നിയമങ്ങളിൽ മാറ്റം വരുന്നതിനനുസരിച്ച് പൊതുജനങ്ങൾക്ക് പ്രത്യേക മുന്നറിയിപ്പുമായി അബുദബി പൊലീസ് രംഗത്തെത്താറുണ്ട്. ട്രാഫിക്ക് നിയമങ്ങളുമായി ബന്ധപ്പെട്ടും മറ്റും അടുത്തിടെയായി ജനങ്ങൾക്ക് പ്രത്യേക മുന്നറിയിപ്പുകൾ നൽകിവരികയാണ്. ഇപ്പോഴിത കുട്ടികളെ കാറുകളില്‍ ഇരുത്തിയിട്ട് പോയാൽ ലക്ഷങ്ങൾ പിഴയിനത്തിൽ അടയ്ക്കേണ്ടതായി വരുമെന്ന് മുന്നറിയിപ്പ് നൽകിയിരിക്കുകയാണ് അബുദബി പൊലീസ്.

ഇത്തരത്തിൽ വാഹനങ്ങളിൽ കുട്ടികളെ തനിച്ചാക്കി പോകുന്നവർക്ക് 5000 ദിര്‍ഹം അതായത് 1,08,798 രൂപ പിഴ ഈടാക്കും. ഇത്തരം സംഭവങ്ങളിലൂടെ കുട്ടികള്‍ക്ക് പരിക്ക് പറ്റാനും മരണം വരെ സംഭവിക്കാനും സാധ്യതയുള്ളതിനാലാണ് അബുദബി പൊലീസ് കര്‍ശന നടപടി എടുക്കുന്നത്.

വേനല്‍ക്കാലത്ത് കുട്ടികളെ വാഹനങ്ങളില്‍ ശ്രദ്ധിക്കാതെ വിടുന്നത് അപകടകരമാണെന്നും കുട്ടികളുടെ അവകാശങ്ങള്‍ സംബന്ധിച്ച യു.എ.ഇയിലെ നിയമപ്രകാരം ശിക്ഷാര്‍ഹമാണെന്നും ദേശീയ വാര്‍ത്താ ബുള്ളറ്റിനിടെ, അബുദബി പോലീസ് ട്രാഫിക് ആന്‍ഡ് പട്രോള്‍സ് ഡയറക്ടറേറ്റ് ഡയറക്ടര്‍ ക്യാപ്റ്റന്‍ മുഹമ്മദ് ഹമദ് അല്‍ ഇസൈ പറഞ്ഞു.

'ഏത് പ്രായത്തിലുള്ള കുട്ടികളെയും വാഹനത്തില്‍ ആരും ശ്രദ്ധിക്കാതെ വിടരുത്. മിനിറ്റുകള്‍ക്കുള്ളില്‍ ശ്വാസംമുട്ടി മരിക്കാന്‍ മാത്രമല്ല, ട്രാന്‍സ്മിഷനും കണ്‍ട്രോളുകളും ഉപയോഗിച്ച്‌ വാഹനം പാര്‍ക്ക് ചെയ്ത അവസ്ഥയില്‍ നിന്ന് നീക്കാനും അവര്‍ക്ക് കഴിയും'-ക്യാപ്റ്റന്‍ അല്‍ ഇസൈ പറഞ്ഞു. യു.എ.ഇയിലെ താപനില 48 ഡിഗ്രി സെല്‍ഷ്യസിലേക്ക് ഉയരുകയാണ്. കടുത്ത വേനലുള്ള സമയത്ത് കുട്ടികളെ വാഹനങ്ങളില്‍ ഉപേക്ഷിക്കുന്നത് ഏറെ അപകടകരമാണ്.

'കുട്ടിയെ ശ്രദ്ധിക്കാതെ വാഹനത്തില്‍ ഉപേക്ഷിക്കുന്ന രക്ഷിതാവിന് കുറഞ്ഞത് 5,000 ദിര്‍ഹം പിഴ ചുമത്തും. ഇതോടൊപ്പം ജയില്‍ ശിക്ഷയും അനുഭവിക്കേണ്ടിവരും. കുട്ടിയെ ശ്രദ്ധിക്കാതെ വാഹനത്തില്‍ ഉപേക്ഷിച്ച്‌ കുഞ്ഞ് മരിച്ച നിരവധി സംഭവങ്ങള്‍ യു.എ.ഇയില്‍ റിപ്പോര്‍ട്ട് ചെയ്തിട്ടുണ്ട്'-അദ്ദേഹം കൂട്ടിച്ചേര്‍ത്തു. എമറാത്ത് ടിവിക്ക് നല്‍കിയ അഭിമുഖത്തിലാണ് അദ്ദേഹം ഇക്കാര്യത്തില്‍ വ്യക്തത വരുത്തിയത്.

ഫോണ്‍ കോളില്‍ മുഴുകി കുഞ്ഞിനെ കാറില്‍ മറന്നുപോയ പിതാവിന്റെ സംഭവം ഒരു സംവിധായകന്‍ തന്നോട് പങ്കുവെച്ചിട്ടുണ്ടെന്നും അല്‍ ഇസൈ വെളിപ്പെടുത്തി. കുഞ്ഞിനെ കാറിലിരുത്തി എയര്‍ കണ്ടീഷന്‍ ഓഫാക്കിയ ശേഷമാണ് അദ്ദേഹം പുറത്തിറങ്ങി ഫോണില്‍ സംസാരിച്ചത്. ഏറെ നേരമായിട്ടും പിതാവ് കാര്‍ തുറക്കാതായതോടെ കുഞ്ഞ് മരിച്ചിരുന്നു. ഈ സംഭവത്തെ എല്ലാവരും ഒരു മുന്നറിയിപ്പായി എടുക്കണമെന്നും അദ്ദേഹം വ്യക്തമാക്കി.കുട്ടികളെ വാഹനത്തില്‍ തനിച്ചാക്കിപ്പോകുന്നതിനെതിരെ നേരത്തേ അജ്മാന്‍ പൊലീസും മുന്നറിയിപ്പ് നല്‍കിയിരുന്നു.