പ്രവാസികൾ വാഹനങ്ങളിൽ സഞ്ചരിക്കുമ്പോൾ പ്രത്യേകം ജാഗ്രത പുലർത്തണം. മാത്രമല്ല യാത്ര വേളയിൽ വാഹനങ്ങളിൽ നിന്ന് മാലിന്യം വലിച്ചെറിയുന്നത് കനത്ത പിഴക്കും തുടർ നടപടികളിലേക്കും വഴിവയ്ക്കും. ഇത്തരത്തിൽ വാഹനങ്ങളിൽ നിന്ന് മാലിന്യം വലിച്ചെറിഞ്ഞ 162 ഡ്രൈവർമാർക്ക് പിഴ ചുമത്തിയതായി അബുദബി പൊലീസ് അറിയിച്ചു.

ഈ വർഷം ആദ്യ പകുതിയിലാണ് അബുദബിയിലെ വിവിധ റോഡുകളിൽ വാഹനമോടിക്കുന്നതിനിടെ ഇത്രയും പേർ പിടിയിലായത്. ഇവർക്ക് 1000 ദിർഹം പിഴയും ലൈസൻസിൽ ആറ് ബ്ലാക്ക് പോയൻറുമാണ് ചുമത്തിയത്. പൊതുജനാരോഗ്യവും പരിസ്ഥിതി സംരക്ഷണവും കണക്കിലെടുത്ത് മാലിന്യം നിർദിഷ്ട ഇടങ്ങളിൽ നിക്ഷേപിക്കണമെന്നും മാന്യമായ പെരുമാറ്റം ശീലിക്കണമെന്നും അബൂദബി പൊലീസ് വാഹന യാത്രികരോട് ആവശ്യപ്പെട്ടു.

യാത്രികർ മാലിന്യം വലിച്ചെറിയുന്നത് തടഞ്ഞില്ലെങ്കിൽ ഡ്രൈവർക്ക് പിഴ ചുമത്തും. പിഴക്ക് പുറമെ ലൈസൻസിൽ ആറ് ബ്ലാക്ക് പോയൻറും ചുമത്തും. വാഹനങ്ങളിൽനിന്ന് പൊതുനിരത്തിലേക്ക് മാലിന്യം വലിച്ചെറിയുന്നവർക്ക് 1000 ദിർഹം വരെ പിഴ ചുമത്തുമെന്ന് പൊലീസ് നേരത്തെ മുന്നറിയിപ്പ് നൽകിയിരുന്നതാണ്.

വാഹനം ഓടിക്കുമ്പോഴും പാർക്ക് ചെയ്യുമ്പോഴും കാറിലുള്ള മാലിന്യം പുറത്തേക്ക് ഇടുന്നത് വർധിച്ചിട്ടുണ്ട്.അതിനാൽ ഡ്രൈവർമാരെയും മറ്റ് റോഡ് ഉപയോക്താക്കളെയും ബോധവത്കരിക്കുന്ന ശ്രമം തുടരുമെന്നും പൊലീസ് അറിയിച്ചു. പാർക്കുകളിലും മറ്റും ഇത്തരത്തിൽ വലിച്ചെറിയുന്ന മാലിന്യക്കവറുകൾ കാണാനാവും. മാലിന്യം നിക്ഷേപിക്കാൻ വേസ്റ്റ് ബിന്നുകൾ ഉണ്ടെങ്കിലും അശ്രദ്ധമായി വലിച്ചെറിയുന്നവരുമുണ്ട്.

ഗതാഗത നിയമലംഘനങ്ങൾ കുറക്കുന്നതിൻറെ ഭാഗമായി അബൂദബി പൊലീസ് സമൂഹ മാധ്യമങ്ങളിലൂടെ നിരന്തരം ബോധവത്കരണങ്ങൾ നൽകുകയും നിരത്തുകളിൽ അത്യാധുനിക കാമറകൾ സ്ഥാപിക്കുകയും ചെയ്തിട്ടുണ്ട്. അമിത വേഗം, മുന്നറിയിപ്പില്ലാതെയുള്ള ലെയിൻ മാറ്റം, മറ്റു വാഹനങ്ങളോട് മതിയായ അകലം പാലിക്കാതിരിക്കുക തുടങ്ങിയ നിയമലംഘനങ്ങൾ ക്യാമറകൾ കണ്ടെത്തി വാഹനയുടമകൾക്ക് പിഴ ചുമത്തുകയുമാണ് ചെയ്യുന്നത്.

അതേസമയം, അബുദബി-അൽഐൻ E22 റോഡ് 21 വരെ ഭാഗികമായി അടച്ചിട്ടിരിക്കുകയാണ്. അബുദബി സിറ്റി, ബനിയാസ് പബ്ലിക് പാർക്ക്, അൽ ഘനദീർ എന്നിവിടങ്ങളിലേക്ക് പോവുന്ന വലതു വശത്തെ രണ്ടു പാതകളാണ് താൽക്കാലികമായി അടച്ചിട്ടിരിക്കുന്നത്. ഈ ഭാഗത്തുകൂടി വാഹനമോടിക്കുന്നവർ ഇക്കാര്യം ശ്രദ്ധിക്കണമെന്ന് അബൂദബി സംയോജിത ഗതാഗത വകുപ്പ് മുന്നറിയിപ്പ് നൽകിയിട്ടുണ്ട്.