നല്ല നാളേകളുടെ ഓര്‍മ്മകളുമായി പ്രവാസി സമൂഹവും ഇന്ന് തിരുവോണം ആഘോഷിക്കുന്നതിന്റെ തിരക്കിലാണ്. ഇത്തവണ ഓണം ആഘോഷിക്കാനായി നാട്ടിലേക്ക് പോയ പ്രവാസി കുടുബങ്ങളുടെ എണ്ണം താരതമേന്യ കുറവാണ്. വേനല്‍ അവധി കഴിഞ്ഞ് കുടുംബങ്ങള്‍ നാട്ടില്‍നിന്നും മടങ്ങി എത്തിയിട്ട് ആഴ്ചകളെ ആയിട്ടുള്ളു എന്നുള്ളതും നാട്ടിലെ പ്രതികൂല കാലാവസ്ഥയുമാണ് പ്രധാന കാരണം.

കഴിഞ്ഞ രണ്ടു വര്‍ഷങ്ങളില്‍ കോവിഡ് മഹാമാരിയുടെ ഭീതിയില്‍ അടച്ചിട്ട മുറികളിലും ഫ്ലാറ്റുകളിലും ഒതുങ്ങിപ്പോയ മലയാളിയുടെ ആഘോഷം ഇത്തവണ കൂടുതല്‍ കളറണിയും. ഓണം പ്രവൃത്തി ദിവസമാണെങ്കിലും ഇന്ത്യന്‍ സ്‌കൂളുകള്‍ക്കു അവധിയായതും തൊട്ടടുത്ത ദിവസങ്ങള്‍ വാരാന്ത്യ അവധി ദിനങ്ങള്‍ ആണെന്നുള്ളത് കൂടി ആകുമ്ബോള്‍ പ്രവാസികള്‍ക്ക് ആഹ്ലാദപൂര്‍വം ഓണം ആഘോഷിക്കുവാനുള്ള അവസരമാകും.

വമ്പന്‍ ഓഫറുകളുമായി ഹൈപ്പര്‍, സൂപ്പര്‍മാര്‍ക്കറ്റുകളും വസ്ത്രശാലകളും ഓണ്‍ലൈന്‍ വ്യാപാര സംഘങ്ങളും സജീവമായതോടെ ഗള്‍ഫിലെ ഓണം കെങ്കേമമാക്കാന്‍ ആവശ്യമായതെല്ലാം പ്രവാസികള്‍ വാങ്ങിക്കൂട്ടിയിട്ടുണ്ട്. ഓണക്കോടിയും കസവുമുണ്ടും ജുബ്ബയുമെല്ലാം ഹൈപ്പര്‍മാര്‍ക്കറ്റുകളില്‍ നേരത്തേ തന്നെ ഇടംപിടിച്ചിരുന്നു.

ഹൈപ്പര്‍ മാര്‍ക്കറ്റുകളില്‍ നാട്ടിലേതിന് സമാനമായ ഓണച്ചന്തകള്‍ ക്രമീകരിച്ചിട്ടുണ്ട് . എന്നാല്‍ ഓണസദ്യക്കായി ഹോട്ടലുകളെ ആശ്രയിക്കുന്ന ആളുകളുടെ എണ്ണം വര്‍ധിച്ചു വരുന്നു എന്നതിന്റെ തെളിവാണ് ഓണസദ്യകള്‍ നല്‍കുന്ന ഹോട്ടലുകളുടെ എണ്ണത്തില്‍ ഉണ്ടായ വര്‍ധനവ് . ചെറിയ ഹോട്ടലുകള്‍ മുതല്‍ സ്റ്റാര്‍ ഹോട്ടലുകള്‍ വരെ ഓണസദ്യ ഒരുക്കിയിട്ടുണ്ട്.

ബാച്ചിലേഴ്‌സിന് പുറമെ കുടുംബങ്ങളും സദ്യക്കായി ഹോട്ടലുകളെ തന്നെ ആശ്രയിക്കുക ആണ്. ഇതിനു പുറമെ ഹൈപ്പര്‍ മാര്‍ക്കറ്റുകളും ഓണസദ്യ പാര്‍സലായി നല്‍കുന്നുണ്ട്. ഗള്‍ഫിലെ ചൂടു കുറഞ്ഞുവരുന്ന സുഖകരമായ കാലാവസ്ഥ ഓണാഘോഷങ്ങള്‍ക്ക് അനുകൂല സാഹചര്യമാകുന്നുണ്ട്. തിരുവോണ ദിവസം മലയാളികള്‍ അധികം ജോലിചെയ്യുന്ന പല കമ്പനികളും ഓണസദ്യകള്‍ സംഘടിപ്പിച്ചിട്ടുണ്ട്.