത്തെ കൈകാര്യം ചെയ്ത രീതി കാരണം വിനോദ സഞ്ചാരികള്‍ക്കിടയില്‍ ദുബായ് അങ്ങേയറ്റം ജനപ്രിയമായി മാറിയെന്ന് ഉന്നത ഉദ്യോഗസ്ഥര്‍ അറിയിച്ചു.