ഇതൊക്കെയാണ് പ്രവാസികളെ ഭാഗ്യ ദേവത കടാക്ഷിച്ചു എന്നു പറയുന്നത്. അബുദാബി ബിഗ് ടിക്കറ്റിന്റെ ഈ മാസത്തെ ഗ്രാൻഡ് സമ്മാനം 20 മില്യൻ ദിർഹം ഏതാണ്ട് 44 കോടിയിലേറെ രൂപ കിട്ടിയത് ഒരു പ്രവാസി മലയാളിക്കാണ്. ദുബായിൽ വെറും 7 മാസം മുമ്പ് മാത്രം എത്തിയ പ്രദീപ് എന്ന പ്രവാസിയാണ് ഈ ഭാഗ്യവാന്‍.

244ാം സീരീസ് നറുക്കെടുപ്പിലാണ് ജബൽ അലിയിലെ കാർ കമ്പനിയിൽ ജോലി ചെയ്യുന്ന പ്രദീപിനെ തേടി ഭാഗ്യദേവത എത്തിയത്. 064141 നമ്പർ ടിക്കറ്റിനാണ് സമ്മാനം. പ്രദീപും അദ്ദേഹത്തിന്റെ 20 സഹപ്രവർത്തകരും ചേർന്ന് സെപ്റ്റംബർ 13 നാണ് ഓൺലൈനായി ടിക്കറ്റ് വാങ്ങിയത്. 44 കോടി രൂപ ഇവർ പങ്കിട്ടെടുക്കും.

നറുക്കെടുപ്പിൽ പ്രദീപിന്റെ ടിക്കറ്റ് എടുത്ത ശേഷം ബിഗ് ടിക്കറ്റ് സംഘാടകർ അദ്ദേഹത്തെ ഫോണിൽ ബന്ധപ്പെടാൻ ശ്രമിച്ചു. ആദ്യ തവണ ഫോൺ എടുത്തില്ല. അവതാരകർ രണ്ടാമത് വിളിച്ചപ്പോഴാണ് ഫോൺ എടുത്തത്. ഭാഗ്യവാനെ രണ്ടു തവണ ലൈവായി ഫോണിൽ ബന്ധപ്പെടാൻ ശ്രമിക്കും. അമ്പരപ്പോടെയായിരുന്നു പ്രദീപിന്റെ ആദ്യ പ്രതികരണം. പ്രദീപ് ആണോ എന്നു ചോദിച്ചപ്പോൾ അതേ എന്നു മറുപടി ലഭിച്ചു.

പ്രദീപ്, നിങ്ങൾക്കാണ് ബിഗ് ടിക്കറ്റിന്റെ ഈ മാസത്തെ ഗ്രാൻഡ് സമ്മാനമായ 20 മില്യൻ ദിർഹം സമ്മാനം എന്നു അവതാരകരിൽ ഒരാൾ അദ്ദേഹത്തോടു പറഞ്ഞു. അപ്പോൾ താന്‍ നൈറ്റ് ഡ്യൂട്ടിയിലാണെന്നായിരുന്നു പ്രദീപിന്റെ മറുപടി. നിങ്ങളുടെ ജോലി കഴിഞ്ഞ ശേഷം വീണ്ടും വിളിക്കാമെന്നു അവതാരകൻ പറഞ്ഞപ്പോൾ ശരിയെന്നു പറഞ്ഞ് പ്രദീപ് കോൾ കട്ട് ചെയ്യുകയായിരുന്നു.

എന്നാൽ താൻ കഴിഞ്ഞ ഏഴു മാസമായി ദുബായിലാണ് താമസം. വിവരം അറിഞ്ഞപ്പോള്‍ വല്ലാത്ത ഷോക്കായിപ്പോയെന്നും വിശ്വസിക്കാനായില്ലെന്നും പ്രദീപ് പിന്നീട് പ്രതികരിച്ചു. പണം എങ്ങനെ ചെലവഴിക്കും എന്ന ചോദ്യത്തിന്, സമ്മാനം ലഭിക്കുമെന്ന് പ്രതീക്ഷിക്കാത്തതിനാൽ പദ്ധതികളൊന്നും തയാറാക്കിയിട്ടില്ലെന്നാണ് അദ്ദേഹം പറഞ്ഞത്.

ഏതാനും മാസങ്ങൾക്കു ശേഷമാണ് മലയാളിക്ക് ബിഗ് ടിക്കറ്റിന്റെ ഗ്രാൻഡ് സമ്മാനം ലഭിക്കുന്നത്. ആഴ്ചകളിൽ നടക്കുന്ന നറുക്കെടുപ്പുകളിൽ ചെറിയ സമ്മാനങ്ങൾ ലഭിച്ചിരുന്നു. മറ്റു ഇന്ത്യക്കാർക്കും ഇത്തവണ സമ്മാനങ്ങൾ ലഭിച്ചിട്ടുണ്ട്. രണ്ടാം സമ്മാനമായ 1 മില്യണ്‍ ദിര്‍ഹം ലഭിച്ചത് അബ്ദുള്‍ ഖാദര്‍ ഡാനിഷ് എന്ന ഇന്ത്യക്കാരനാണെന്ന് ഖലീജ് ടൈംസ് റിപ്പോര്‍ട്ട് ചെയ്തു.