ബിജെപി നേതാക്കളുടെ പ്രവാചക വിരുദ്ധ പരാമർശത്തെ അപലപിച്ച് ഗൾഫ് രാഷ്ട്രങ്ങൾ പരസ്യമായി തന്നെ രംഗത്തിയിരുന്നു.പ്രവാചകന്‍ മുഹമ്മദ് നബിക്കെതിരെ ബിജെപി നേതാക്കള്‍ നടത്തിയ പരാമര്‍ശം ഇന്ത്യയില്‍ നടക്കുന്ന ന്യൂനപക്ഷവിരുദ്ധ നീക്കങ്ങളുടെ ഭാഗമാണെന്ന് ഇസ്‍ലാമിക രാജ്യങ്ങളുടെ കൂട്ടായ്മയായ ഒഐസി ജനറല്‍ സെക്രട്ടേറിയറ്റും പാക്കിസ്ഥാനും പ്രതികരിച്ചത്.

പരാമര്‍ശത്തില്‍ ഇസ്‍ലാമിക രാജ്യങ്ങള്‍ പ്രതിഷേധം കടുപ്പിച്ചതോടെ വിദേശകാര്യമന്ത്രാലയം വിഷയത്തിൽ പ്രതികരിച്ച് രംഗത്തുവന്നിരുന്നു. വിവാദ പരാമര്‍ശം നടത്തിയവര്‍ക്കെതിരെ കര്‍ശന നടപടിയെടുത്തിട്ടുണ്ടെന്നും ഒഐസിയുടെ പരാമര്‍ശം സങ്കുചിത മനഃസ്ഥിതിയോെടയാണെന്നും വിഷയത്തിൽ വിദേശകാര്യമന്ത്രാലയം പ്രതികരിച്ചിരുന്നു.

ഇപ്പോൾ പ്രവാചക നിന്ദയാരോപിച്ച്‌ ഇന്ത്യയ്‌ക്കെതിരെ പ്രതിഷേധ പ്രകടനങ്ങള്‍ നടത്തിയ പ്രവാസികളെ അറസ്റ്റ് ചെയ്തിരിക്കുകയാണ് കുവൈത്ത്.പ്രതിഷേധിക്കുന്ന പ്രവാസികളെ നാടുകടത്തുമെന്ന് കുവൈറ്റ് ആഭ്യന്തരമന്ത്രാലയത്തിന്റെ മുന്നറിയിപ്പ് നൽകിയിരിക്കുകയാണ്.

കുവൈറ്റിലെ നിയമമനുസരിച്ച്‌ പ്രവാസികള്‍ക്ക് സമരങ്ങളോ പ്രകടനങ്ങളോ നടത്താന്‍ അനുമതിയില്ല. പ്രകടനത്തില്‍ പങ്കെടുത്തവരെ അറസ്റ്റ് ചെയ്യുകയും അവരെ നാട് കടത്തുവാനുള്ള നപടിക്രമങ്ങള്‍ ആരംഭിക്കുകയും ചെയതിട്ടുണ്ട്. രാജ്യത്തിന്റെ നിയമം പരസ്യമായി ലംഘിച്ചവര്‍ക്കെതിരെ നടപടി എടുക്കാന്‍ ആഭ്യന്തര മന്ത്രാലയം നേരത്തെ ഉത്തരവിട്ടിരുന്നു.

ഫാഹേല്‍ ഏരിയയിലായിരുന്നു പ്രതിഷേധ പരിപാടി സംഘടിപ്പിച്ചത്. വെള്ളിയാഴ്ച ജുമ പ്രാര്‍ഥനയ്‌ക്ക് ശേഷം പ്രതിഷേധ പരിപാടി സംഘടിപ്പിച്ചവര്‍ക്കെതിരെയാണ് നടപടിയെടുക്കുക എന്നാണ് റിപ്പോര്‍ട്ട്. പരിപാടിയില്‍ നിരവധി പ്രവാസികള്‍ പങ്കെടുത്തതായാണ് റിപ്പോര്‍ട്ട്. നിയമലംഘനം എന്ന ഗുരുതരമായ കുറ്റം ആരോപിച്ചാണ് ധര്‍ണയില്‍ പങ്കെടുത്ത പ്രവാസികള്‍ക്കെതിരെ അധികൃതര്‍ രംഗത്തെത്തിയിരിക്കുന്നത്.

ഇവരെ രാജ്യത്ത് നിന്നും പുറത്താക്കിക്കൊണ്ട് കുറ്റവാളികള്‍ക്കെതിരെ മാതൃകാപരമായ ശിക്ഷ ഉറപ്പാക്കുകയാണ് അധികൃതരുടെ ലക്ഷ്യം. സ്വദേശികള്‍ സംഘടിപ്പിക്കുന്നത് ഉള്‍പ്പെടെയുള്ള സമരങ്ങളിലും പ്രതിഷേധ പരിപാടികളിലും പങ്കെടുക്കുന്ന പ്രവാസികളെ ഇതേ നടപടികളാണ് കാത്തിരിക്കുന്നതെന്നും അധികൃതര്‍ മുന്നറിയിപ്പ് നല്‍കി.