രൂപയുടെ മൂല്യം ഇടിഞ്ഞതോടെ പ്രവാസികള്‍ക്ക് വലിയ അവേശത്തിലാണ്. തങ്ങൾക്ക് കിട്ടിയ ഗോൾഡർ ചാൻസ് എന്ന പോലെ പലരും നാട്ടിലേക്ക് പണമയക്കാനുള്ള ധൃതിയിലാണ്. ഗള്‍ഫ് കറന്‍സികളുടെ വിനിമയ മൂല്യം ചരിത്രത്തിലെ ഏറ്റവും ഉയര്‍ന്ന നിലയിലേക്കെത്തി നിൽക്കുകയാണ്. ഒരു ഡോളറിന് 80.74 എന്ന നിലയിലേക്ക് ഇന്ത്യന്‍ രൂപ ഇടിഞ്ഞു.

ഇതോ‌ടെയാണ് ഗള്‍ഫില്‍ നിന്ന് നാട്ടിലേക്ക് പണമയയ്ക്കാൻ പ്രവാസികള്‍ തിരക്ക് കൂട്ടുന്നത്. വ്യാഴാഴ്ച രാവിലെ യുഎഇ ദിര്‍ഹത്തിന് 21.92 രൂപ വരെ ലഭിച്ചു. 22.03 രൂപ എന്ന നിലയിലേക്കും ഇന്നലെ എത്തി. എമിറേറ്റ്‌സ് എന്‍ ബി ഡി വഴി പണം അയച്ചവര്‍ക്ക് 21.86 രൂപ വരെ ലഭിച്ചു. ഇന്ത്യന്‍ രൂപക്കെതിരെ ദിര്‍ഹത്തിന്റെ റെക്കോര്‍ഡ് നിരക്കാണിത്. നാട്ടിലേക്ക് പണം അയയ്ക്കുന്ന പ്രവാസികളുടെ എണ്ണവും ഇതോടെ വര്‍ധിച്ചിരിക്കുകയാണ്.

അതേസമയം നാട്ടില്‍ പണപ്പെരുപ്പം രൂക്ഷമായതിനാല്‍ പ്രവാസികള്‍ക്ക് കാര്യമായ ഗുണം ലഭിക്കില്ലെന്നാണ് സാമ്പത്തിക മേഖലയിലുള്ളവര്‍ പറയുന്നത്.വിദേശ വിനിമയ ഇടപാടില്‍ ഗള്‍ഫ് കറന്‍സികള്‍ക്ക് ഏറ്റവും ഉയര്‍ന്ന നിരക്കാണ് ഇപ്പോള്‍ ലഭിച്ചുകൊണ്ടിരിക്കുന്നത്. ഖത്തര്‍ റിയാലിന്റെ വിനിമയ നിരക്ക് 22 രൂപ ഭേദിച്ചു ,യുഎഇ ദിര്‍ഹത്തിന്റെ മൂല്യവും 22 രൂപയിലെത്തി.

സൗദി റിയാല്‍ 21.48 പൈസ.ഒമാന്‍ റിയാല്‍ 210.20 പൈസ, ബഹ്റൈന്‍ദിനാര്‍ 214.36 പൈസ, കുവൈത്ത് ദിനാര്‍ 261. 15 പൈസ എന്നിങ്ങനെയാണ് വിനിമയ നിരക്ക്. അമേരിക്കൻ ഫെഡറല്‍ റിസര്‍വ് പലിശനിരക്ക് ഉയര്‍ത്തിയതാണ്ഡോളറിനെതിരെ രൂപയുടെ മൂല്യം ഇടിയാന്‍ കാരണം.രൂപയുടെ മൂല്യം ഏറ്റവും വലിയ ഏകദിന ഇടിവിലേക്കാണ് കഴിഞ്ഞ ദിവസം എത്തിയത്.