പ്രവാസികൾ അറിയേണ്ട വളരെ പ്രധാനപ്പെട്ട ഒരു റിപ്പോർട്ടാണ് പുറത്തുവന്നിരിക്കുന്നത്. പ്രത്യേകിച്ച് യു.എ.ഇയിൽ തൊഴിൽ അന്വേഷിക്കുന്ന, തൊഴിൽ എടുക്കുന്ന പ്രവാസികൾ. ഗള്‍ഫ് രാജ്യങ്ങളിലെ ശരാശരി ശമ്പളം കണക്കാക്കുമ്പോള്‍ യുഎഇ ഒന്നാം സ്ഥാനത്താണ്.അറബ് ലോകത്ത് ശരാശരി ശമ്പള പട്ടികയില്‍ ഒന്നാം സ്ഥാനത്തുള്ള യുഎഇ ആഗോള അടിസ്ഥാനത്തില്‍ അഞ്ചാം സ്ഥാനത്താണ്.

ലോകത്ത് ഏറ്റവുമധികം ശരാശരി ശമ്പളം നല്‍കുന്ന ആദ്യത്തെ പത്ത് രാജ്യങ്ങളില്‍ ഉള്‍പ്പെടുന്ന ഒരേയൊരു അറബ് രാജ്യവും യുഎഇ തന്നെയാണ്. അമേരിക്കന്‍ മാഗസിനായ സിഇഒ വേള്‍ഡ് അടുത്തിടെ പുറത്തിറക്കിയ കണക്കിലാണ് ഈ വിവരമുള്ളത്.

സിഇഒ വേള്‍ഡ് പുറത്തുവിട്ട കണക്ക് പ്രകാരം യുഎഇയിലെ ശരാശരി പ്രതിമാസ ശമ്പളം 3663.27 ഡോളറാണ്. സ്വിറ്റ്സര്‍ലന്റ് ഒഴികെയുള്ള എല്ലാ യൂറോപ്യന്‍ രാജ്യങ്ങളെക്കാളും സിംഗപ്പൂര്‍ ഒഴികെയുള്ള മറ്റെല്ലാ ഏഷ്യന്‍ രാജ്യങ്ങളെക്കാളും ഉയര്‍ന്ന പ്രതിമാസ ശമ്പളമാണിത്. കണക്ക് പ്രകാരം അറബ് ലോകത്ത് രണ്ടാം സ്ഥാനത്തുള്ളത് ഖത്തറിൽ 3168.05 ഡോളറാണ് പ്രതിമാസ ശരാശരി ശമ്പളം. ആഗോള തലത്തില്‍ 11 ആണ് രാജ്യത്തിന്റെ സ്ഥാനം.

മൂന്നാം സ്ഥാനത്തുള്ളത് സൗദി അറേബ്യയാണ്. ആഗോള അടിസ്ഥാനത്തില്‍ കണക്കെടുക്കുമ്പോള്‍ 25-ാം സ്ഥാനത്തുള്ള സൗദി അറേബ്യയില്‍ പ്രതിമാസ ശരാശരി ശമ്പളം 1888.68 ഡോളറാണ്. കുവൈത്താണ് നാലാം സ്ഥാനത്തുള്ളത്. 1854.45 ഡോളറാണ് ശരാശരി ശമ്പളം. ആഗോള അടിസ്ഥാനത്തിലെ കണക്കില്‍ കുവൈത്ത് 26-ാം സ്ഥാനത്താണ്. പട്ടികയില്‍ അഞ്ചാം സ്ഥാനമുള്ള ബഹ്റൈനിലെ ശരാശരി ശമ്പളമാവട്ടെ 1728.74 ഡോളറും.

കുവൈത്തിന് പിന്നില്‍ 28-ാമതാണ് ആഗോള അടിസ്ഥാനത്തില്‍ ബഹ്റൈനിന്റെ സ്ഥാനം. ജിസിസി രാജ്യങ്ങളിലെ പ്രതിമാസ ശരാശരി ശമ്പളം കണക്കാക്കുമ്പോള്‍ ആറാം സ്ഥാനത്ത് ഒമാനാണ്. 1626.64 ഡോളര്‍ പ്രതിമാസ ശരാശരി ശമ്പളമുള്ള ഒമാന്‍ പട്ടികയില്‍ ആഗോള അടിസ്ഥാനത്തില്‍ 30-ാം സ്ഥാനത്താണ്. ആഗോള അടിസ്ഥാനത്തിലെ കണക്കില്‍ നൂറാം സ്ഥാനത്തുള്ള ഈജിപ്‍താണ് അറബ് രാജ്യങ്ങളില്‍ ഏറ്റവും കുറവ് ശരാശരി ശമ്പളമുള്ള രാജ്യം. 219.73 ആണ് ബഹ്റൈനിലെ ശമ്പളം. അറബ് രാജ്യങ്ങളുടെ പട്ടികയില്‍ അല്‍ജീരിയ (98), തുനീഷ്യ (96) എന്നിവയാണ് ഈജിപ്തിന് തൊട്ട് മുകളിലുള്ള രാജ്യങ്ങള്‍.