വാഹനമുടമകൾക്ക് ആശ്വാസമേകിയാണ് തുടർച്ചയായ രണ്ടാംമാസവും യുഎഇയിൽ ഇന്ധനവില കുറച്ചത്. സെപ്റ്റംബർ മാസത്തെ പെട്രോൾ, ഡീസൽ വിലയാണ് ഇപ്പോൾ പ്രാബല്യത്തിൽ വന്നത്. കുത്തനെ കൂടിയ ശേഷം ഇത് തുടർച്ചയായ രണ്ടാമത്തെ മാസമാണ് ഇന്ധന വില കുറയുന്നത്. യുഎഇയില്‍ ഇന്ധനവിലയിലുണ്ടായ ഇടിവിന് പിന്നാലെ ടാക്‌സി നിരക്ക് കുറച്ച് അജ്മാന്‍.

ടാക്‌സി നിരക്കില്‍ ആറ് ശതമാനത്തിന്റെ കുറവാണ് വരുത്തിയത്. ആഗോള നിരക്കിന് അനുസൃതമായി സെപ്റ്റംബര്‍ മാസത്തെ ഇന്ധന വിലയില്‍ ലിറ്ററിന് 62 ഫില്‍സ് ആയി കുറച്ചിരുന്നു. നിരക്ക് വര്‍ധിപ്പിക്കാതെ ഉപയോക്താക്കള്‍ക്ക് നല്‍കുന്ന സേവനങ്ങള്‍ മെച്ചപ്പെടുത്താന്‍ ലക്ഷ്യമിട്ടാണ് അജ്മാന്‍ പബ്ലിക് ട്രാന്‍സ്‌പോര്‍ട്ട് അതോറിറ്റിയുടെ നീക്കം.

ടാക്‌സി മേഖലയ്ക്ക് അതോറിറ്റി നല്‍കുന്ന സേവനങ്ങളുടെ നിലവാരം ഉയര്‍ത്തുന്ന സ്മാര്‍ട്ട് മീറ്റര്‍ സംവിധാനത്തില്‍ താരിഫിലെ ഈ മാറ്റം സ്വയം അപ്‌ഡേറ്റ് ചെയ്യുമെന്നും അജ്മാന്‍ പബ്ലിക് ട്രാന്‍സ്‌പോര്‍ട്ട് അതോറിറ്റിയിലെ ഉദ്യോഗസ്ഥന്‍ അറിയിച്ചു.

പെട്രോൾ ലിറ്ററിന് 62 ഫിൽസും, ഡിസൽ ലിറ്ററിന് 27 ഫിൽസുമാണ് കുറച്ചത്. 4 ദിർഹം 03 ഫിൽസ് ഉണ്ടായിരുന്ന സൂപ്പർ പെട്രോളിന്റെ വില 3 ദിർഹം 41 ഫിൽസായും, സ്പെഷ്യൽ പെട്രോളിന്റെ വില 3 ദിർഹം 92 ഫിൽസിൽ നിന്ന് 3 ദിർഹം 30 ഫിൽസായുമാണ് കുറച്ചത്. ഒപ്പം ഇപ്ലസ് പെട്രോളിന് 3 ദിർഹം 84 ഫിൽസിന് പകരം 3 ദിർഹം 22 ഫിൽസ് നൽകിയാൽ മതി.

അതേസമയം, സെപ്തംബർ മാസത്തെ ഇന്ധനവില പ്രഖ്യാപിച്ച് ഖത്തർ. ഖത്തർ എനർജിയാണ് ഇന്ധന നിരക്ക് പ്രഖ്യാപിച്ചത്. കഴിഞ്ഞ മാസത്തെ അപേക്ഷിച്ച് ഖത്തറിൽ പ്രീമിയം പെട്രോൾ വിലയിൽ വർദ്ധനവ് രേഖപ്പെടുത്തിയിട്ടുണ്ട്. പെട്രോൾ പ്രീമിയം ലിറ്ററിന് 1.95 റിയാൽ, സൂപ്പർ ലിറ്ററിന് 2.10 റിയാൽ, ഡീസൽ ലിറ്ററിന് വില 2.05 റിയാൽ എന്നിങ്ങനെയാണ് സെപ്തംബർ മാസത്തെ നിരക്കെന്ന് ഖത്തർ എനർജി അറിയിച്ചു.

ഓഗസ്റ്റ് മാസം പെട്രോൾ പ്രീമിയം ലിറ്ററിന് 1.90 റിയാലായിരുന്നു നിരക്ക്. ജൂൺ, ജൂലൈ മാസങ്ങളിൽ പ്രീമിയം പെട്രോളിന്റെ നിരക്ക് കുറച്ചിരുന്നു. 5 ദിർഹം വീതമാണ് നിരക്ക് കുറഞ്ഞത്. എന്നാൽ സൂപ്പർ ഗ്രേഡ് പെട്രോളിയത്തിന്റെയും ഡീസലിന്റെയും നിരക്ക് 2021 നവംബർ മുതൽ ഇതുവരെയും മാറ്റമില്ലാതെ തുടരുകയാണ്.