സൗദിയില് സംസ്കരിച്ച പ്രവാസിയുടെ മൃതദേഹം പുറത്തെടുത്തു, നടപടി മൃതദേഹം നാട്ടിലെത്തിച്ച് ആചാരപ്രകാരം സംസ്കരിക്കണമെന്ന ബന്ധുക്കളുടെ ആവശ്യപ്രകാരം, മോര്ച്ചറിയില് സൂക്ഷിച്ചിരിക്കുന്ന മൃതദേഹാവശിഷ്ടങ്ങള് നടപടികള് പൂര്ത്തിയാക്കി ഉടന് നാട്ടിലെത്തിക്കും
സൗദിയില് രണ്ടുമാസം മുമ്പ് സംസ്കരിച്ച പ്രവാസിയുടെ മൃതദേഹം ബന്ധുക്കളുടെ ആവശ്യപ്രകാരം പുറത്തെടുത്തു. മധ്യപ്രവിശ്യയിലെ ശഖ്റയില് അടക്കം ചെയ്ത മധുര തോപ്പുലംപട്ടി സ്വദേശി ആണ്ടിച്ചാമി പളനിസാമിയുടെ (42) മൃതദേഹമാണ് പുറത്തെടുത്തത്. നാട്ടിലെത്തിച്ച് ആചാരപ്രകാരം സംസ്കരിക്കണമെന്ന ബന്ധുക്കളുടെ ആവശ്യപ്രകാരമായിരുന്നു നടപടി. റിയാദ് കെ.എം.സി.സി മലപ്പുറം ജില്ല വെല്ഫയര് വിങ് പ്രവര്ത്തകരാണ് മൃതദേഹം പുറത്തെടുത്ത് നാട്ടിലെത്തിക്കാന് മുന്നിട്ടിറങ്ങിയത്.
ഇന്ത്യന് എംബസി, ഗവര്ണറേറ്റ്, ബലദിയ, പൊലീസ്, ആശുപത്രി എന്നിവടങ്ങളിലെ ഉദ്യോഗസ്ഥരുടെ സാന്നിധ്യത്തില് ശനിയാഴ്ച വൈകീട്ടാണ് മൃതദേഹം പുറത്തെടുത്തത്. മൃതദേഹം നാട്ടിലെത്തിക്കുന്നതിനുള്ള നടപടികളുമായി കെ.എം.സി.സി വെല്ഫയര് വിങ് പ്രവര്ത്തകര് മുന്നോട്ട് പോകുന്നതിനിടെ ജൂണ് 16ന് ശഖ്റയില് അടക്കം ചെയ്യുകയായിരുന്നു. നാട്ടില് കൊണ്ടുപോകുന്നതിനുള്ള എന്.ഒ.സി ഇന്ത്യന് എംബസി ഇഷ്യു ചെയ്യുകയും ചെയ്തിരുന്നു. അതിനിടെയാണ് അടക്കം നടന്നത്.
തുടര്ന്ന് മൃതദേഹം നാട്ടിലെത്തിക്കണമെന്ന് ബന്ധുക്കള് ഇന്ത്യന് എംബസിയോട് ആവശ്യപ്പെട്ടു. തുടര്ന്ന് എംബസി ഈ വിഷയം കെ.എം.സി.സി വെല്ഫയര് വിങ്ങിനെ ഏല്പ്പിച്ചു. അവര് റിയാദ് ഗവര്ണറേറ്റ്, റിയാദ് പൊലീസ്, മജ്മഅ, ശഖ്റ എന്നിവിടങ്ങളിലെ പൊലീസ്, ആശുപത്രി അധികൃതര്, മജ്മഅ ഗവര്ണറേറ്റ്, ബലദിയ എന്നിവയുമായി ബന്ധപ്പെട്ടാണ് മൃതദേഹം പുറത്തെടുക്കാനുള്ള അനുമതി നേടിയത്.
ശുമൈസി ഫോറന്സിക് ഡിപ്പാര്ട്ടുമെന്റിലെ അഞ്ച് ഉദ്യോഗസ്ഥര്, എംബസി ഡത്ത് സെക്ഷന് ഉദ്യോഗസ്ഥന്, ശഖ്റയിലെ പൊലീസ് ഉദ്യോഗസ്ഥര്, ബലദിയ ഉദ്യോഗസ്ഥര്, റിയാദ് ഇന്ത്യന് എംബസി കമ്യൂണിറ്റി വെല്ഫെയര് വളന്റിയറും കെ.എം.സി.സി വെല്ഫെയര് വിങ് ചെയര്മാന് റഫീഖ് പുല്ലൂര്, വൈസ് ചെയര്മാന് റഫീഖ് ചെറുമുക്ക്, വിങ് മീഡിയ ചെയര്മാന് സലീം സിയാംകണ്ടം, ഇസ്ഹാഖ് താനൂര് എന്നിവരുടെ നേത്വത്തിലാണ് മൃതദേഹം പുറത്തെടുത്ത് റിയാദില് എത്തിച്ചത്.
നാട്ടില് കൊണ്ടുപോയി ആചാരപ്രകാരം സംസ്കരിക്കുന്നതിന് സൗദിയില് ഇങ്ങനെ പുറത്തെടുക്കുന്ന രണ്ടാമത്തെ ഇന്ത്യക്കാരന്റെ മൃതദേഹമാണ് ഇത്. ശുമൈസി മോര്ച്ചറിയില് സൂക്ഷിച്ചിരിക്കുന്ന മൃതദേഹാവശിഷ്ടങ്ങള് നടപടികള് പൂര്ത്തിയാക്കി ഉടന് നാട്ടിലെത്തിക്കും. സ്വകാര്യ കമ്പനിയില് ജോലി ചെയ്തിരുന്ന ആണ്ടിച്ചാമിയെ ഈ വര്ഷം മെയ് 19നാണ് താമസസ്ഥലത്ത് മരിച്ചുകിടക്കുന്ന നിലയില് കണ്ടത്.
https://www.facebook.com/Malayalivartha
