വിസിറ്റ് വിസ നിര്ത്തലാക്കാനൊരുങ്ങി ഖത്തര്, നവംബര് ഒന്ന് മുതല് വിസിറ്റ് വിസ അനുവദിക്കില്ല, ഖത്തറിന്റെ നടപടി ലോകകപ്പ് ഫുട്ബോള് മല്സരം നടക്കാനിരിക്കുന്ന സാഹചര്യത്തില് താല്ക്കാലികമായി...!
വിസിറ്റ് വിസ നിര്ത്തലാക്കാൻ ഒരുങ്ങി ഖത്തര്. നവംബര് ഒന്ന് മുതല് വിസിറ്റ് വിസ അനുവദിക്കില്ല. ലോകകപ്പ് ഫുട്ബോള് മല്സരം നടക്കാനിരിക്കുന്ന സാഹചര്യത്തില് താല്ക്കാലികമായിട്ടാണ് രാജ്യത്തിന്റെ നീക്കം. ഡിസംബര് 23ന് ശേഷമേ ഇനി വിസിറ്റ് വിസ അനുവദിക്കൂ. കര, വ്യോമ, കടല് വഴിയുള്ള വിസിറ്റ് വിസ താല്ക്കാലികമായി നിര്ത്തുകയാണെന്ന് ആഭ്യന്തര മന്ത്രാലയം അറിയിച്ചു.
സന്ദര്ശകര്ക്ക് ഇക്കാലയളവില് ഖത്തറിലേക്ക് പ്രവേശിക്കണമെങ്കില് ഹയ്യ കാര്ഡുണ്ടായിരിക്കണം. ലോകകപ്പ് ഫുട്ബോള് മല്സരങ്ങള് തടസമില്ലാതെ നടത്തുന്നതിനുള്ള നടപടിക്രമങ്ങളുടെ ഭാഗമാണിത്.വിസിറ്റ് വിസ നിര്ത്തിവയ്ക്കുമെങ്കിലും ചിലരുടെ കാര്യത്തില് ഇളവുണ്ട്. ഖത്തര് പൗരന്മാര്, ഖത്തരി ഐഡി കാര്ഡുള്ള ഖത്തറിലെ താമസക്കാരും ജിസിസി പൗരന്മാരും, ജോലി വിസയും പേഴ്സണല് റിക്രൂട്ട്മെന്റ് വിസയും കൈവശമുള്ളവര്, മാനുഷിക സഹായ ആവശ്യാര്ഥം ഖത്തറിലെത്തുന്നവര് തുടങ്ങിയ വിഭാഗത്തില്പ്പെടുന്നവര്ക്ക് തടസമുണ്ടാകില്ല.
2022 നവംബർ 20 ന് ആരംഭിക്കുന്ന ഫിഫ ലോകകപ്പ് ഖത്തർ 2022 കാലത്ത് ഖത്തറിലേക്കുള്ള പ്രവേശനത്തിനും പുറത്തുകടക്കുന്നതിനുമുള്ള നിയന്ത്രണവുമായി ബന്ധപ്പെട്ട് ബുധനാഴ്ച നടത്തിയ പത്രസമ്മേളനത്തിലാണ് മന്ത്രാലയം ഇക്കാര്യം അറിയിച്ചത്.ഹയാ കാര്ഡ് ഉള്ള ഒരാള്ക്ക്, ഖത്തറിലുള്ള ആളാണെങ്കിലും പുറത്തുള്ള ആളാണെങ്കിലും മൂന്ന് പേരെ കൂടി അതിഥികളായി കൂടെക്കൂട്ടാം.
ഇവര് ഖത്തറിലേക്ക് വരാന് നിശ്ചിത ഫീസ് അടയ്ക്കണം.12 വയസില് താഴെയുള്ള കുട്ടികളാണെങ്കില് പ്രത്യേക ഫീസ് ഇല്ല. മത്സരം കാണാന് കഴിയില്ലെങ്കിലും ഇവര്ക്ക് ഫാന് സോണുകളിലേക്ക് പ്രവേശനം ലഭിക്കും. ലോകകപ്പിന്റെ അവസാവട്ട ടിക്കറ്റ് വില്പ്പന സമയം മുതല് ഈ സംവിധാനം കൂടി ആരാധകര്ക്ക് ലഭ്യമായി തുടങ്ങും. മലയാളികള് അടക്കമുള്ള നിരവധി ഫുട്ബോള് ആരാധകര്ക്ക് ലോകകപ്പ് ആവേശത്തോടൊപ്പം ചേരാനുള്ള അവസരമാണ് ഖത്തറിന്റെ വണ് പ്ലസ് ത്രീ പാക്കേജ് ഒരുക്കുന്നത്.
ഖത്തര് ലോകകപ്പിന്റെ ഫാന് ഐഡിയാണ് ഹയ്യാകാര്ഡ്. നവംബര് ഒന്ന് മുതല് ഖത്തറിലേക്ക് പ്രവേശിക്കാന് ഹയ്യാ കാര്ഡ് മാത്രം മതി. ലോകകപ്പ് മല്സര ടിക്കറ്റുള്ളവര്ക്ക് മാത്രമാണ് ഹയ്യാ കാര്ഡ് അനുവദിക്കുന്നത്. അതായത് ടിക്കറ്റ് ഇല്ലാതെ വിദേശികള്ക്ക് ഈ കാലയളവില് ഖത്തറിലേക്ക് പ്രവേശിക്കാന് കഴിയുമായിരുന്നില്ല. ഖത്തര് പ്രഖ്യാപിച്ച പുതിയ വണ് പ്ലസ് ത്രീ പദ്ധതിയോടെ അതിനുള്ള അവസരമാണ് കൈവന്നിരിക്കുന്നത്. ഹയ്യാ കാര്ഡുള്ളവര് ഖത്തറില് താമസക്കാരാണെങ്കിലും അല്ലെങ്കിലും മൂന്ന് പേരെ കൂടി അതിഥികളായി രാജ്യത്തേക്ക് കൊണ്ടുവരാം.
അതേസമയം, ഖത്തര് പോലുള്ള രാജ്യത്തിന് ലോകത്തെ പ്രധാന ഫുട്ബോള് മാമാങ്കം നടത്താന് സാധിക്കുമോ എന്ന ചോദ്യം നേരത്തെ പല കോണില് നിന്നും ഉയര്ന്നിരുന്നു. ഇതിനുള്ള മറുപടിയും ഖത്തര് അമീര് നല്കി. കൊച്ചുരാജ്യം വലിയ കായിക മല്സരം എങ്ങനെ ഭംഗിയായി നടത്തുമെന്ന് ജനങ്ങള് കാണാന് പോകുകയാണെന്നാണ് ഖത്തര് അമീര് പ്രതികരിച്ചത്.
https://www.facebook.com/Malayalivartha
