യുഎഇയിലെ ഏഴ് എമിറേറ്റുകളിൽ പ്രധാനപ്പെട്ട ഇടങ്ങളിലേക്ക് ഇൻഡിഗോ സർവീസുകൾ നടത്തുന്നുണ്ട്. ഇപ്പോൾ മുംബൈയിൽ നിന്ന് റാസൽഖൈമയിലേക്കുള്ള ഇൻഡിഗോ എയർലൈൻസിൻറെ ആദ്യ സർവീസ് ആരംഭിച്ചു. ഇൻഡിഗോ എയർലൈൻസിന്റെ 100-ാമത് ഡെസ്റ്റിനേഷനാണ് പുതിയതായി ആരംഭിച്ചത്. നിലവിൽ പ്രതിദിന സർവീസുകൾക്ക് 625 ദിർഹം മുതലാണ് ടിക്കറ്റ് നിരക്കുകൾ. 180 യാത്രക്കാരാണ് ആദ്യ വിമാനത്തിലുണ്ടായിരുന്നത്.

ഇതിൽ യുഎഇയിലെ ഇന്ത്യൻ സ്ഥാനപതി സഞ്ജയ് സുധീറും ഇൻഡിഗോ എയർലൈൻസ് സിഇഒ പീറ്റർ എൽബേർസും ഉണ്ടായിരുന്നു. റാസൽഖൈമ കിരീടാവകാശി ശൈഖ് മുഹമ്മദ് ബിൻ സൗദ് ബിൻ സഖർ അൽ ഖാസിമി, റാക് അന്താരാഷ്ട്ര വിമാനത്താവള മേധാവി ശൈഖ് സലേം ബിൻ സുൽത്താൻ അൽ ഖാസിമി എന്നിവർ ആദ്യ വിമാനത്തെ സ്വീകരിക്കാനെത്തി.

മാത്രമല്ല ഗൾഫ് മേഖലയിലേക്ക് ഇൻഡിഗോ എയർലൈൻസ് സർവീസുകളുടെ എണ്ണം കൂട്ടാനൊരുങ്ങുകയാണ്. ഇന്ത്യയ്ക്കും മിഡിൽ ഈസ്റ്റിനും ഇടയിലുള്ള ഗതാഗതം സുഗമമാക്കുന്നതാണ് പുതിയ സർവീസുകൾ. ഒക്‌ടോബറിൽ ദോഹ, ദുബായ്, റിയാദ് നഗരങ്ങളിലേക്ക് അധിക സർവീസ് തുടങ്ങും.ഒക്‌ടോബർ 30ന് ഹൈദരാബാദിൽ നിന്ന് നേരിട്ട് ദോഹയിലേക്കും സൗദി അറേബ്യയിലെ റിയാദിലേക്കും പുതിയ ഒരു സർവീസ് കൂടി തുടങ്ങും. മംഗളൂരിൽ നിന്ന് ദുബായിലേക്കുള്ള സർവീസ് ഒക്ടോബർ 31ന് ആരംഭിക്കും.

പുതിയ സർവീസ് കൂടി തുടങ്ങുന്നതോടെ ഹൈദരാബാദിൽ നിന്ന് ദോഹയിലേക്ക് നേരിട്ടുള്ള സർവീസുകളുടെ എണ്ണം 3 ആകും. പുലർച്ചെ 2,00, രാവിലെ 8.00, രാത്രി 8.10 എന്നിങ്ങനെയാണ് ഹൈദരാബാദ്-ദോഹ നേരിട്ടുള്ള സർവീസുകൾ. ഹൈദരാബാദ്-ദോഹ കണക്‌ഷൻ സർവീസുകൾക്ക് പുറമെയാണിത്. ആഴ്ചയിൽ തിങ്കൾ, ശനി ദിവസങ്ങളിൽ റിയാദ്-ഹൈദരാബാദ്, ഞായർ, വെള്ളി ദിവസങ്ങളിൽ ഹൈദരാബാദ്-റിയാദ് എന്നിങ്ങനെയാണ് സർവീസുകൾ. 31 മുതൽ ദുബായിലേക്കുള്ള അധിക സർവീസ് എല്ലാ ദിവസവും ഉണ്ടാകും.