യു.എഇയിലെ പ്രവാസികൾക്ക് വളരെ ഉപകാരപ്പെടുന്ന തീരുമാനം എടുത്തിരിക്കുകയാണ് റോഡ്സ് ആൻഡ് ട്രാൻസ്പോർട്ട് അതോറിറ്റി. യാത്രക്കാർക്ക് സൗകര്യപ്രദമാകുന്ന തരത്തിൽ അബുദാബി വിമാനത്താവളത്തിൽ നിന്ന് ദുബൈയിലേക്ക് പുതിയ ബസ് സർവീസ് ആരംഭിക്കുന്നു. ആദ്യഘട്ടത്തിൽ വിസ് എയർ വിമാനത്തിലെ യാത്രക്കാർക്കായാണ് ബസ് സൗകര്യം ഏർപ്പെടുത്തുന്നത്.

അടുത്തഘട്ടത്തിൽ മറ്റ് വിമാനങ്ങളിലെ യാത്രക്കാർക്കും ഇത് പ്രയോജനപ്പെടുത്താം. അബുദാബി വിമാനത്താവളത്തിന്റെ ഒന്ന്, രണ്ട്, മൂന്ന് ടെർമിനലുകളിൽ നിന്ന് ദുബൈ ജബൽഅലിയിലെ ഇബ് നുബത്തൂത്ത ബസ് സ്റ്റേഷനിലേക്കാണ് പുതിയ സർവീസ് ഏർപ്പെടുത്തുന്നത്. ഇതിനായി 'കാപിറ്റൽ എക്സ്പ്രസു'മായി ദുബൈ ആർ.ടി.എ കരാർ ഒപ്പിട്ടു.

യാത്രക്കാരെ കൊണ്ടുപോകാനും കൊണ്ടുവരാനും കാപിറ്റൽ എക്സ്പ്രസ് സൗകര്യം ഏർപ്പെടുത്തും. ഇബ്ൻ ബത്തൂത്ത മാൾ കേന്ദ്രീകരിച്ചാണ് സേവനം. ബസ് ചാർജ് വിമാന ടിക്കറ്റ് നിരക്കിൽ ഉൾപ്പെടും. യാത്രക്കാരുടെ ലഗേജ് വയ്ക്കാനുള്ള സൗകര്യവും എക്സ്പ്രസ് ബസുകളിൽ ഉണ്ടായിരിക്കും.

സേവനം സുഗമമാക്കുന്നതിന് ആവശ്യമായ പാർക്കിങ് സ്ഥലങ്ങളും അടിസ്ഥാന സൗകര്യങ്ങളും ആർടിഎ ഒരുക്കും.സ്‌റ്റേഷനിലെ എല്ലാ യാത്രക്കാരുടെയും സുരക്ഷ ഉറപ്പാക്കുന്നതിനായി ഇബ്‌ൻ ബത്തൂത്ത ബസ് സ്റ്റേഷനിലെ സേവനത്തിന് ആർടിഎ മേൽനോട്ടം വഹിക്കും.

സുഗമമായ യാത്ര ഉറപ്പുവരുത്തുന്നതിന് നിരീക്ഷണം ശക്തമാക്കും. ദുബായ്-അബുദാബി ഗതാഗതം മെച്ചപ്പെടുത്തുന്നതിനൊപ്പം പൊതു-സ്വകാര്യ പങ്കാളിത്തം ശക്തിപ്പെടുത്താനും പുതിയ സേവനം ഉപകരിക്കുമെന്ന് ആർടിഎ പബ്ലിക് ട്രാൻസ്പോർട്ട് ഏജൻസി സിഇഒ അഹമ്മദ് ഹാഷിം ബഹ്റൂസിയാൻ പറഞ്ഞു.

ഇരു എമിറേറ്റുകളിലും എത്തുന്ന വിനോദസഞ്ചാരികളെ ദുബായിലേക്കും അബുദാബിയിലേക്കും ആകർഷിക്കാനും പുതിയ സേവനം വഴിവയ്ക്കുമെന്നു ക്യാപ്പിറ്റൽ എക്സ്പ്രസ് ഫോർ റാപ്പിഡ് ഇന്റർസിറ്റി സിഇഒ ഇയാദ് ഇഷാഖ് അൽ അൻസാരി പറഞ്ഞു.