യുഎഇയിൽ ശക്തമായ പൊടിക്കാറ്റ്, ദുബായ് രാജ്യാന്തര വിമാനത്താവളത്തിലെ 10 വിമാന സര്വ്വീസുകള് വഴി തിരിച്ചുവിട്ടു, മൂന്ന് എമിറേറ്റുകളില് കനത്ത മഴയെ തുടർന്ന് പ്രളയ സാധ്യത മുന്നറിയിപ്പ്, ജനങ്ങള് അതീവ ജാഗ്രത പുലര്ത്തണമെന്ന് അധികൃതര്
യുഎഇയുടെ വിവിധ ഭാഗങ്ങളില് അനുഭവപ്പെട്ട ശക്തമായ പൊടിക്കാറ്റ് ദുബൈ അന്താരാഷ്ട്ര വിമാനത്താവളത്തിലെ സര്വീസുകളെയും പ്രതികൂലമായി ബാധിച്ചു. ദുബായ് രാജ്യാന്തര വിമാനത്താവളത്തിലെ വിമാന സര്വ്വീസുകള് വഴി തിരിച്ചുവിട്ടു. പ്രതികൂല കാലാവസ്ഥ ഞായറാഴ്ച ഉച്ചയ്ക്ക് ശേഷമുള്ള ചില സര്വീസുകളെ ബാധിച്ചതായി വിമാനത്താവള അധികൃതര് അറിയിച്ചു.
ദുബായ് രാജ്യാന്ത വിമാനത്താവളത്തില് വരേണ്ടിയിരുന്ന 10 വിമാനങ്ങളാണ് വഴി തിരിച്ചത്. ദുബായ് വേള്ഡ് സെന്ററിലേക്കും സമീപത്തെ മറ്റ് വിമാനത്താവളങ്ങളിലേക്കുമാണ് വഴി തിരിച്ചുവിട്ടതെന്ന് അധികൃതര് അറിയിച്ചു.ദുബൈയിലും അബുദാബിയിലും അതിശക്തമായ പൊടിക്കാറ്റാണ് ഞായറാഴ്ച മുഴുവന് അനുഭവപ്പെട്ടത്. പുലര്ച്ചെ മുതല് കനത്ത പൊടിക്കാറ്റ് വീശുന്നുണ്ടായിരുന്നു.
ദുബൈ അന്താരാഷ്ട്ര വിമാനത്താവളത്തിലെയും അബുദാബി അന്താരാഷ്ട്ര വിമാനത്താവളത്തിലെയും ദൂരക്കാഴ്ച 500 മീറ്ററില് താഴെയായി കുറഞ്ഞുവെന്ന് യുഎഇയിലെ ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. സര്വീസുകള് താളംതെറ്റുന്നത് കുറയ്ക്കാനും എത്രയും വേഗം സാധാരണ നിലയിലുള്ള പ്രവര്ത്തനം പുനഃരാരംഭിക്കുന്നതിനുമായി ബന്ധപ്പെട്ട എല്ലാവരുമായും ചേര്ന്ന് പരിശ്രമിച്ചുകൊണ്ടിരിക്കുകയാണെന്നും യാത്രക്കാര്ക്ക് നേരിട്ട ബുദ്ധിമുട്ടില് ഖേദിക്കുന്നുവെന്നും ദുബൈ അന്താരാഷ്ട്ര വിമാനത്താവളം അധികൃതര് പുറത്തിറക്കിയ പ്രസ്താവനയില് അറിയിച്ചു.
അതേസമയം മോശം കാലാവസ്ഥ കാരണം തങ്ങളുടെ ചില വിമാന സര്വീസുകള് വൈകിയതായി വിമാനക്കമ്പനിയായ ഫ്ലൈ ദുബൈ അറിയിച്ചു. സ്ഥിതിഗതികള് നിരീക്ഷിച്ചുകൊണ്ടിരിക്കുകയാണെന്നും മോശം കാലാവസ്ഥ കാരണം തങ്ങളുടെ ഉപഭോക്താക്കള് നേരിടേണ്ടി വന്നേക്കുന്ന ബുദ്ധിമുട്ടുകള്ക്ക് ക്ഷമ ചോദിക്കുന്നുവെന്നും ഫ്ലൈ ദുബൈ വക്താവ് പറഞ്ഞു.
കനത്ത പൊടിക്കാറ്റ് മൂലം കാഴ്ചാപരിധി 500 മീറ്ററില് താഴെയായി. വാഹനമോടിക്കുന്നവര് ജാഗ്രത പുലര്ത്തണമെന്ന് അധികൃതര് അഭ്യര്ത്ഥിച്ചു. ജനങ്ങള് വീടിന് പുറത്തിറങ്ങുന്നത് ഒഴിവാക്കണമെന്നും അധികൃതര് ആവശ്യപ്പെട്ടു. അസ്ഥിര കാലാവസ്ഥയെ തുടരുന്ന സാഹചര്യത്തിൽ യുഎഇയില് ദേശീയ കാലാവസ്ഥാ നിരീക്ഷണ കേന്ദ്രം റെഡ് അലേര്ട്ട് പ്രഖ്യാപിച്ചിരുന്നു.
മൂന്ന് എമിറേറ്റുകളില് കനത്ത മഴ അനുഭവപ്പെടുന്ന സാഹചര്യത്തില് പ്രളയ സാധ്യത മുന്നറിയിപ്പും നല്കിയിട്ടുണ്ട്. ജനങ്ങള് അതീവ ജാഗ്രത പുലര്ത്തണമെന്നും അധികൃതര് നിര്ദ്ദേശിച്ചു. ഷാര്ജയിലും ഫുജൈറയിലും റാസല്ഖൈമയിലുമാണ് കനത്ത മഴ അനുഭവപ്പെടുന്നത്.
https://www.facebook.com/Malayalivartha
