ബിജെപി നേതാക്കളുടെ പ്രവാചക വിരുദ്ധ പരാമർശത്തിൽ കുവൈത്തിൽ ഇന്ത്യയ്‌ക്കെതിരെ പ്രതിഷേധ പ്രകടനങ്ങള്‍ നടത്തിയ പ്രവാസികളെ കഴിഞ്ഞ ദിവസം അറസ്റ്റ് ചെയ്തിരുന്നു. എന്നാൽ കുവൈത്തിൽ പ്രകടനം നടത്തിയ പ്രവാസികളിൽ ഇന്ത്യക്കാരുമുണ്ടെന്ന് സൂചന.

പ്രതിഷേധ പ്രകടനം നടത്തിയവരെ നാട് കടത്തുമെന്ന് കുവൈത്ത് ആഭ്യന്തര മന്ത്രാലയം കഴിഞ്ഞ ദിവസം പ്രഖ്യാപിച്ചിരുന്നു. ഈ കൂട്ടത്തിൽ ഇന്ത്യക്കാരും ഉണ്ടെന്നാണ് ഇപ്പോൾ പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. ഇവർക്ക് ഇനിമേൽ കുവൈത്തിലേക്ക് പ്രവേശിക്കുന്നതിനും വിലക്കേർപ്പെടുത്തുമെന്നാണ് വിവരം.

കുവൈറ്റിലെ നിയമമനുസരിച്ച്‌ പ്രവാസികള്‍ക്ക് സമരങ്ങളോ പ്രകടനങ്ങളോ നടത്താന്‍ അനുമതിയില്ല. പ്രകടനത്തില്‍ പങ്കെടുത്തവരെ അറസ്റ്റ് ചെയ്യുകയും അവരെ നാട് കടത്തുവാനുള്ള നപടിക്രമങ്ങള്‍ ആരംഭിക്കുകയും ചെയതിട്ടുണ്ട്. രാജ്യത്തിന്റെ നിയമം പരസ്യമായി ലംഘിച്ചവര്‍ക്കെതിരെ നടപടി എടുക്കാന്‍ ആഭ്യന്തര മന്ത്രാലയം നേരത്തെ ഉത്തരവിട്ടിരുന്നു..

ഫാഹേല്‍ ഏരിയയിലായിരുന്നു പ്രതിഷേധ പരിപാടി സംഘടിപ്പിച്ചത്. പ്രകടനത്തിന്റെ ഭാഗമായ എല്ലാ പ്രവാസികളെയും അറസ്റ്റ് ചെയ്ത് നാട് കടത്താൻ തന്നെയാണ് കുവൈത്തിന്റെ തീരുമാനം. പ്രതിഷേധിച്ചവരെ നാട് കടത്തുമെന്നുള്ള വാർത്തകൾ ഇന്നലെ തന്നെ വന്നിരുന്നെങ്കിലും പ്രതിഷേധിച്ചവരുടെ കൂട്ടത്തിൽ ഇന്ത്യക്കാരുണ്ടായിരുന്നോ എന്ന കാര്യത്തിൽ വ്യക്തതയില്ലായിരുന്നു.

പ്രവാസികൾക്കായുള്ള തൊഴിൽ നിയമങ്ങൾ ഉൾപ്പെടെയുള്ള എല്ലാ നിയമങ്ങളും കർശനമായി പാലിക്കുന്ന ഗൾഫ് രാജ്യമാണ് കുവൈത്ത്. ഇവിടം ആസ്ഥാനമായി പ്രവർത്തിക്കുന്ന ഒരു ഇന്ത്യൻ പത്രപ്രവർത്തകനാണ് ഇത് സംബന്ധിച്ച വിവരം പുറത്തുവിട്ടത്.

പരിപാടിയില്‍ നിരവധി പ്രവാസികള്‍ പങ്കെടുത്തതായാണ് റിപ്പോര്‍ട്ട്. നിയമലംഘനം എന്ന ഗുരുതരമായ കുറ്റം ആരോപിച്ചാണ് ധര്‍ണയില്‍ പങ്കെടുത്ത പ്രവാസികള്‍ക്കെതിരെ അധികൃതര്‍ നടപടിയെടുക്കുന്നത്. ഇവരെ രാജ്യത്ത് നിന്നും പുറത്താക്കിക്കൊണ്ട് കുറ്റവാളികള്‍ക്കെതിരെ മാതൃകാപരമായ ശിക്ഷ ഉറപ്പാക്കുകയാണ് അധികൃതരുടെ ലക്ഷ്യം. സ്വദേശികള്‍ സംഘടിപ്പിക്കുന്നത് ഉള്‍പ്പെടെയുള്ള സമരങ്ങളിലും പ്രതിഷേധ പരിപാടികളിലും പങ്കെടുക്കുന്ന പ്രവാസികളെ ഇതേ നടപടികളാണ് കാത്തിരിക്കുന്നതെന്നും അധികൃതര്‍ മുന്നറിയിപ്പ് നല്‍കി.