ദുബൈ ഡ്രൈവിങ് ലൈസൻസിന് അപേക്ഷിക്കുന്നവരുടെ എണ്ണം ഒരോ വർഷം കഴിയുമ്പോഴും ഉയരുകയാണ്. ഈ വർഷം 18 ശതമാനം വർധനവാണ് റിപ്പോർട്ട് ചെയ്തിരിക്കുന്നത്. ആദ്യപാദം 54,887 അപേക്ഷകൾ ലഭിച്ചെന്ന് ആർ.ടി.എ ഡ്രൈവിങ് ലൈസൻസ് വിഭാഗം മേധാവി അഹമ്മദ് മഹ്ബൂബ് അറിയിച്ചു. ഓരോ വർഷവും ക്രമാനുഗത വർധന രേഖപ്പെടുത്തുന്നു.

ഇനി ഡ്രൈവിങ് ലൈസൻസിന്റെ കാലാവധി കഴിഞ്ഞാൽ അത് പുതുക്കാൻ ഒട്ടും പ്രയാസമില്ല. ഇതിനായി ദുബൈ വിമാനത്താവളത്തിലും സൗകര്യമൊരുക്കുന്നു. ദുബൈ റോഡ് ട്രാൻസ്പോർട്ട് അതോറിറ്റിയാണ് ഇക്കാര്യം അറിയിച്ചത്. വിമാനത്താവളത്തിന്റെ ടെർമിനൽ ഒന്നിലാണ് ലൈസൻസ് പുതുക്കാൻ സംവിധാനം ഒരുക്കുക.

ദുബൈ അന്താരാഷ്ട്ര വിമാനത്താവളത്തിന്റെ ടെർമിനൽ ഒന്നിൽ ഡിപാർട്ടർചർ കോണ്കോഴ്സിന് സമീപത്താകും ലൈസൻസ് പുതുക്കാനുള്ള സൗകര്യം നിലവിൽ വരിക. അടുത്തമാസങ്ങളിൽ വിമാനയാത്രക്ക് തൊട്ടുമുമ്പ് ലൈസൻസ് പുതുക്കാനുള്ള നടപടികൾ പൂർത്തിയാക്കാൻ യാത്രക്കാർക്ക് സൗകര്യമുണ്ടാകും. ലൈസൻസ് പുതുക്കാൻ ആദ്യം നേത്ര പരിശോധന പൂർത്തിയാക്കേണ്ടതുണ്ട്.

വിവിധ സ്വകാര്യ ഒപ്ടിക്കൽസുമായി സഹകരിച്ച് ഇതിനും വിമാനത്താവളത്തിൽ സൗകര്യമുണ്ടാകും. ആദ്യഘട്ടത്തിൽ രാവിലെ എട്ട് മുതൽ രാത്രി എട്ട് വരെ ലൈസൻസിങ് കേന്ദ്രം പ്രവർത്തിക്കും. അടുത്തവർഷം ഇത് 24 മണിക്കൂറാക്കും. യാത്രക്കാർക്കും വിമാനത്താവള ജീവനക്കാർക്കും ഏറെ ഉപകാരപ്പെടുന്നതാണ് പുതിയ സംവിധാനം. ഉപഭോക്താക്കൾക്ക് വളരെ എളുപ്പത്തിൽ സർക്കാർ സേവനങ്ങൾ എത്തിക്കുന്നതിനായാണ് ആർ.ടി.എ സംവിധാനം ഒരുക്കുന്നതെന്ന് ആർ.ടി.എ ലൈസൻസിങ് ഏജൻസി എക്സി. ഡയറട്കർ അഹമ്മദ് മെഹ്ബൂബ് പറഞ്ഞു.

അതേസമയം ലൈസൻസിന് അപേക്ഷിക്കുന്നവരുടെ എണ്ണം മാത്രമല്ല, ഡ്രൈവിങ് പരീക്ഷയിൽ ജയിക്കുന്നവരുടെ എണ്ണത്തിലും വർധനയുണ്ട്. 2019ൽ 36% ജയിച്ചെങ്കിൽ 2020ൽ 41%, കഴിഞ്ഞവർഷം 42% എന്നിങ്ങനെയായിരുന്നു. പരിശീലനവും പരീക്ഷയും പരിശോധിക്കാൻ സ്മാർട് സംവിധാനമുണ്ട്. നിർമിത ബുദ്ധിയടക്കമുള്ള ആധുനിക സാങ്കേതിക വിദ്യകൾ പ്രയോജനപ്പെടുത്തിയാണ് നടപടി പൂർത്തിയാക്കുന്നത്.

അതേപോലെ 43 രാജ്യങ്ങളുടെ ലൈസൻസ് ദുബായ് ലൈസൻസാക്കി മാറ്റാനാകും. ഉം റമൂൽ, അൽ തവാർ, ദെയ്റ, ബർഷ, അൽ മനാറ, അൽ കഫാഫ്, ഹത്ത ആർടിഎ ഹാപ്പിനസ് കേന്ദ്രങ്ങളിൽ ഇതിനു സൗകര്യമുണ്ട്. വിസ, പാസ്പോർട്ട്, ഡ്രൈവിങ് ലൈസൻസ്, പകർപ്പ് എന്നിവ അപേക്ഷയോടൊപ്പം ഹാജരാക്കുകയും ലൈസൻസ് വിശദാംശങ്ങൾ അറബിക്കിലോ ഇംഗ്ലീഷിലോ നൽകുകയും വേണം. യുഎഇ തിരിച്ചറിയൽ കാർഡ്, നേത്രപരിശോധനാ ഫലം എന്നിവയും ആവശ്യമാണ്. അപേക്ഷകൻ നേരിട്ട് വരികയോ രേഖകൾ സഹിതം പ്രതിനിധികളെ അയയ്ക്കുകയോ വേണം.