പ്രവാസി ദമ്പതികൾ മരിച്ചനിലയിൽ, ഒമാനിലെ താമസസ്ഥലത്ത് മരിച്ചനിലയിൽ കണ്ടെത്തിയത് തിരുവനന്തപുരം സ്വദേശികളെ
ഒമാൻ തലസ്ഥാനമായ മസ്കറ്റിലെ റൂവിയിൽ താമസസ്ഥലത്ത് പ്രവാസി ദമ്പതികളെ മരിച്ചനിലയിൽ കണ്ടെത്തി. തിരുവനന്തപുരം കിളിമാനൂർ സ്വദേശികളായ ദമ്പതികളെയാണ് റൂവി അല് ഫലാജ് ഹോട്ടലിന് അടുത്തുള്ള അപ്പാര്ട്ട്മെന്റിൽ മരിച്ചനിലയിൽ കണ്ടെത്തിയത്.
വിളക്കാട്ടുകോണം തോപ്പിൽ അബ്ദുൽ മനാഫ്, ഭാര്യ അലീമ ബീവി എന്നിവരാണ് മരിച്ചത്. മനാഫ് ജോലി ചെയ്തിരുന്ന കമ്പനിയുടെ നേതൃത്വത്തിൽ മൃതദേഹങ്ങൾ നാട്ടിലേക്ക് അയക്കാനുള്ള ശ്രമങ്ങൾ നടന്നുവരികയാണ്.
അതേസമയം, ഒമാനില് ബസ് യാത്രക്കിടെ പ്രവാസിയായ കുഴഞ്ഞുവീണ് മരിച്ചു. കണ്ണൂര് ചെമ്പിലോട് മൗവ്വഞ്ചേരി സ്വദേശി കൊല്ലന്ചാലില് മഹ്മൂദ് (57) ആണ് മരിച്ചത്. മിസ്ഫയില് ഹോട്ടല് ജീവനക്കാരനായിരുന്നു. ഗോബ്രയില് നിന്ന് മസ്കത്തിലേക്ക് വരാനായി മുവാസലാത്ത് ബസില് കയറിയ ഉടന് കുഴഞ്ഞുവീണാണ് മരണം സംഭവിച്ചത്.
നേരത്തേ കുറേക്കാലം ഒമാനില് ജോലി ചെയ്തിരുന്നു. പ്രവാസം നിര്ത്തി മടങ്ങിയശേഷം മൂന്ന് മാസം മുമ്പാണ് വീണ്ടും ഇവിടേക്ക് എത്തിയത്. നടപടിക്രമങ്ങള് പൂര്ത്തിയാക്കി മൃതദേഹം നാട്ടിലേക്ക് കൊണ്ടുപോകും. ഭാര്യ ഹസീന. മക്കള്: മുബീന, ഫാതിമത്ത് നഹല, ഹിബ ഫാത്തിമ.
https://www.facebook.com/Malayalivartha
