ഭാഗ്യം പരീക്ഷിക്കുന്നവരാണ് ഒട്ടുമിക്ക പ്രവാസികളും. എപ്പോഴാണോ ഭാഗ്യദേവത കടാക്ഷിക്കുന്നതെന്ന് പറയാനാകില്ലല്ലോ. കഴിഞ്ഞ ദിവസമാണ് കേരള സർക്കാറിന്റെ ഓണം ബമ്പർ നറുക്കെടുപ്പ് നടന്നതും സമ്മാനത്തുകയായ 25 കോടി നേടിയ ഭാഗ്യ ശാലിയെ കണ്ടെത്തിയത്തും. പ്രവാസികളുൾപ്പെടെ നാട്ടിൽ നിന്ന് ടിക്കറ്റെടുത്ത് നറുക്കെടുപ്പിനായുള്ള കാത്തിരിപ്പിലാായിരുന്നു. ഒടുവിലാണ് സസ്പെൻസുകൾക്ക് വിരാമമിട്ടുകൊണ്ടാണ് ഓട്ടോറിക്ഷ ഡ്രൈവറായ തിരുവനന്തപുരം ശ്രീവരാഹം സ്വദേശി അനൂപാണ് ആ 25 കോടിയുടെ ഭാഗ്യവാനെന്ന വാർത്ത പുറത്തുവന്നത്.

ഇപ്പോളിതാ അദ്ദേഹം തന്റെ പ്രാരാബ്ധങ്ങൾക്കിടയിൽ ഗൾഫിലും ജോലി തേടി എത്തിയിരുന്നു. വർഷങ്ങൾക്ക് മുൻപാണ് തന്റെ സാമ്പത്തിക പാരാധീനതകൾ കാരണം അനൂപ് ജോലിക്കായി സൗദിയിലേക്ക് പറന്നത്. എന്നാൽ അവിടെ ജോലിയൊന്നും ശരിയാകാത്തതിനാൽ അനൂപിന് നാട്ടിലേക്ക് മടങ്ങേണ്ടതായിവന്നു. സാമ്പത്തിക ബുദ്ധിമൂട്ടുകളിൽ കഴിയുമ്പോഴും വിദേശത്തുപോയാലെങ്കിലും അത് തീരുമെന്ന് അനൂപിന്റെ ആ പ്രതീക്ഷ അവിടെ അസ്തമിക്കുകയായിരുന്നു.

മലേഷ്യയിൽ ജോലിക്കായി പോകാനൊരുങ്ങുന്നതിനിടെയായിരുന്നു ഭാഗ്യദേവത അനൂപിനെ കടാക്ഷിച്ചത്. കടങ്ങൾ പെരുകിയതോടെ മലേഷ്യയിലേക്ക് ഷെഫായി പോകാനായിരുന്നു തീരുമാനം. അഞ്ചര ലക്ഷം രൂപയോളം കടം. പലരോടും കടം ചോദിച്ചു. ഭൂരിഭാഗം പേരും കൈമലർത്തി. തുടർന്ന് മുട്ടത്തറ സർവീസ് സഹകരണ ബാങ്കിൽ വായ്പയ്ക്ക് അപേക്ഷിച്ചു.

സ്വന്തമായുള്ള ഓട്ടോ വിറ്റു കിട്ടുന്ന പണവും മറ്റു ചിലരിൽ നിന്നു സ്വരൂപിക്കുന്ന തുകയും ഉപയോഗിച്ച് വിദേശത്തു പോകാൻ തയാറെടുക്കുമ്പോഴാണു 25 കോടി അടിച്ചത്. നറുക്കെടുപ്പിന്റെ തലേദിവസം അതായത് ശനിയാഴ്ച രാത്രി പഴവങ്ങാടി ഗണപതി ക്ഷേത്രത്തിന് സമീപമുള്ള തന്റെ ബന്ധുക്കളിൽ ഒരാളുടെ ലോട്ടറി സ്റ്റാളിൽ നിന്ന് അനൂപ് സ്വന്തമാക്കിയ ലോട്ടറി ടിക്കറ്റിനാണ് 25 കോടി അടിച്ചത്.

എന്നാൽ നാലു വർഷമായി ഓട്ടോ ഓടിക്കുകയായിരുന്ന അനൂപ് കോടിപതിയായതോടെ തന്റെ പ്ലാമാകെ മാറ്റിയിരിക്കുകയാണ്. ഇനിയെങ്ങോട്ടുമില്ല, ഹോട്ടൽ ബിസിനസ് നടത്തി ഭാര്യ മായയ്ക്കും മകൻ അദ്വൈതിനും മറ്റ് കുടുംബാംഗങ്ങൾക്കും ഒപ്പം നാട്ടിൽ തന്നെ കൂടാനാണ് തീരുമാനമെന്ന് അനൂപ് പറയുന്നത്. ഓട്ടോ ഓടിക്കുന്നത് നിർത്തി ഹോട്ടൽ തുടങ്ങാനാണ് പ്ലാനെന്നും പറയുന്നു.

22ാം വയസു മുതൽ ലോട്ടറി എടുക്കുന്ന ശീലമുണ്ട്. ഒരു തവണ 5000 രൂപയുടെ സമ്മാനം ലഭിച്ചിട്ടുണ്ടെന്നും അനൂപ് പറയുന്നു. അടിച്ചു ചേട്ടാ... എന്ന് ഭാര്യ പറഞ്ഞപ്പോൾ, തനിക്ക് വിശ്വസിക്കാനായില്ലെന്നായിരുന്നു അനൂപിന്റെ മറുപടി. ഭാര്യയോട് രണ്ടുതവണ പരിശോധിക്കാൻ ആവശ്യപ്പെടുകയായിരുന്നുവെന്ന് അനൂപ് പ്രതികരിച്ചിരുന്നു.