അബുദാബിയില്‍ കാരവനുകള്‍ക്ക് തീപിടിച്ച് അപകടം. മുസഫ വ്യവസായ മേഖലയില്‍ ബുധനാഴ്ച വൈകിട്ടാണ് തീപിടിത്തം ഉണ്ടായത്. പ്രദേശവാസികളാണ് വിവരം അധികൃതരെ അറിയിച്ചത്. സംഭവം അറിഞ്ഞ ഉടന്‍ സ്ഥലത്തെത്തിയ അബുദാബി പൊലീസും അബുദാബി സിവില്‍ ഡിഫന്‍സ് സംഘവും തീ നിയന്ത്രണവിധേയമാക്കി.

തീപിടിത്തത്തില്‍ ആര്‍ക്കും പരിക്കേറ്റിട്ടില്ലെന്ന് പൊലീസ് അറിയിച്ചു. എന്നാൽ തീപിടിത്തത്തിന്റെ കാരണം കണ്ടെത്താന്‍ കഴിഞ്ഞിട്ടില്ല. ഇതിനായി പൊലീസ് അന്വേഷണം പുരോഗമിക്കുകയാണ്.

അതേസമയം രണ്ട് ദിവസങ്ങൾക്ക് മുമ്പ് ബഹ്‍റൈനിലെ എ.സി റിപ്പയറിങ് വര്‍ക്ക്ഷോപ്പിൽ ഉണ്ടായ വന്‍ തീപിടുത്തത്തിൽ പ്രവാസിക്ക് ദാരുണാന്ത്യം സംഭവിച്ചിരുന്നു. ബഹ്‍റൈനിലെ ഒരു എ.സി റിപ്പയറിങ് വര്‍ക്ക്ഷോപ്പിലാണ് അപകടമുണ്ടായത്. റാസ് സുവൈദിലായിരുന്നു സംഭവം.

തീപിടുത്തമുണ്ടായ വര്‍ക്ക്ഷോപ്പിനുള്ളില്‍ കുടുങ്ങിപ്പോയ പ്രവാസി യുവാവ് ശ്വാസം മുട്ടിയാണ് മരിച്ചതെന്ന് റിപ്പോര്‍ട്ടുകള്‍. മുപ്പത്തിയേഴ് വയസുകാരനായ ബംഗ്ലാദേശ് സ്വദേശിയാണ് മരണപ്പെട്ടത്. അപകടത്തില്‍ നാല് പേര്‍ക്ക് പരിക്കേറ്റിരുന്നു.

ഏഴ് ഫയര്‍ എഞ്ചിനുകളും 27 അഗ്നിശമന സേനാ അംഗങ്ങളും കൂടിച്ചേര്‍ന്ന് നടത്തിയ ശ്രമങ്ങള്‍ക്കൊടുവിലാണ് തീ നിയന്ത്രണ വിധേയമാക്കാന്‍ സാധിച്ചതെന്ന് ആഭ്യന്തര മന്ത്രാലയം അറിയിച്ചു. തീപിടുത്തത്തിന്റെ കാരണം കണ്ടെത്താനായി അന്വേഷണം ആരംഭിച്ചതായും ആഭ്യന്തര മന്ത്രാലയം ട്വീറ്റ് ചെയ്‍തു.

സ്ഥലത്ത് അഗ്നിശമന സേനാ അംഗങ്ങള്‍ രക്ഷാ പ്രവര്‍ത്തനം നടത്തുന്നതിന്റെ വീഡിയോ ദൃശ്യങ്ങള്‍ സാമൂഹിക മാധ്യമങ്ങളിലൂടെ പ്രചരിച്ചിരുന്നു. കഴിഞ്ഞ വര്‍ഷവും റാസ് സുവൈദിലെ ഒരു പെയിന്റ് സംഭരണ കേന്ദ്രത്തില്‍ വലിയ തീപിടുത്തമുണ്ടായിരുന്നു.